Hauh theih na ding thusim nam (5)

Hauh theih na ding thusim nam (5)

1. Sawm ah khat Pasian ading in ih khenkhiat bang in atuam in khenkhia in la kemtuam den in

Mihau ih cihte pen a Nu leh a Pa pan in go luahsuk mihau pawlkhat aom teihang in atamzaw pen acilpian leh sum kemsiam te hiham tang uhhi. Mipawl khat in hauhna pen mawhna dan in tuatliang uhhiam, kha sum, kha lawh lak mama in leitawi bang la khol liang in ih khasum, ih kha lawh ih khutsung hongtun mama in kilehkik liang uhhi. Tua bang aa sum kemman liang lo aa ih kilehkik sak tehbel sum in zong hong ngaikei hong it kei ci-in a it angaih te kiangah hongpai san pah vingveng lel uhhi.

Tua ahih man in nang mimal zat ding ahi aa sum bawl nasep na khat peuhpeuh nasep na te ah na zat ding ahi phial zong in na muh, na ngah, na kha sum, na tha lawh sum sungpan sawm aa khat kembit sitset zawh ding hanciam in. Tua hi leh hun hongsawtsawt tohtoh ciang in na sum leh na paai in zong alawm dang tekiang ah ka pi leh ka pu in hong it mahmah hong ngai mah ei ci-in gen supsup ding uh aa alawm te zong nangkiang ah hong pai nuamding uhhi. Tu laitak na khasum, na tha lawh sum, na ni tha atawm ahiphial zong in na ngah na muhzahzah sung pan in Pasian ading sawm a khat na khen khitteh nang ading in atuam vilvel in sawm akhat koih tuam, koih bitsitset zawh ding ki sin in.

2. Na sum te ano suaksak in

Ih Sum leh ih paai te pen thadah sak lo in, sila bang in na sepcihtak sepsak ding kisam hi. Na sum kepbit nakoih tuam te kumkhat hong cinciang in no a neihtheih dingdan na ngaihsut kul hi. Hi laimunsan ah mizawng te leh mihau te ih kibat vetloh na hongkilang ta hi. Mizawng ten ahih leh sum abeithei hong hup hong ne kik van leh na leina in zang in, akisap khol taktak melloh Mawtaw, niik ten puansilh hoih nono, Phone hoih nono cih te leina in hongzang khia pah ziahziah uh aa, mihau te ahih leh sum muhkik na ding sum ngah kik na ding van leh na ah sum meet bawl na ding in asumte uh hong zang in ameet tawh van leh na hong lei pan uhhi.

Mihau ten asum uh azat uhciang in hih van leh na lei leng ka meet pihdiam, kei ading in kakisap taktak mah ai hiam ci-in ngaihsut pi in neimasa phot uhhi. Sum leh paai te ciimtak aa omsak manlo aa sepding nasep apiasiam te pen sum leh paai zong lungdam in muanhuai takin ana uhsepsak den hi. Tua hi a sum leh paai peipung, meet sak ding dan ngaihsun in.

3. Sum leh paai tawhkisai asiam te kiang ah thu dong in

Mihau ten sum leh paai tawhkisai tel mahmah uh aa, sum leh paai ading in api apu uh, a Boss uh hi aa sum leh paai pen sila bangin azat dansiam pha deuh uhhi. Mizawng ten ahih leh sum leh paai tawhkisai atheih na uh tawm khia mahmah uh aa, sum leh paai pen amau ading in api leh apu, a Boss uh hi aa sum leh paai ading in sila suak uhhi. Leitung ah lasak siam, kimawl siam, film star( minta min ta mi) ih cihte in sum leh paai tawh kisai atheih kolh loh uhhang un, sum leh paai lamtawhkisai misiam neitek uhhi.

Tua bangin misiam ih cialzo keiphial zong in sum leh paai tawh kisai online tungpan ahizong, laibu tuamtuampan ahi zong, asiam tetung pan thudot na ahizong sum leh paai tawhkisai theih na, muh na kibehlap nang hanciam ding kisam hi. Mi atamzaw in sum ih ngahhang in sawtveipi ih kepzawhloh na pen sum leh paai tawhkisai ih telcian loh man na hizaw hi. Hih athum na tawhkizui in na septheih aa na zuih zawh leh kumbangzah hiamkhat sung in sum honkhat hong nei man ding cin a, khemna zong na tuakto pah ding hi. Na din mun akipna ding in aban simto in zuihsawm ding hi hang.

4. Na theih telsitsetloh te kiang ah leh na theih telsitset loh na mun ah na sum leh paai te zatkhiat leh sum leitawi pia kei in.

Mizawng te in migen na pan aa azak meet ding hi cih leh mi ii meet pih te ah asum leh paai te uh meet sak ding hong sawm den uhhi. Mihau te ahih leh hoihtak hongkantel in hongsin phot uh aa tuaciang in a sum leh paai uh hong zangkhia hong meet bawl pan uhhi. Tua ahih man in sum meet bawl ding na hi aa mi zangsak ding na hizong in hoihtak inkan in sin phot in la na telmahmah teh na sum leh paai te zangkhia pan in.

5. Tha khat thu aa ameet tampi ngahtheih na ding te ah kidawm in

Tha khatthu aa ameet tampi ngahtheih na ding te pen atamzaw zuau vive, ki khem na vive hi nuam den hi. Tha khat thu in ameet na ngahphial zong in sawtkidaih ngeituan lo, sawt ki khawm thei tuan lo hi. Huaiham na khuksung ah na tuklohna ding in kidawm in. Na hoih huntam akisap bang in hauhna in zong huntam kisam hi. Mihau ten thuman lotawh meet na zong ngeilo hi. Thakhat thu in inn sangpipi akilam te sang in damdam in akilam innsang pipi te muanhuaizaw in to zaw hamtang hi. Mihau ten hun hongsawt ciang in supna lam ah lutveve cih telsitset uh ahih man in, thumanlo pi aa sum meet lakdan ding athei lo uh hituan lo in, tua apelh uh hizaw uhhi. Thakhat thu in hauh nopluat man in huaiham na guam ah tukkei in. Saimon Timothy