GZA Tung Ah Report Piakna ~ Pu Pu Thang

GZA Tung Ah Report Piakna ~ Pu Pu Thang

It & Zahtak Mahmah GZA Makaite, Tukha 20 ni zan in Dr Sian Nun Siam in GZA ii Disaster Relief Committee tangin workshop khat na kah thei diam hong ci aa, midang akilawm zaw ding omlo ding ahiam ? Ka cih ciang in “NGO paizia nang sang atelzaw ding ngaihsun zo paklo kahih man un nang mah hile cin hoih pen in teh” hong cih ciang in kana mang hi.

Workshop nahi lo zaw in Conference nahi zaw aa, a conference pen Yuzana Hotel ah 21 – 23 ni dong ni 3 sung kibawl ahi hi. A thulu pen Conference to Coordinate Chin Disaster Response and Reconstruction Organized by Chin Committee for Emergency Response and Rehabilitation (CCERR) hi.

Numei naupang’ telding in gen ni cileng Chin state bup dongtuahna hang a supna baina khempeuh ditkik zawhna ding baan ah ahoih zaw leh anuam zaw nuntak khuasakna neih zawhna ding hanciam sawmna ahi hi. Leitung mun tuamtuam pan aa dongtuakte ahuhden Funder/Donor te’ lunggulhna zong hi pipen dan hi. Ong huh nuam te’n “A nengneng in kong huh uh sang un navek un thakhat thu in kong huh theihna ding un kipawl khawm in hong ngen un” cidan uh hi.

Hih Conference ah huhna hong pianuam kipawlna atuamtuam, Chin state bup pan pailai te, Sagaing pan palaite, Magwe gam pan palaite leh Rakhine gam pan palaite vekpi gawm 125 kipai hi. Tedim pan in Tedim Youth Fellowship (TYF) te mi 4 hong pai uh aa Pu Nung Sian Tuang in hong makaih hi.

Ani masa ni in Khuapi tek pan in donghtuah zia leh supna bainate tawh kisai sazian te kician tak in pulakna kinei tek hi. Tedim gam tawh kisai TYF in tawm hong pua uh ahih man in tuate genkhiatna Pu Khup Mung (ZCD) in nei hi. Tonzang tawh kisai bel sazian akician in kipia zolo hi.

Ni nih ni in akhawk khawk in hong khen uh aa ei’ khawk sung ah dongtuahnate bang ci lamh kik ding ? Inn leh lo, khawi leh vulh, nek leh tak, nasep sil bawlna, lokhawh singpuakna, sum zon pai zonnate angei abat kik nading ban ah ahoih zaw ding in bang cih ding ? Cih khawng thu tampi tak kikupna kinei hi. Tonzang, Tedim, Falam, Hakha, leh Htan Tlang teng khawk khat in hong koih uh hi.

Atawp ni (ni 3 ni) ciang in akhawk khawk aa kikupnate sepkhiat theihna ding in Chin Committee for Emergency Response and Rehabilitation (CCERR) phuat khiatna (or) kipsakna kinei hi.

CCERR ki vaipuak zia ding kikupna ah GZA tang in thu kana genna ah “Gamvai ah na ih sepkhop theihna ding hamsa mahmah ding, biakna vai ah nidang in ZBC nuai ah ih pankhop theih hang in abeisa kum 20 lai aa kipan ih kitamh khinta hi, tu in dongtuahna hang in mapang khawm thei ding din mun ah om ih hih man in ko GZA te ka lungdam mahmah uh hi. Sawtpi ih kalsuan khop theihna ding in hih dongtuah vai aa nasepkhopna ah nainganzi (politics) ong hel kei tapeuh un, nainganzi kipawlna khat peuh ii khut nuai hong tungsak kei ta peuh un” kaci hi. Hong nial omlo aa principle guideline sung ah kihel pah hi.

CCERR Main Committee sung ah mi 50 om ding aa tua 50 te anuai aa bang in hong kahto ding hi.

1. Biakna kipawlnate pan mi 10

2. Dongtuak khuapite khat pan mi 1 ta leh Sagaing pan mi khat, Magwe pan mi 1, Rakhine pan mi 1 avek in mi 12

3. Nambat nihna dan mah aa Zangkong aa Township Association ciat pan mi 1 ta avek in mi 12

4. CSOs (Civil Society Organizations) pan mi 8 (Hih mi 8 agualhna lak vuah Tedim Tonzang lampawl khat mahmah kihello ahih man in TYF hong guansak un kacih leh hong mang pah uh hi)

5. Mimin thang tuamtuam(gtn. Thet Mon Myint, Sungtinpar cihte pawl) pan mi 8.

Biakna kipawlnate lak pan in ei’ lam zawdeuh pan Tedim Baptist Convention (TBC) bek kihel in adangte bel CBC, Kalay Diocess, Pyay Diocess cihte pawl hi. “A ut uh diam bel thei keng in ZBCM zong hong helsak un. Nasem taktak ding ih hih leh amau lotawh piang tuanlo ding hi” ka cih ciang in hong mang uh hi.

Hunte nuamtak in akizawh ciang in tawpna thugenna ah GZA tang in hong gensak uh aa “Bang teng in ih sung ah kilemlohna hong piangsak hiam cih pen tangthu enleng teltak in ki muthei ahih man in kidop ding hipah hi. Salai leh Mai khawng adeih te’n suakta tak aa suan theih hi aa adeihlote zong thatang tawh suansak ding hi zenzen lo hi. “Zomi” akicih teh no tawh kisailo bang in ngaihsun kei un. Zomi, Chin, Kuki cihte ami khat bek mah hi.

Min tuamtuam anei hilel hi. Pankhop ding ka utluat man in 2004 kum Than Shwe hun lai, alau huai mahmah hun lai nangawn in CNF te’ Camp Victoria aa kibawl Chin Concensus Building Seminar ah na kah ing. 2006 kum aa ZRO/ZRA te camp ahi Mt. Sinai aa kibawl The First Chin National Assembly ah na kah ing. Lutol buai lai (suffron revolution) lai in zong minam puan silh aa ana kitom pa hi’ng. Ka gennopna bulpi ah pankhopna thupi kasakna agennuam kahi zaw aa tua hong susia thei nainganzi leh biakna vai hong lutsak kei tapeuh un” kaci hi.

Township Association palai ding pen haksatna om ken cin Tedim leh Tonzang gam pan aa palai dingte pen TYF in hong vaan ding aa November kha ni 5 ni ma in amin apuam hong puak ding uh hi cih zong thu kikupna sung ah na vaikhak ing. Main committee nuai ah Executive Committee mi 15 tawh kiphuan hi. Tua lak ah zong Tedim gam bup ai mi 1 puak lai kulding ahi hi.

Thukhupna
Tutung ih dongtuahna tawh kisai in ei’ hanciam zawhna tek tawh ih mapan tek pen kiallap mahmah hi. Rehabilitation ah bel mipil misiam te tawh ih kizolh theih kei leh ih sumh mahmah ding hi.

Tulaitak ih dinmun lian ah Tedim gambup kikhai khopna leh Tonzang gambup kikhai khopna cih bang neizo nailo ih hih man in tua kikhai khopna amanlang thei pen in ih neih ding kisamh mahmah hi. Ong huh ding zong om, mipil misiam ei tawh apang khawm nuam zong om hi aa ei’ lampan kipawlkhop siamna bek akisam ih hi hi.

CCERR in long term planning zong nei ahih man in ih tonkhop zawh kei leh ih sumh mahmah ding hi. Pasian in ahunlap lian aa hong lak hizaw in kangaih sun aa hoihtak phatak ih pom theih lian zawhna ding hanciam huai in kamu hi. Lungdam in zahtakna lianpi tawh, Mung Laan Thang, Zangkong