Inntungpan guaktang in akiasuk Model pen aki sawnkhia hiding ci

Inntungpan guaktang in akiasuk Model pen aki sawnkhia hiding ci

Malaysia, Kuala Lumpur khuasung aom Jalan Dang Wangi vengsung Apartment khatpan in Model numeikhat aguaktang in kiasuk hi. Inndawl 20th Floor panin nungkalsung in akiasuk hi a, sipah hi. Hih Dutch Model akiatsukna pen amawkmawk hiloding a, aki sawnkhia hidinghi ci’n a innkuanpih te’n genkhia hi.

Tua Model numeinu minpen Ivana Esther Robert Smit hi a, kum 19 aphakhin khat ahihi. Nung Thursday ni in inndawl 20th Floor panin kiasuk in, anuai inndawl 6th Floor ii Balcony ah tusuk in sipah hi.

Dang Wangi OCPD Asst Comm Shaharuddin Abdullah in agenkhiatna ah hih Model nu ii sihna pen “Sudden Death” ci’n Case kibawl cihi. Ahi zongin apa ahi Mr. Marcel in Netherlands aom Dutch NL Times te tungah agenna ah katanu pen inntung panin aki sawnkhia hiding hi ci’n genkhia hi.

Hih Model nu akiatsukna inndei sungah American pasal khatleh azi Kazakhstan gammi khat aom uh ahihi.

Apa in banghang in aki sawnkhia hidinghiam cihleh atanu ii a ngawng ah aki kuihna, liamma pawlkhatzong om ci a, mikhat in lencip in asawnkhia hidinghi ci’n agenkhia ahihi.

RTL Nieuws te genkhiatna ah tua Model numeinu pen zingsanglam 10am hunpawl in Apartment tungpan in akiasuk hi ci’n Police te’n apa kiangah agenkhia uh cihi.

Zingsang 10am hunin akisuk pen nitaklam 3pm hundong tua American Couple nupa te’n bangmah ahihloh uhpen lamdang kasa mahmah hi. Ka tanu ii avanzat tepen tuate Apartment sungah omlai hi. Tua Ameircan Couple te tungtawn in akila Statements pen kibangsak uh a, ka tanu in ahihleh bangmah nialthei nawnlo hi ci’n apa in genkhia hi.

Hihvai tawh kisai in a innveng te’nzong tua American Couple te omna inndeisung panin mikitawng, aki otsan akinial awging kaza uhhi ci’n genkhia uhhi. Model nu in zingsanglam 7:25am hunpawl in alawmpa Boyfriend kiangah Phone samin, tuzang American Couple tetawh kavak uh a, amau kiangah ka giaksuak hi ci’n zasak cihi.

Malaysia gamsung aom Dutch Embassy te’n hih Model nu ii sihnavai tawh kisai in hoihtak aki kankhiat nadingin Interpol te tungah ngetna nei hi ci’n NL Times te’n genkkhia uhhi.

More: Canadian Model khatin amittang Color laihsawm in bawlkhial, amit tawding

Ivana Esther Robert Smit pen “Malaysia Supermodel Search 2014” kidemna ah Second Runner-up angah ngeikhat ahihi. Tuahunlai in amahpen kum 15 bek phapan hi. Sawltak #zomidaily