Hello Zomi! (Mizogam Dongtuak Laizom te huhna)

Hello Zomi! (Mizogam Dongtuak Laizom te huhna)

Khua 20 val mencipna (landslide) hang tawh ih sanggam Mizote’n nakpitak in dongtuak uh ahih lam ih theihsa ciat hi. Hih vai ah unau khat hibuang ih hih teh huhtheih bang in huhding cih gelna tawh Zomi Donghu Kipawlna khat alung himawh deuh pawlkhat in Tedim pan in hong phuankhia uh hi.

Tua kipawlna min tawh Tedim, Tonzang, leh Kawlpi ah huhna sum kidong a teng 200 val (over 20 million kyats) kingah khin hi. August ni 8 ni ciang in aphual (Mizoram) ah huhna va piato ta ding ci uh hi. Ahun hong nai luata ahih man in maitang singhawng belh liang in Zomi muan leh suan teng kong hopih hi.

1. Zangkong Zomi Pastor te

Zangkong a om Zomi Pastor te’ makaih pawlpi tuamtuam, Tedim Association, leh Global Zomi Alliance (GZA) te’ tung ah huhngetna lai kipia khin hi. Angah khalo Zomi Pastor te zong hih pan in hong gen hipah mai ning.

Tuni ciangciang Zangkong a Zomite’ makaih pawlpi lak pan in Agape Zomi Baptist Church (AZBC) te bek in huhna sum Ks. 100,000/ (tul zakhat linlian) piakhin pan hi. Adang te’n aki kumkum lai zong himai thei, a hun nai mahmah ta ahih lam hong theisak hi ing.

Pawlpi, kipawlna, leh mimal mahmah in zong piak theih hi. Kawlgam mun tuamtuam a om Zomi te’n zong puakzo tek leng hoih mahmah ding hi. Sumkhakna ding pen:

KBZ Bank (Tedim)
Joint Bank Account No.
330-302-33000162501

hi. Hih bang thu pen hong om thethu khollo ding hi. Hong om thethu lohna ding in zong thungen ni. Ih sanggamte ih huh khak hampha mahmah hi hang.

2. Gamdang a om Zomi kipawlnate

Gamdang a om kipawlnate lak ah ih muan ih suan mahmah ahi ZIUSA, ZBCA, ZAM (Malaysia), UK Zomi Innkuan, Singapore Zomi Innkuan te’ tung ah zong huhngetna lai kikhak ci’n Zomi Donghu Kipawlna a thuvanpi khat ahi Pu Cin Lian Khai in hong gen hi. ZIUSA in bel akiteel tu’ng ka hih man un hong huhzo kei nung ci’n hong zasak uh ci hi.

Related: Mizogam Dongtuak Laizom Zosuante Huhna August 8 ni ki apding

Adang teng bel ki kumkum lai mah hiding in ka um hi. Ahun nai luata ahih man in hong phawksak ka hi hi. Huhngetna akikhak khalo pawlpi, kipawlna, leh mimal mahmah alung himawh u leh nau itna anei deuh te’n zong atawm atam cilo in khak theih ahi hi. Gamdang pan sumkhakna ding:

Western Union
Cin Lian Khai
၄/တဇန(နိုင္) ၀၂၀၃၁၆
ဘ/ 300, Lawibual, Tedim, Chin State
Ph: 09265925974

Khai leh kisaan ngeingai dih ni ei guai. Zomite takkheh ! Huhna ngen dingte hilo in huhna piadingte ih hi ! Hallelujah !

Mizogam Dongtuak Khuate

• 1. Kolasib,
• 2. Bilkhawthlir,
• 3.Kawnpui,
• 4.Biate
• 5. Aizawl,
• 7. Sairang,
• 8.Tuirial,
• 9.Tlungvel, 10.Chhingchhip,
• 11. Tlabung,
• 12.Lungsen,
• 13.Thenzawl,
• 14.S.Vanlaiphai,
• 15.Khawbung,
• 16.Vaphai,
• 17.Chiahpui,
• 18.Khuangthing,
• 19 leh a dang omlai ci.

Note’ Itna Sung Ah
Mung Laan Thang
Zangkong