Haimual lamzikpi thak kum 5 sung sawt theiding

Haimual lamzikpi thak kum 5 sung sawt theiding

Myanmar – India kizopna lam lianpi khat lah hi-in Chin State adingin zong income a tam pen Rihkhuadar – Kalaymyo kikal Haimual Lamzikpi thak project pen kum 5 bang sawt thei kha ding hi, ci-in Chin State kumpi ulian khat in gen hi.

Myanmar leh India kizopna lamzikpi athak tai 30 kizong khin a, a vekpi in tai 60 sau ding hi. Gam nih kipawlin lampi survey zong kibawl khin ta hi. Lampi in khua pawlkhat inn pawlkhat leh lo leh huan pawlkhat nawk kha ding ahih manin vaipuak neite in sazian kaikhawm uh hi. Mipi supna a tawm thei penin na kisem ding a, vai teng a sian ciangin nasep kipan ding hi, ci-in Chin State kumpi tung pan kiza hi.

Kalay – Tedim – Rih lamzikpi thak pen Nylon kultal kizut lamzikpi hi ding a, tai 60 a sau lamzikpi hi ding hi. Chin State kumpi leh gambup kumpi vaipuak nei uliante in zong a phual pha-in sep ding teng sem khin uh hi, ci hi.

Chin State leilu lam sumbawlna lamzikpite lakah Kalay – Tedim – Rih lampi a hoih lo pen hi ding hi. Mansuang lei leh Rih kikal bang suksia phadiak a, mawtaw kibung leh mawtaw awk zong tam mahmah hi. Lamzikpi thak hong kisem zo hi leh sumbawlna tampi nuamtuam ding hi, ci-in sumbawlte in gen uh hi.

Myanmar – India gam nih kizopna Haimual lamzikpi pen Covid-19 hangin a beisa March kha bei pawl pan kipan kikhakcip a, tuni ciang dong gam nih kikawm thei loin kikhakcip suak lai phot hi. Source: Myanmar Times/ The Tedim Post

Line Car te paikik tading

Chin State sung a om Mawtaw Line te Covid-19 natna hangin Kha 2 val aki khawlsak hi a, June 3, 2020 ni akipan in Cidamna Zum pan zuih ding/pelh dingte thu tawh akituak in kipai sak ta ding hi, cih thu kiza hi.

Hih thu tawh kisai Tedim Khuapi, Zotaang Express Gate pan Pa Giakhai in “Mi 13 aki tuangthei Bus neute ah mi 7 khawng bek kizui thei ding ahihmanin mawtaw neite lampan haksatna bel om banah abeisa hunin mawtaw sap Tedim-Kale = 7000ks, Kale-Tedim= 8000ks hi a khansak ding lah mipi lampan haksatna om zel hi” ci-in gen hi.

Tulaitak Tedim khuapi sungah Mawtaw Gate 7 om a Zotaang Express(Chin Taung Tan), Shwe Thazin, Shalom, D-Kainang, Shwe Nesat, Kha Daw Hmi leh Shwe Chintit te ahi uh hi. Source: The Tedim Post

Mawtaw sap khang

Township Management Committee in Khualzin line car te mipuak theihzah alang(50%) bek puakding leh mawtaw sap alang(50%) khanbeh sak ding June 3, 2020 ni-in Tedim Khuapi sung a om Mawtaw Gate khempeuh tungah zaksakna nei hi, cih thu kiza hi.

Hih zaksakna tawh kisai in Tedim Khuapi sunga om Mawtaw Gate 7 pan vaisai te kimu khawm uh a, Tedim pan Kale = 9000Ks, Kale pan Tedim – 10000Ks, Tedim pan Falam = 22000Ks, Tedim pan Hakha = 25000Ks, Tonzang pan Kale = 12000Ks, Kale pan Tonzang = 15000Ks khan sak dingin khensatna nei uh ci hi.

“Hih zaksakna pen Tedim Khuapi sung bek hilo in Chin State a om Khuapi khempeuh aki zasak hi. Natna hong ven ciang Mawtaw sap pen angei bang mah hi kik ding hi’’ ci-in Tedim Zotaang Express (Chin Taung Tan) Gate nei Pa Giakhai in gen hi. Source: The Tedim Post