Gullu Mual le Pilna Mual ~ Cope Suan Pau

Gullu Mual le Pilna Mual ~ Cope Suan Pau

Zomi t’a ding koi iplahhuai zaw diam? Gullu Mual: Ki to Khin maw? Tuma kum 3 lai khawng khat in Kawl galkap kumpi in Sen company khat tawh Gullu mual to ding thukimna nei khin cih ih thei zo hi. To khin phial hiam kithei lo hi. Tua plan tawh 1990 kiim in Gangaw-Kalay meileng lampi abawl uh ahi hi.

Gullu pen, atatak in ci le’ng, 1965 khawng pan kipan Ne Win hun sungin Germany [tua lai West te hi ci ngel ing…?] te tawh to ding vaihawm ngei uh a, raw material 50% ngah le to ding hih tuak hi. Kawlgam in 30% bek pia ding acih ciang a, khawl kik uh hi. Mei leng lam beek om lo, Gunkhawm ciang beek meilenglam na nei leu ci’n thu khat lai, ci in Germany te kileh kik uh hi. Tua khawngin thukim le uh zongh ih Gullu bel aman khin hi mai hi.

Gullu Dream: Zomi te’ Hauhna

Gullu Mual thu tu laitak ngaihsutna ih nei ciat hi. Gullu ei’ khut sung hong tung hen la, ei’ deih bangin to thei le hang leisung sumpiang nickel le chromium raw material tampi kingah ding a, Zomi khempeuh nasep kul loin hong vak zo phial lel ding…cih pen Zomi Imagination or Gullu Dream ahi hi.

Zogam autonomous state in ding zo ding a, Gullu kivak sak lel ding… cih khawng sunmang peuh in kingaihsun thei zel hi. Tua ahih le Gullu pen koi cih ding ih hiam? Zogam sungah leisung sumpiang ih neih sun sun hi a, mi pia ding maw, hu ding?? Tu in Sagaing Division sungah kikoih ta ci le’ng bang cih nawn ding?? Khut zep a en lel ding maw, thau tawi a gamlak pan do ding? Ahihkei le Pasian kiangah thungetna tawh ap lel ding maw? Zomi te koici kalsuan ding?

Kachin Beh te’ Din’mun tawm Enkakna

Kachin beh te in 1980s hun lai pawl in hong cih ngei uh khat ah, “No, Zomi te pen ngaing-ngan-zi politics lam ah na mit uh vak lo lua hi, aneu alian in biakna bekmah kin mawk hi uh teh. Na biakna un hong influence lua hi.” cih thu ahi hi. Amau’ cihna ah, “Ko pen politics le Nationalist Movement tawh kalsuan a, biakna tawh buai masa lo hi ung” cih thu hi. Zomi te kha khanglona [khanlawhna] ih neih hun sung ahi hi.

Ahihangin amau Kachin gam zong tuin Kawl galkap kumpi mah in zo thawh ve ve mawk a, Phakan jade teng bang company te in set catapillar le bull dozer namcing tawh to gawp lel in, khang kizom tawntung bei ngei lo ding acih liang uh “lung seng” suang manpha teng bei mang khin ta hi. Phakan suang eng mual teng bei mang khin in khuapi khat suak ta hi: Phakan khua ci in Kawlkumpi in uk hi.

Kachin sum nei teng pawl khat in hauh lawh sam ahih hang minautang bel azawng ngei mah in zawng lel uh hi. A gam bup in hau cih bang om thei tuan lo mawk hi. Tua suang-eng jade teng pen world market ahi Hong Kong, San Francisco, Tokyo etc. khawng tung mawk hi.

Cihnopna ah KIA le KIO te in agam suaktatak in autonomous state khat in uk thei mah le zongh, sum nei teng mah in leplawh ding a, minautang bel nasem ding hi lel ve ve hi. Suang manpha teng pen world market teng mah ah raw material in man ol takin zuak lel ding uh a, ahauh lawh millionaire te pen Hong Kong khawng a te, San Francisco khawng a te na hi ve ve mawk ding hi. Economic pilna le siamna kikhai lua hi.

Kachin gam en kik le’ng suangmanpha; le ngun le kham tampi piang hi. Tui gei khempeuhah kham ki zong thei a, lei zongh hoih thei mah mah hi. Tua teng mah iplah lua uh ahihman in Kawl kumpi ii deihbang a zekding launa tawh, KIA nasiatak in thahatsak uh hi. Tua tawh kizui in, Kachin tangvalno khem peuh sangkah man lo a KIA ah a lut gaih hun sungin ei Zomi te in kumpi langpang loin sangkah laisin in ih om pen, tu ni in leitungbup minam tuamtuam lakah lai thei le mipil percentage [%] tam pen pawl ah ih kihel thei hi.

Kachin gamah aneu alian in apau sial un “Ja-gumphrawh” cih kammal hel den uh hi. “Kham le ngun” cihna hi a, sum le paai lo tawh mihing pen thu in sim lo uh hi. Mi khat a gen ciang, “Ja-gumphrawh” bang zah nei hiam cih thu hi bek se hi. Tua mah bangin en pak le’ng a u Zomi te sang hauzaw tawh kibang uh hi. Minam ahi a, mimal ahizongh amau sumtang in bel hauzaw mah ding uh hi.

Zomi le Suang Manpha: Koi Thupi Zaw?

“Zomi mai ah suang manpha koih bang…” cih pen Zomi tawh kisai Kawl te’ paunak khat ahi hi. Zomi te’n suang manpha thupi sak lo cihnopna hi a, lamkhat pan in suang manpha ii manphatna zongh thei lo cihna hi zel kawi kawi hi. Ngaihsun thei le’ng na mah mah ve ve sam hi ei. Bang le bang le Zomi te in suangmanpha nei lo, deihna mel zong theilo lai…cih bel aman ve ve mah hi.

Tu ni dong ciang Zomi te pumpi tungah kham le ngun suang manpha om khol tuan nai lo hi [pawl khat sim lo.] “Ngun le Kham” cih kammal zong Zokam hi loin, Shan te kam hi lai hi ei. Kalay-Kabaw Valley ah Shan te tawh ih om lai khawng pan ih theih hi le kilawm pan hi. Tua zong athei ih hi bek a, a nei ih hi kei hi. Na buang ei maw!! Neihlo le theihlo athuah pawl hi zen ve hang aw, ih ngaih sutsut tak te…Kawl te’n “neihlo sang’n theihlo na zaw” ci in, ei’n neihlo le theihlo thuah…peuhmah ta zen aw…

Bangbang hi le, neihlo a neihlo ta vet, suang manpha khawng deih kei lel le hang a, mihing thupi sak zaw le’ng tua hong manpha zaw ngel ding hi. Tu hun leitungin human resource thupi sak mah mah a, Zomi resource bang zah om cih hong thupi ding hi. Zogam ah bang teng piang cih sangin Zomi te bangzah pil, bang zah siam cih hong manpha zaw ding hi. Zomi le suang manpha koi tel zaw ding??

Raw Material vs Product: Koi Manpha Zaw?

Mogoh ruby le saphire zongh a world market pen Bangkok hi mawk hi. Kawlgam ruby leitungah minthang mahmah na pi Thai te in hauh lawh mikmek hi. Cihnopna ah ih gam pan bang piang cih sang in bang cih le’ng mi neihsa tungah meet bawl thei ding cih, business minded ding le economic ih siam ding pen Zomi khang thak t’a ding hong thupi zaw ding hi. High-tech pilna kisam masa zaw cihnopna hi. Pilna sang zaw kisam hi hang.

Gth: 1980s pawl lai in Sen gam pan sik raw iron ton tampi tak Japan in lei a, steel vi ve suah in Sen gam mah ah zuak kik hi. Tampi meet hi. Sen te in man ol tak in Japan te zuak a, Japan te in man ham tak ih Sen te mah zuak kik hi. Sen te lungkim het lo ahihhang, cih na’ng thei tuan lo uh hi. Steel bawl thei nailo mawk ahihmanin amau raw material teng mah steel in a lei kik suak a, na sa mah mah uh hi. Cihnopna ah raw meterial pen man ol mah mah lel a, product khat pen manham hi. Ih gam pan bang raw meterial piang hiam cih sang in bang product ih nei hiam? cih pen hong thupi zaw ding hi.

Japan te in steel leitung quality tawh hoih takin bawl thei mawk uh a, agam pan iron raw material neih kul masa lo hi. Korea te in agam pan namgim crude oil[petroleum] them zongh apiang lo hang, dah kikeuh lo lel mawk uh hi. Mi gam pan crude oil deihzah lei in agam uah huankik a, fuel deih bangin zangh zihziah lel uh hi. Oil bank nei uh a, credit card tawh deih bangbangin thun meng meng lel uh hi. Sathau cilzat ding cih khawng om se lo hi.

Mi gam pan a platinum raw material man ol in lei a, parker fountain nip neu ciuciau bawl ding angaihsun Mr. Parker bang business khuak nei Zomi te ih hih ding kisin kisam mahmah ta hi. Nidang in Zomi tembaw zui seamen te in motor car gol pi pi lei in ciahpih uh a, shipping le custom duty, plus tax sum tampi bei thuah uh hi. Kawlmi pawlkhat in phim ‘needle’ khawng hong ciahpih ziau uh a, bang mah bei thuah kul loin sum tam ngah zaw lai uh hi.

Tua ahih le Gullu nusia ta ding maw?

Gullu le Zogam nusia lel ni cihna hi sam lo hi. Zogam Gullu zongh manpha mah mah sam na ven, raw meterial to ding in zuak ding cih ciang bek pen kiallap sum zong pakna dingin hoih bek a, nickel le chromium tawh na hoih bawl thei ding mipil misiam Zomi sungah ih om ding lunggulh huai zaw cihnopna hi.

Gullu tawh kisai in, ei bek Kawlte in hong zo thawh hi lo a, Shan te bang atung a ih gen Mogoh ruby mine bang pen Mandalay Division sungah guang to hamtang zen uh hi. Karen, Kaya cih te gam zongh ah Kawlgalkap tha tawh Kawlkumpi mah in leisung, leitung sumpiang khempeuh luaktum mangin tuni dong mah leitungah man ol tak in zuak zuak lai a, tua hang mah in leitung gam pawl khat in Kawl galkap kumpi pen dik sa mah mah uh a, mai et bawl uh hi.

Zogam ih cih in koi ciang huam ding hiam?

Politics gen kik ding hi le hang; U Nu parliament kumpi kipat hun state le division gam hawm lai in U Nu mah mah in, “No Chin Zogam pen na khuapi ding un Kalaymyo [Kawlpi] la un la, Kalaywa [Gun Khawm] khua dong Zogam in la un, Kawlgam tawh tui lam kizopna ding kisam hi,” ci in hong suggest pen Zogam makai te in Kawlte lak khawngah hong zo thawh lel in teh, e’n Kawlmi te uk zo kei ni ci in ki la ngam lo hi.

Ih beh Kachin te bangin zanggam tampi la uh a, agam uh zai mah mah hi. Ne Win hun sung khempeuh pan tu ni dong, Kachin gam de facto kumpi in KIO ding gige hi. Tu laitak in galkap mi 10,000 tawh Kawl galkap in a sim khak le a do ding in kigingsa in om uh hi. Kachin Independent Army tu ni dong phiat loin thauhui thautang tawh om uh hi. Kachin mipi nam 6 le Lisu te zongh gawm in nam 7 phasak uh a, limtak in minambup Jingphawh Vunpong ci in ki organized uh hi.

Zomi sungah 1965 khit Zomi gamnuai lut zongh ki om sam hi.Pu Lt. Col. Son Khaw Pau, ex. 2nd Chin battalion commander, in India gam sungah Chin Independence Army kipan a, asawt loin Ne Win request tawh India kumpi in hong matsak hi. Ama ngaihsutna ah Zogam cih pen Chindwen gun sak lam khempeuh Naga Hills dong huam ding ci a, ahizong in K.I.A. te mahbangin galkap vai bek ahi hi. Adang Pu Thual Zen te Pu Rang Hnawl te, etc. ki om ahihhang Kachin te bangin tangzai zo lo hi. Bek tham loin amau nuntakna mahmah le azi ata, innkuanpih, mipih te’n suplawh, bailawh in phattuamna om lo hi.

Zomi le Politics: Zomi te din’mun enkikna

Politics tawh kisai in Zomi te Kawl te’ suamlum tam khol lo [om lo phial] ding hi. Bang hang? Hai lai or pil nai lo. Rakhine te Shan te mipil mitei tampi Kawl te’n Independence movement hun sung in suam lum meng meng uh a, mi hai pian teng bek tawh Union vaihawm uh hi.

“Rakhine le gul ngawng san, gul ngawng san that masa kei un!” cih khawng pen Bogyoke ih cih cih deep, the Father of Independence khawng ih cih deep Gen. Aung San te’ bawltawm politics paunak hi a, lauhuai mah mah hi. Rakhine mipil tampi suamlum a, Sian te zong ‘beng’[opium] ne papi zual [thu tei mel lo] pawl khat bek koih lai uh hi. Tua hang a PANGLONG TREATY khawng ih cih cih pong hang, bang mah ki tumdang thei khol nawn lo a, a heh athangpai teng thau tawi in gamlak zuan hi lel mawk hi.

Ei Zomi te pen thau le gal uk mah mah napi hang in thautawi a Kawlgam ih hu zaw hi: Kawlgam hutna in si le nai, nuntakna tampi ih pia hi. Tua hang mahin Pasian in Zomi te thupha hong pia hi lo ki ci thei lo ding hi. Tu ni leitungah mi tawh kim in hi ciang ih tung thei na Zomi te thautawi in gamlak ih pai lo hang hi zaw in um ing.

Ih sanggam Kachin te le Karen te bangin gamlak zuan le hang, amau bang mah ih hi lel ding hi. Abeisa hun le tu laitak mipil mitei akici teng le khangno teng gamnuai galkap ih suak lel ding a, ih numei te pen ei’ galkap te le Kawl galkap te’ [Korea te pau le] comfort women suak lel ding uh hi. Ih sanggam te’ kiang pan ih muh sa hi.

Gullu Mual maw, Pilna Mual: Koi Teel Zaw Ding?

Gullu it huai, iplah huai mah mah na ven, Zomi khangno khangthak te pilna siamna sin hun in ih sin kei kha ding a, $ bebek ih lunggulh khakding lauhuai zaw ding hi. Ahihkeile politics peuh kinluat in nei in gamnuai peuhah ih lut gaih khak ding khawng zongh citawm lua Zomi te ading lauhuai ve ve hi.

Tu laitak America le mun tuamtuam ah sum thalawh pak nading bel pilna kisam lua khol lo kha thei mah ding hi. Tu bek hi lo tuma kum 30 lai khawng pan kipan, Zomi te sungah sangkah laisin khawng tu hun teh thupi nawn kei, degree ngah in kumpi nasem le’ng khasum khom lo bang a mang ding? Tua sang khual zin, sum bawl ding hoih zaw ki ci a, khualzin sumbawl tampi ih om hi. Sum zongh nei takpi mah uh hi.

Israel gamah diamond piang het lo napi lei tungah diamond taat siam pen Jews te bekmah hi se hi. Bombay [Mumbai] khawnga diamond taat te zongh Jewish community khawng pan le Jews te kiang pan asin kha te bek ahi uh hi. Diamond raw material tampi azuak Africa gam te hau meel lo a, leitung market ah diamond product azuak thei te hau zaw hi. Kawlgam pan dol sing le suang manpha tampi ki zuak khia in, a lei te in product hoih no no bawl in zuakkik uh a ei sang hau thei zaw uh hi.

Zomi te’n Gullu Mual iplah zaw ding maw, Pilna Mual lunggulh zaw ding hiam? Gullu Mual suang manpha te iplahhuai mah mah na ven, pilna siamna manpha zaw ding hi.

Zomi khangthakte’n pilna siamna lamah asang thei thei ih sin ding lunggulh in nei zaw ni. Pilna nungah gam le minam suahtakna, hauhna, sum le pai, ngun le kham, etc. te in hong sul zuih zaw ding uh hi. Hun khat lai in Zomi te pen lai sin ding le pilna zong ding athupi sak pen te ih hi hi.

Pasian in Zomi te’ lungsim ah pilna’ manphatna tel theihna hong guan’ kik ta hen. Amen! Regards, Suanpi