Hluttaw Meeting ah Pi Cing Ngaih Mang thusunna

Hluttaw Meeting ah Pi Cing Ngaih Mang thusunna

Pi Cing Ngaih Mang (ZCD teelcin MP, Tonzang) in Hluttaw meeting 16 veina ah mipi tangin thusunna limtak nei thei hi, cih kiza hi. A thusunna pan mipi theih ding a kilawmte atomin anuai abang hi.

“World Bank pan a $ 50.00 million sum leitawi vai pen Covid-19 dona leh dalna, kibawlnate akipan mailam hunsau ah gambup cidamna leh khantohna dingin vai thupi mahmah vive ahih manin lungkim huai hi, ci-in ka thukimna hong gen nuam ing. Myanmar gambup ah Covid-19 ngah masa pen Case 1 ahih leh Kaptel khua, Tedim township hi.

Tedim khuapi zato pen lupna 100 bek ahih manin a nai pen Falam leh Kawlpi zatopite ah puak ding hi mah ta leh mipi deihlohna pen social media ah nakpi takin hong kizel hi. Tua thu hangin gambup vaipuak neite tungah Oxygen plant kihelin ICU leh lupna 200 ah khan theihna dingin Tedim leh Tonzang MP te in ngetna lai zong ka phah khin uh hi.”

Pi Mang in a genbehna ah:

“Tua banah tu-in World Bank sumleitawi $ 50.00 million zeekna ding sung pan Tedim ICU Room adingin geelna om ahih manin zong mipi aitangin lungdamna kong pulak hi. Itna leh lainatna tawh na hong sem Tedim khuapi a siavuan siamahte, volunteer te tungah zong lungdam mahmah ung.

Tedim Zatopi pen lupna 200 ah kikhanto thei hi leh Tonzang khuapi leh Cikha khuapi huam sung a omte adingin zong tampi nuamtuam ahih manin nong khansakna ding leh Chin State township te lakah zato inn lupna 25 bek tawh a om lingleng niloh Tonzang zatopi zong lupna 50 ah khanto hamtang ni, cih thu hong sung nuam ing,” ci hi. Tedim Post