Huawei Smartphone te metnawnlo ahih manin, nasemte Job Cut patau

Huawei Smartphone te metnawnlo ahih manin, nasemte Job Cut patau

Sengam te Smartphone Company minthang mahmahkhat ahi Huawei Technologies Co Ltd pen amet tawmsemsem ahih manin, nasemte zong aki khawlsakding “Jobs Cuts” athuak khakding uh patau mahmah cih Reuters pan kiza hi.

Huawei Company pen thakhat thu in hong khangtovat a, leitung ah Smartphone Maker agolpen thumna dinmundong ah hong tungtovat hi. (Smartphone Maker alianpen leh anihna bel Apple Inc leh Samsung Electronics te ahihi) Ahi zongin Sengam sungah Oppo kici “OPPO Electronics Corp” te’n dengawp uh ahih manin, Huawei pen kiasuk diaidiai ta hi.

Barcelona ah akibawl “Mobile World Congress” ah Huawei Company pan thuneikhat ahi Richard Yu in agenna ah amet bel omlai, ahi zongin Profit Margin pen tawmmahmah ta ci’n Reuters tetawh Interview abawlna ah genkhia hi.

February 24 ni inzong Huawei Company in nasemte zaksakna Internal Memo khat tangkokhia uh a, nasemteng khempeuh in nasep hahkat un, na hahkatkei uhleh ih Company pen tuksuk tading hi ci’n Huawei Group founder and CEO Ren Zhengfei in zaksakna nei cihi.

Mi 30 khawngin na limtak semlonapi, lupna tungah sum simhit hiatnuam. Tuabang omtheiding ahiam? Huawei Company in tuabang nasem hahkatlo mite sum hong mawkpiak loding hi ci’n genbeh hi.

Huawei Company sungah nasem bekbek mi 170,000 bang phading kici a, tualak ah 45% pen Research and Development lamdang ah asem ahihi.

Company Founder & CEO in tuabang in Memo zaksakna neimawk ahih manin, Company sungah nasemte aki khawlsakding patau mahmah uh cihi.

More: Malaysia gamsung ah “Samsung Pay” tawh van kilei theita

Huawei Technologies Co. Ltd pen Chinese Telecommunications Company khat hi a, 1987 kumin aki pankhia ahihi. Headquarters pen China, Guangdong, Shenzhen ah koih uhhi. Mundang ah aki tamzak mellohding hangin Kawlgamsung bangmah Huawei Smartphone pen kilimzat mahmah hi. ZD Sawltak #zomidaily