Gmail ih zatsiam hiam? Gmail Program Policy

Gmail ih zatsiam hiam? Gmail Program Policy

Leitungbup in Gmail Service nuamtakin a zattheih nadingin Service amawkna in apiapen Search Engine minthang mahmah Google Company te ahi uhhi. Company lianpikhat ahih mahbangun Gmail azangte zuihding thukhun, thukham zong kiciantak mahin naneipah uhhi. Gmail pen amawkna in Service apiakuh ahih mahbangin mimal khatciatin ei utbangciat in ki phengzatgawp theilo a, amau thukhun tawh kituakin ihzatsiamding kisam hi.

Amasa in theihding a thupi mahmah khatah na Gmail pen kha 9 sungin khatveizong nazat keileh, na Login keileh Google te’n na Account pen naphiatsak (Terminate) sakding cih “Account Inactivity” sungah kiciantak in suaksak uhhi. Adang Free Email Service apia Company te sangin ahun sauzaw veve a, tuciangciang kumkhatval Login ngeiloh hangzong Google te’n ongna Terminate saktakpi samlotawh kibang hi. Ahihhang a thukhun khatuh ahih mahbangin zuihkeileh lauhuai cihding hipah hi.

Gmail Program Policies sungpan thukhun tampi aneihlak ah hih anuai ateng ei Zomi te omzia, gamtatzia tawh etkakding in kong letkhiapak uhhi.

• CAN-SPAM Act tawh kituaklo Commercial Email te khahkhia loding
• Midang khatpeuh kineih, minsel tuamtuam zangin email khakkhia loding
• Midang khatpeuh phinna, kona, gensiatna dingin Gmail Account bawlloding
• Midangte email address tuamtuam kaihkhopna (data maning) dingin zangloding
• Group, Mailing List tuamtuampan email ongkhak nawnken kici taleh khakteitei loding
• Mikhatpeuh minsia, mindaisak nading leh kampau kilawmlo zangin email khakloding
• Gmail Account tampi bawlin midang kiangah zuaksawn loding

CAN-SPAM cihpen “Controlling the Assault of Non-Solicited Pornography And Marketing Act” pan amasa malkhatta aki tomlakna ahihi. 2003 kumin President George W. Bush in thukham khatin ana kipsak ahihi.

Ei Zomi sungah Yahoogroup leh Googlegroup tawh kibuai mahmahlai a, pawlkhat Group makaite’n email amuh peuhpeuh uh naguansak pahpah ahih manin mipi nawngkaisak mahmah uhhi. Ataktak in tuabangin a gamtate pen a gilonuam hileng a Group bawlkhiatna Google ahih keileh Yahoo te kiangah kikhia, ki Complain tothei hi. Tuni ciangciang Zomi te aki thudiklua hiam, aki theilo hizawhiam tuabangin akikhia omnai losam hileng kilawm hi.

Group mail sungah mikhatpeuh kona, gensiat nadingin Gmail azangte zong Google te tungah kikhiathei hi. Zomi Group sungte ah makai ihmuanpian pawlkhat bangin email id tuamtuamtawh midang khatpeuh onggensiatgawp uhciangin ih koilaihiamkhat na navelval theihi. Amau mimal khualnatawh genkhiatdinglah kilawmsamlo cihdan omthei ahih manin, Group sungah midangte akoko tezong kidopding ihdeihsak hi.

Nungdeuh in Irrawaddy News sungah agelhkhiat thuthak khatah Kawlgam sungah Gmail Account ihdeih, ihbawlnop leh sumpiakkul cihkhat ihza ngeiding hi. Tuabangin sumla in Gmail abawlsak tezong Google te’n theileh nakzakdah mahmahding uh a, Account uhzong suksiatsakpah khading uhhi.

Adiakdiak in ka Gmail ki hongthei nawnkei, ka Google Account ongki Disabled sak, ongki Suspend sak cihtepen ataktak in ei azangte gitnatloh manzong nahi gige theihi. Na Gmail aki zattheihlohma anunung pen nazatlai-in bangcizat nahiam cih hoihtak naki ngaihsun kik in. Gmail thukhun aommah bangin amau deihloh in a gamtate pen Warning piathei uh a, ahihhang dik asak hetkei vualeh na Account pen dinkhawlsak (Suspend), ongphiatmaisak (Terminate) thei uhhi.

Hih atung ateng banah Gmail azang User te’n ihzuihding thukhun tampi omlai hi. Tua thukhunteng avekin Manglai tawh simtheihding inzong hih anuai a Gmail Program Policies link ah kiciantak in gelhdimdiam uhhi. http://www.google.com/mail

A hunhun in a Policy uh kikhel, kibehlap theizel ahih manin, atung a link panin nasim zelzel un. Zomi te Gmail zatsiamding hanciamni. ZD Sawltak #zomidaily