Germany ah mawtaw khatin mipi ommuang laitak phulgawp in mi 1 si

Germany ah mawtaw khatin mipi ommuang laitak phulgawp in mi 1 si

Germany, Heidelberg khusung mohbawlna Bakery maikhat ah pasal khatin mipi ommuang laitak mawtaw tawh phulpheigawp ahih manin, mi 1 si cih AFP pan kiza hi. Tua asi pen kum 73 aphakhin, German gammi khat hi a, nakliamlua ahih manin zato kipuak a, zato ah asi ahihi.

Saturday (Feb 25) ni in thupiang hi a, German Police te genkhiatna ah kum 32 aphakhin Austrian gammi pasal khatleh kum 29 aphakhin Bosnia leh Herzegovina gammi numei khatzong liam uh a, zato kipuak cihi.

Spokesman David Faulhaber in hihpen hiamtatna Terrorist Background hiloding in ki ummawh cihi. Ahi zongin banghangin hihbangin gamta hiam cihpen genkhia ciantheilo hi.

German Daily Bild te’n tua mawtaw hawlpa pen alungsim manlo Psychiatric khat hiding ci uh a, ahi zongin kumpi thunei lampan in bangmah genkhiatna neilo uh cihi.

Police te’n Statement akhahkhiatna ah tua mawtaw hawlpa pen mipi ommuangteng aphulgawp khitciangin mawtaw tungpan temta khat tawikawmsa in tuakkhia a, Swimming Pool omna lamah paiphei cihi.

Tuapan in agei aom mipi te huhna palik te’n aomna theikhia uh a, thautawh kap in manzo uhhi. Palik te’n thautawh akapna pen liamngawh ahih manin Heidelberg aom zato khatah kikemphot hi.

Tua mawtaw hawlpa pen German gammi khangno khat hi a, Traffic Light ah meisa ngakin akhawl cihi. Mei a en ciangin mawtaw nakpitak in hatsakgawp in, mipi omna aphulphei kici hi.

More: Germany Christmas Market khat mawtawpi in phulphei, mi 12 si, 48 liam

Nungkum December khasung inzong Germany gamsung aom Christmas Market khatah Tunisian gammi khatin mawtaw golpi khattawh mipi ommuanglai phulpheigawp a, mi 12 takin sihlawh hi. Tuakhitzawh Germany kumpi thunei te pen tuabang ngongtatna aomkhakding aki gingsa in omgigeden uhhi. ZD Sawltak #zomidaily