Hanciam Mainawt
UN pan galkapte ong manlang lo kha ding hi. I lametna amau tungah koih kei ni. US pan ahi zongin a pualam gamdang panin galkapte ong lutin hong khel dinguh ngak kei ni. Sanction tuamtuam in galkapte lokzo lualo hi.
Ahih hangin CDM hangin galkapte patau mahmah ta uh hi. CDM a lut nailo khempeuh lutciat ni. Tua banah mipite in nikhat ni panin khawlvet loin i hih theih bangbang tawh i dinna pen galkapte in lamdang sa in linglawng mahmah uh hi.
Tukhang bek ahilo, mailam hun saupi adingin a sem a kipiakhia ihihna phawk ciat ni. Haksa kha dinga lauhuaina zong tampi om ding hi. Ahih hangin nenniamna, minam le biakna kisimmawhna, thukhun omlo utbang ki-ukna, mipil makai zalian khat sangin galkap nautang khat ii thuneihzawkna dinmun ah i tunkikloh nadingin hanciam toto lai dih ni.
Mipi thuneihna, lungsim taksa suahtakna, gam le lei ah daihna le nopna in mun hong ngah nadingin ihih theih bangbang, a neu alian cih omlo, hanciam khawm phu khawm lehang i gualzo pelmawh ding hi.
Kumpi nasem, a neu a lian, a diakin panmun sangpi a nei, khuapi khat gamke khat makai dinmun anei Zomite khempeuh aw, lunghiang loin hangsan takin CDM ah ong lut ong makai dih un. I gam le lei sisan naisan tawh kidimta hi. Mailam khang tampi i khualna in hong ding khia dih un.
I vek in i sepkhop nakleh kigualzo pelmawh ding hi. Minpha maipha na ngah ding uh hi. I kithutuak kei zenzen leh i tuak ngeingei sa gentheih haksatna le lauthawnna mah in ong ngak hita hi. No khut sungah i mailam i tangthu kikhel nading tawhtang om hi. Hong zangsiam ta peuh un maw… Khup Lian Thang
Comment piaknop aomleh...