Haitatna pan Khantohna masuan in ~ Pau Khat Suan

Haitatna pan Khantohna masuan in ~ Pau Khat Suan

Mi pawlkhat in ama’ community sung ah buu a septheihna ding in mipil (or) amah sang a a pilzawte hepkhiat ding thatang hanciam thei uh a, tua ding in mihaite zang thei uh hi.

Mihaite’n buu a sepnop laiteng mipil/pilna neite a tawng geekgeek mihai bei ngeilo ding hi.

Mipilpa a demnop man in a pillo zawdeuh pa in a haite tawsawn holhthawh a ( mihaite bel tawm phatbawl peuh leh indirect a holhthawh sa suak ziau hiven maw ) pilna neipa demna in zang hi.

Tua pilna neipa a tawng geekgeek mihaipa’ nung ah kua om? Sinna nei meello Biakna sia vakvai khatpeuh maw? Ang-masuan nainganyii buaipih khatpeuh maw? … khat peuhmah na om teitei hi.

Bangbang ahi zong in hun ong paipai ding a, khuahun kikhel zel ding hi. A pilsate ahih leh haikik samlo ding a, a pillo zawte in thu ong theihbeh in damdam in ong pil hunkhat ong tung sam ding hi.

Mipi’ thutheih zawkdeuh hun khat ong tun ciang haina tha kipia a, kipahtawina ong kiam ding a, mipilte (or) pilna neite a tawng geekgeek ong tawm semsem in, i kidemna pen kiselphona leh kilangbawlna sang pilna kidemna, ki-taitehna ong hiding hi.

Tua hun ciang tuni a Zogam leh Zomite leh-et kik le’ng,” zawzen!…” i cihna tampi om ding hi. I kisik thu le la tampi om in, nuihzak huai i sak hoihkhop mah om ding a, i maizumna.. kuama’ ko lohpi, ei le ei ki-en in, ki-enpha kikkik a…. “utkei sing…utkei sing… eh! Phamawh kei.. a beisa kikhel theilo, mang mai ni…. ” i cih phatphat pong hun ong tung ding hi.

Bangbang ahi zong in, khantoh lam bel manawh zatzat sam hihang. Haitatna pan Khantohna masuan a a tai tautau mah ihi hi. A nungleh-heite cikhuam suak ding a, a khawlkhawlte ki paisan kha ding hi. Mailam gamla pi en in thasan ni…. Takkheh Zomi! Pau Khat Suan