Guktakna leh hamsiatna

Guktakna leh hamsiatna

Nikhat cycle a thak sitset tawh Kham (Zogam) pan in kawlzang ah hong tuaksuk khat om hi. A ziin tunna ah om in a sep ding pawlkhat sem hi. Zingsang a thawh ciangin a cycle na om nawnlo mawk hi. Ki guksak hiau dan hi. Tua tangvalno pa leh a nu pen sunlangval kap ngeungeu mawk uh hi.

A kahkhawm un ‘hih ka cycle a gu te’n na gukei zawleh daupai zaw ding hi ven. A tukhang a ta khang dongah mi neihsa deihgawh in omsuak vet mai hen. Na sa lua ingh’ ci mawk uh hi. Tuabek hilo lainat mahmahna hangin hong gingkhia a zaknoplo kammal lomtangpi khat ki pia mawk hi.

Hih thu ka muhciangin Zomi te’n mi neihsa guksak kei ni. Mi namdang te’n a gu phial uh zongin en gu kei limlim ni. Cycle khat i gukna hangin sumbei lo in cycle secondhand khat ki ngah mah hi. A zuak kik te in sum tawmkhat ngahmah ding hi.

Ahizongin guktakna hangin a lubuk ah a tu hamsiatna (kammal kha) pen puakzawh ding hilo hi. Khangkhat a’ding bek hilo in a tu, a ta te dong ban lai hi. Tua kammal pen cycle 100 sangin zongh ki deihlo zaw ding hi.

Tua a hihmanin cycle (mi neihsa) guksak kei ni. A leite in sun nisa nuai ah khua ul nul in, mi khut nuai ah maizum zahpihna thuakkhawm in, sun le zan in nasem in tua thamantawh a lei ciauciau hikha thei hi.

Tuabangte a sukha te tungah banghangin daupaina leh mavanna om thei mahding hiam? Tuabangin a gamtatsia mite tungah a mimal in hamsiatna ngah hi. A innkuan in hamsiatna ngah hi. A minam sungah minsiatna tun hi.

Guktakna hangin a ki ngah hamphatna leh hamsiatna mukhawm thei hilecin na gu ngeingei kei ding hi. Tua ahihmanin a hunlap in i kipuahphat ding deihsakna lianpi tawh hih lai hong ki gelh a hihi. Lungdam! Siamsin Library