GZA – Kawlgambup ki teelpina tawh kisai tangkona

GZA – Kawlgambup ki teelpina tawh kisai tangkona

Dear A zahtak huai kong muan kong suan uh Zomi makaite aw, GZA pan in na itna tawh na khut uh kong len uh hi. I theihsa tek mah bang in, hong tung ding November ciang in Kawlgambup Kiteelpi na hong om kik ding hi ta hi. Zogam le Zomi te ading ahoih pen mipi palai MP ding te Pasian in hong piak nadingin Zomi bup in tuni mahmah a kipan in thungen tek ni, ci-in GZA panin kong zawn nuam uh hi.

Tua banah, mihing lampang panin zong makai gina i ngah theih nadingin Thu 10 te enkawm sa in i MP dingte teel thei lehang ci-in GZA panin lunggulhna lianpi kinei hi.

Tua ahih manin, Kawlgambup Kiteelpina tawh kisai Taangkona kong nei uh a, na omom na mun tek uh ah Zomipih te pawlpi, kipawlna tuamtuam le mimal khat tek ii theih ding, telcian nading in thuzaksakna, thapiakna le hanthotna nong neih sak nading un GZA pan in muanna lianpi tawh kong cial uh hi. Gam leh minam veina taktak tawh, GZA Central Executive Committee – Gobal Zomi Alliance – 528 (a) U Kaung lane, Kyimyindine – 11101 Yangon, Myanmar.

Hong tung ding November ciangin Kawlgambup kiteelpina om ding ci-in kumpite in tangko khia khin uh hi. Abeisa kiteelna nihte (2010 leh 2015) ah ei Zomite in gam leh minam avei tenten mi gina leh panmun gina ngah zolo ihih manin i Zogam (Tedim, Tonzang, Cikha gam) pen Chin State ah aniampen mun kitung hi.

Mite in nai 24 mei angah zawh uh kum sawm bang cing khin phial taleh, e’n tuni dong ngah zo nailo hihang. Tuisik nangawn kham zo nailo hihang. I lunggulh mahmah district bang ngahkhia zo mahmah lo hihang.

Mite in college khawng, university tuamtuam khawng, vanleng tukna khawng ngah keei taleh e’n Government Technical Institute (GTI) sang ciang nangawn ngah zo lo mawk hihang.

Chin State budget a kihawm ciangin midang ta tawh tehna ei aa pen cihtham vetlo hi. Kum 10 sung pampaihna, khaktanna, netniamna i thuak dipdep khin hi. Hih bang i thuak pen ei ginat loh man mah zong himai hi.

Tua ahih manin, tukum (2020) kiteelna ah gam leh minam avei taktak mi gina khat leh nih, panmun hoih simsim ah i tutsak zawh kei peuhmah leh bel Zomite mailam pen khimzing bang ding hi. Cikmah hunin i lawmte phazo nawn lo ding hihang.

Tua hi-a, amasa pen in panmun gina a tuzo ding mi gina Pasian mahmah in hong piak nadingin Zomi bup in tuni mahmah a kipan in thungen tek ni, ci-in GZA panin kong zawn nuam uh hi.

Tua banah, mihing lampang panin zong makai gina i ngah theih nadingin anuai a thu 10 te en kawm sa in i MP dingte teel thei lehang ci-in GZA panin lunggulhna lianpi kinei hi.

1. Lungsim leh nuntakna mahmah tawh anungta Pasian akihta, azahtak mi hi ding hi.

2. Ama angsung bek en loin, gam leh minam a it, avei taktak mi hi ding hi. Gam leh mipi tung pan bang ngah thei ding ka hiam cih ngaihsun loin gam leh mipi tungah bang piathei ding ka hiam cih a ngaihsun mi hi ding hi.

3. Kam bek tawh hi loin sepkhiatna leh piakkhiatna tawh gam leh minam aveina alakkhia zo mi hi ding hi.

4. Ei mite sungah lungduai leh migi in, ahi zongin, nam dangte sungah a kisam bangin apau ngam, asem ngam, aphu ngam mi hi ding hi. Gam leh minam aa ding ahih nakleh zum leh dai, sup leh baai athuak ngam mi hi ding hi.

5. Beh lungsim, khua lungsim, pawlpi lungsim te nei loin Zogam bup, Zomi bup khantoh nading asem nuam mi hi ding hi.

6. A nisim nuntakna ah nek leh dawn a kipan in a kidawm zo mi, a zahtak baang mi hi ding hi. Numei/pasal vai leh sum leh paai (golhguk nekna) thute ah paubanna, minsiatna nei lo ding hi.

7. Kawl kam nuam tak zang thei in, Mangkam zong a kilawm ciang a zang thei mi hileh deihhuai hi.

8. Tungsiah uliante leh nuaisiah nautangte tawh kipawl siam in mite maipha amu thei mi hi ding hi. Gam leh minam aa dingin a kisapna munte ah a kiniamkhiat thei mi zong hi ding hi.

9. Kawlgambup makai uliante in panmun (zaa) thupi khat peuhpeuh piak dingin muantak asak uh mi hileh deihhuai mahmah hi.

10. Kum 5 asep sungin Zogam leh Zomi ta dingin agentaak na lianpi khat peuhmah asepkhiat sawm hamtang mi hi ding hi.