Gospel Violen ~ Dr. Ngul Khan Pau

Gospel Violen ~ Dr. Ngul Khan Pau

Na nuntakna hong zangpa’ siamna hangin na manphatna kimu bek ding hi. Khatvei lai-in violin siam a minthang Paganini in mihonpi maiah siamtaka a tum lai-in a gui khat khit khat hong tat hi. Tua mipite’ ama phuah Napoleon cih a tum ngai dinga hong paikhawm ahi uh hi. Violin gui hong tah ciangin amau zong bang hong ci phet tam maw ci-in diip humsa in na ngai khikhe uh hi. Tua ciang Paganini in a violin sangtosak a, “Gui khat leh Paganini” tua gui khat bek zangin a zak nop mahmah tumging hong tum hi. Siamtaktak mah hi cih tua panin mi khempeuh in theician uh hi.

Na nuntakna gui khat bek om lai Topa zat dingin Ama khut sungah ap leteh Halleluijah Chorus tumna dingin hong zang thei hi. Ama khutah gui tampi kisam lo hi; violin thak zong kisam hi beek lo hi. Nang leh Amah bekin a ging kilawm penpen na bawl thei uh hi.

• Ama khut pawl khatte’n supna in ngaihsun uh hi
• Ahi zongin a theiciante adingin supna pen metna hi
• Hih leitung bek ading hi loin, tawntung adingin zong
• A bei thei lo hamphatna, lungnopna, nuntak mannei suahna
• Ama khut sung bekah om hi.

Limgelh siam Gainsborough in zong music siam ding na lunggulh mahmah ngei hi. Music van tuamtuam lei in a banbanin na kisin hi. Khatvei violin siam khat in la ngaih mahmah a tum za kha a, Gainsborough zong tuapa pahtakna tawh kidimin tuapa’ violin tum va leipah lian hi. Amah bangin tum thei ding kisa in a tum leh siam tuanlo hi. Tua ciangin aman la ngaih mahmah a zak pen a violin-ah om na hi loin a tumpa khutah om ahih lam hong phawk hi.

• Ama tum dingin na nuntakna na phal hiam?
• Ama khut in hong tum ciangin na manpha bek ding hi.
• Nang hong kimangngilh ding a, hong tumpa kipakta ding hi
• La ngaih penpen nang sungah om hi loin, hong tumpa khutah om hi.
• Na nunna Ama min siangtho pahtawina in tum ding na phal hiam?

John Elliott la gelh “Stradivarius” na sim kha ngei hiam? Kum tampi a paisa lai-in Stradivari pen violin bawl siamna lamah na minthang mahmah ngei hi. Tu hun ciangin ama violin bawlte manphat dan a kigen ciangin suangmanpha a violin dim khat zah man dingin kituat hi. Stradivari in ama la phuahna ah hih bangin na gelh hi:

• Ka khut thadah in ka omsak leh
• Deihna nei a hong bawl Pasian tungah a khial ka hi ding hi
• Violin a kibawl lai, zawh nailoh, a hawmpi ka hi ding hi
• Antonio Stradivari loin ama violin bawl bang kibawl lo ding hi.

Tua ahih manin nang zong Pasian adingin a zattak violin na hi hi. Nang bang tektek kum sawtpi hong ngak zawh ciangin hong piang na hi a, Ama gelsa na nial leh Pasian adingin hih bang hun manpha a mawkna tawh bei hi ding hi. Nang bang tektek leitungah piang kik nawnlo ding ahih manin hih hunpha a tawntunga muh kik nawnloh dingin a bei ahi hi.

• Na talent Topa’ kiangah hong pia in, lawm aw
• Nang mah hi hong sap, midang kisam lo ding hi
• A thupha nang tungah hong sungsuk ding a,
• Na nih un na lianpi nasem khia thei ding uh hi.

Ole Bull, leitungah violin siam penpente lakah kiciamteh hi a, ni khat gamlakah mang hi. Khuamial sungah a paipai leh singinn a teng putek khat kiang va tung hi. Putekpa in ann tawh na vak phitphetin, puan lum leh meilum tawh na zindo hi. Nitak ann nek zawh in putekpa in ama violin lui mahmah khat hong la khia a, a zinpa zak dingin hong tum hi. Ole Bull in putekpa kiangah, “Ken ka tum thei ding hiam?” ci hi. “Na tum thei tam maw, ken kum tampi ka sin hi,” ci-in dawng hi. “Hong sin dih ning e leh, ka tum thei hiam,” ci-in Ole in tua violin la hi. A violin guite lui mahmah tungah a tumna tawh hong nawt a, thakhat thu in putekpa innsungah music kilawm penpen hong ging ziahziah hi. A tangthu kigelhna-ah – tua putekpa lungdam lua leh lamdang sa lua ahih manin naupang kah in kap hi, kici hi.

Nang leh kei zong “violin” gui lui mahmah tawh i kibang hi. Ging kilawm tumtheihna ding lim leh mel i pua kei hi. Mawhna in hong tumtum sa i hih manin Lungdamna Thu adingin tumging kilawm hi thei nawnlo ding kimlai, Jesu Khris khut in hong lawng a, “Kong tum ding nong phal hiam?” ci-in hong dong hi. A gui kitansa, kilawmna nei nawnlo violin na hi zongin Topa khut in hong bawlpha thei hi.

Na nuntakna ging kilawm ahih theihna dingin:

1. Pasian khut sungah Ama phasak bangbangin hong tum dingin kipia in:

• Paunak 3:5-6 “Na lungsim khempeuh tawh Topa muang in la, nang’ theihna suang kei in. Na hihna khempeuhah amah phawk in. Tua hi leh lampi man amah in hong lak ding hi.”
• Paunak 16:3 “Na geelnate khempeuh Topa ap in; tua hi leh na geelna bangin tangtung ding hi.”
• Late 37:4-5 “Topa tungah na vai teng ap in. Amah muang in; amah in hong sem ding hi.”
• Late 119: 58-59 “Ka lungsim khempeuh tawh na maipha kong ngen hi. Na thuciamna omsa bangin kei hong hehpih in. Ka gamtatnate ka ngaihsun a, na ngeinate zuih ding ka kiciam hi.”

2. Pasian huhna tawh “hi thei ding” cih muanngamna lungsim nei in:

• Matthew 17:20 “Jesu in, “Na upna uh a cingtaak lohna hang ahi hi. Ahi taktakin note kiangah kong genin-ah: Ankam tang cia bang upna na neih nak uh leh, hih mual kiangah, ‘Hih lai panin hua lai-ah kin in,’ ci le uh cin kinkhia ding hi. Na hih theihloh uh khat zong omlo ding hi.”
• Matthew 19:26 “Jesu in amaute enin, “Mihingte’ hihzawh ding hilo mah hi; ahi zongin Pasian in na khempeuh hihthei hi,” a ci hi.
• Marka 10:27 “Jesu in amaute enin, “Mihingte-a’ dingin hi zolo mah hi; ahi zongin Pasian-a’ dingin ahi mawh thu hilo hi; Pasian-a’ dingin na khempeuh hithei hi,” a ci hi.
• Marka 14:36 “Jesu in, Pa aw, na khempeuh na hihthei hi.”
• Luke 1:37 “Tua ahih manin Pasian in a bawl theihloh khat zong omlo hi,”
• Luke 18:27 “Jesu in, “Mihingte’ hih zawhloh pen Pasian in hihzo hi,” ci-in a dawng hi

3. Haksatna na thuakte Pasian in na gin ngaih semsem na dingin hong puahphatna hi:

• Late 119:50 “Hih pen ka thuakna-ah keima kihehnepna hi a, na thuciamna in kei tungah nuntakna hong pia hi.”
• Late 119: 67 “Gim nong piak ma-in lam ka pial thei zel a, ahih hangin tu-in na thu ka zui hi.”
• Late 119: 71-72 “Nangma ngeina kipte ka sin theihna dingin gimna ka thuak pen kei-a’ dingin hoih mahmah hi. Nangma kam sung pana thu pen kham leh ngun tul tampite sangin kei-a’ dingin hoihzaw hi”
• Late 119:75-76 “Topa aw, nangmah biakna ngeina kipte man hi, ci-in ka thei a, na thumanna hangin kei gim na hong pia hi. Na nasempa tungah na thuciamna bangin keimah hong hehnem dingin na itna kip a baihsa-in hong omsak in.”
• II Korin, “Sanggamte aw, Asia gamsunga ka thuaknate uh na hong phawkpih ding uh ka deih uh hi. Ka thuakna uh lianlua mahmah ahih manin nuntak zawhna ding lametna omlo hi. A si ding taktak hita hang, ci-in ka kingaihsun uh hi. Ahi zongin tua zahin ka thuakna uh pen kote’ thatang kimuangloin sihna panin misite a hingkiksak Pasian ka muan’theihna dingun apiang ahi hi.”
• II Tim 3:12, “Khris Jesu tawh kipawlin Pasian’ deihna bangin a nungta nuam khempeuh in bawlsiatna a thuakding mah hi.”

4. Hong kibawlsiat ciangin thupha tawh thukkik in:

Sadhu Sundar Singh Mikang gamah a zin lai-in, kikhopna khatah, “Hong bawlsiate bang cih ding ka hi uh hiam?” ci-in dong uh hi. Aman, “Suang tawh theikung ka den ciangin, tua thei kungin suang tawh hong deng kik loin, a gah hong pia hi. Tua mah bangin sandalwood heipi tawh na sat ciangin a gim nam tui hong pia hi, hong bawlsiate tungah gim namtui na pia un,” ci hi. Topa Jesu in, “Ahi zongin ke’n note kiangah kong genin-ah: Na galte uh na it un la, no hong bawlsiate-a’ dingin thu na ngetsak un,” (Matt 5:44). Sawltak Paul in, “Tua ahih ciangin Lai Siangtho sungah, “Na galte uh a gil a kial leh an na pia un. A dang a taak leh tui na pia un. Tua bangin na gamtat uh leh amaute’ maizumna dingin a bawl na hi uh hi,” ci-in a kigelh bangin gamtazaw un. Tua ahih manin gitlohna kizosak kei un la, a pha gamtatna tawh gitlohnate a zo na hi ta un,” (Rom 12:20-21).

Thu tawpna ah Dorothy M. Baxter in violin la a gelh tawh ka zo nuam hi:

• Violin a lui mahmah lim leh mel zong a nei nawn lo
• Mun mial sunga vankawm lakah kikoih cip hi
• A guite tan khin a, a guihekna khempeuh zong kia khin hi
• Zatkik theih lai ding hiam aw, kum tampi zat lohpi
• Ni khat Topa in tua violin hong la khia a
• Damdamin a tunga leivui, paankaite nulkhia hi
• A guite bulh kikin, a heknate bulhpha kik a
• A tumna tawh a gui kikangte tung hong nawt hi
• Kum tampi zatloh violin ging kilawm mahmah
• A kim a kianga mite bil sungah bang zah zaknop hiam?
• Tu’n nuntakna kisia, kitam, kinusia khat peuhpeuh
• Mun mial mun nin sungah zat nawn loh in a om zongin
• Zatkik theih, puahkik theih ding cih ka thei hi
• Vantung Topa leh Kumpipa in a liamsa a khut tawh
• Hong zuut hong zuun a siasa kimanna omlo ka nunna
• Ama khut in damsak bawlpha ging kilawm la sa
• Ama sihna tawh tawntung nuntakna hong pia
• Si nawnlo ding, lungdamna tawh kidim den ding
• Ama khutah ka kipiak khit taktak ciangin
• Ka nuntakna ging kilawm penpen hong suak hi.

Rev. Dr. J.M. Ngul Khan Pau