GZA pan hopihna (07 February 2024)

GZA pan hopihna (07 February 2024)

Global Zomi Alliance (GZA) – Pianna Zogam, Sim le Mal le Tuipi galkhat a om kong it ka Zomi pih khempeuh aw itna tawh kong hopih hi. Na omna mun peuhpeuh uh ah i biak i paai Tung Pasian in cidam ludam leh mainawt daupaina hong pia kimciat tahen, ci-in thupha ong paih masa ing.

Kumsim kumsim a i bawl leh GZA hong pian khiatna kum 2010 November kha in Tedim khuapi ah i bawl Kum Zakhat cinna Cope Jublee pawipi ah Zomi khempeuh in kiciamna nei in ka omna munmun ah Zomi Namni phawk in ka bawl ding hi, i cih a hi hi. Tua a hihman in tukum (2024) in zong February kha 20 (Tuesday) ni -in i omna mun peuhpeuh ah Zomi Namni bawl ding in kong phawk sak hi. Tuabang a i bawlna ah,

1. Zomite hong piangsak in i khang taangthu sung ah hiciang dong hong tunpih hong siam Pasian tung ah lungdam koh thunget na ding
2. I omna munmun a i Zomi pih te tawh kithei ki- it in tua pan in Leitung bup i Zomi pih te tawh ki khuaikhau phan khawm (Network) in khut ki len a na i sepkhawm theih na ding.
3. I taangthu te phawk kawm in tua te suutsuut nawn lo- in i mailam ding a khungkhawm a geelkhawm te i hih theih na ding.

Zomi te pen mailam (future) anei Zomite ih hi hi. Ataang i mailam (the bright future) i lut zawh na ding in khut ki len in hih tukum a i Zomi Namni bawl khawm dih ni, ci- in kong zawn hi.

Topa in thupha hong pia kim ciat tahen.
Note hong it,
Rev S. Pau Khan En
President – GZA
February 7, 2024
Pianna Zogam, Sim le Mal