Hi mah lungdam huaisa pen ingh ~ Zomi Quavadis

Hi mah lungdam huaisa pen ingh ~ Zomi Quavadis

Hun khat laiin ih Zogam ah Pasian thu hong tun ciangin ih Zongeina khempeuh Dawi biakna tawh a kizom hi ci in ih Zongeina nawl khiin ding ih hanciam hi. Ahizongin ei sungah a ki Christian sak lua te nuntaakna ih et ciangin ih Zongeina sung mah ah ki Itna picing zaw in mun zong a hauh zawk lam ih tel a, ki Itna in Pasian zia ahihna ih tel ciangin ih Zongeina hoihte kan kik in ih ciingto kik hi. Puzu kikholhna te zomto kik in, itna hanga sa kigawhna cihte leh ih nutsiatsa ngeina hoih tampite ih zui kik ta hi.

Tua bek hi lo in Pasian thu tawh kisai pawi bawlnate ah ih Zolapi mah suut in ih Zolapi mah tawh Pasian ih phat thei ta a, tuabanah leitung thu tawh kisai pawi bawlna te ah zong ih Zolapi te mah suut kik in Zomi Zogam leh Zongeina te ih kikum kik hi.

Ih pianthak cil lam in hih teng khempeuh dawivai haivai ih cihte himah leh Pasian thu a thuukzaw deuh in ih tel khit ciangin Ngeina hoih ih neih lam ih kiphawk kik a, ih Zongeina leh Pasian zia a kilehbulh loh zia ih tel taktak ciangin ih lakik hi. Ih lakkik nai loh ih Ngeina hoih honkhat mah om lai dingin lamen ingh. Hite hangin ih Zomi sungah nidang sangin ki Itna in mun hong ngahkik zaw ta hi. Hi mah lungdam huaisa pen ingh.

Tua banah ih nawl khiinsa ih Zopuan te kaikhawm kik in hun thupi khat peuh ih bawl ciangin ih silh kik ta hi. Ahizongin pawlkhat in ih Zopuante hong nopzeek lua leuleu uh ahihman in ih minam Zomi sungah ih mipil leh thuthuuk ngaihsun pawlkhat lungkim thei lo in hilhcianna leh gen phatna hong neih uh ciangin Zomite ih khuamuhna mit a vaak kik zo hong suak hi. Ih mipilte leh ih miciimte thugen mang diamdiam ih hihman in tuhun ciangin Zomi sungah ih Zoniik khong One-set in kikhui nawn lo a, pasalte silh Puanlaisan leh Tanghcing puante zong ih Zomi numeite in kawng nuaisiah tuamna in hong zangh nawn lo uh hi.

Ih Puanlaisan leh ih Tanghcing puanza khong lukhu in zong kikhui nawn lo a, Necktie in zong a ok lenlan ki om nawn lo hi. Tu hun ciangin naupangno bangmah thei nailo khat in Tanghcing puan hong mawk silh nawn lo a, gual tungtuanna a nei zo nai lo khat in zong hoih a sak man bek in Tanghcing puan hong silh lenluan ngam nawn lo hi. Puankhui siam khempeuh in zong ih Zopuante amau hoihsak bangin Design hong bawl nawn lo uh a, hong kilawm dimdiam mahmah ta hi. Tuzawh a sawt lo in Zomi bupin ih silhkim theih ding ngeina puan khuidan leh zepna Design a kibang nei zo ding hi hang. Tua hun ding ngaklah mah sing e!

Tua banah ih khangno sung mahmah ah zong pawi khat peuh ih bawl ciangin ih Zongeina puante bek mah kisilh ta a, ni dang hun bangin hoih ih sak Luseite ngeina puan, Chinte ngeina puan cihte kimawk silh zanzan nawn lo hi. Zomi Nam Ni leh Zomi min tawh pawibawlna hun sungah Zomi hinapi mi namdangte puan a mawk silhsilhte leh namdangte pau a zanghzanghte zong a haivai lamin kimu ta hi. Hi mah lungdam huaisa pen ingh!

Tua banah hunlui laiin Zomi min tawh pumkhat khauhual khat banga ih kithuhual ding pen a baih hi deksuai lo hi. Bang hang hiam cileh biakna pawlpi leh beh leh phung cihte numbat khatna ah koih in, ih minam Zomi pen ih kam tawh Zomi ih kicihtek hangin milakah kidaipih ngam taktak lo hi. Zomi sungah sim zawh loh phial ding pawlpi hong om in, anen aneng in ih om zeizai hi. Tun ahileh Zomite gam tuamtuam kitungin ih muhna zong hong taangzai tektek a, ih phuutkhak haksatna zong hong tam in, ih tunna gam mite pilna siamna ih va muh ciangin mi ih bat nailoh zia ih kitel ta hi.

Tulaitak ih dinmun panin kilapsang zawhna ding hanciam in Zomi ahihnaak leh Zomi nih leh thumte omomna tuntunna ah Zomi min tawh kipawlna bawl in kuamah kinusia lo in ih kihuh diamdiam hi. A tangtat nuam mi hong tawm semsem in kipawl khop ding a bulphuh leh a nuntaakpih mi kitamzaw ta hi. Hih lungsim ih neih theih pen thupi hi, bang hang hiam cileh khantohna lampi ah akisam masa penpen in kipawlkhop theihna ahihi. Hi mah lungdam huaisa pen ingh.

Nidang laiin minam leh gamlehlei itna kinei lo hi ding hiam minam leh gam itna tawh kisai agen leh a gelh mi kitawm mahmah hi. Tun ahileh a thu bek ahiphial zongin gam leh minam avei kitam mahmah in, a gelh leh a gen zong mi kitawm nawn lo hi. Nang leh kei in bangmah ih sep zawh a om nai loh hangin gelhgelh in gengen peuh lehang ih sep zawh hun hong tung dinga, sem man lo in ih sih phial leh zong ih laigelhte tungtawn in khangthakte in lawpna leh veina hong ngah ding uh a “Huih lak veihsan” hong bang het lo ding hi.

Pasian thu gengen khempeuh zong a piangthak leh Pasian thu a thei pen hi zenzen lo uh hi. Ahizongin amau thugente hangin khanlawhna a ngah mi honkhat mah na om veve zel hi. Tua ahihman in huihlak bek ahiphial zongin hizah cianga veina anei Net sunga laigelhgelhte ih om manin thuhoih in ken mu ingh. Veina mah thupi masa pen a, veina a om ciang bekin na akisem zo pan ahihi. Himah lungdam huaisa pen ingh. Francis Lamthang (Zomi Quavadis)