Germany gamah a lungzuanhuai sihna: Pu Cin Khan Thang (Mauvom, kum 76)

Germany gamah a lungzuanhuai sihna: Pu Cin Khan Thang (Mauvom, kum 76)

PU D. CIN KHAN THANG (1943-2019)
Tonzang gam Mauvom khua ah piang, 1963-1965 Kawlgam galkap Navy sem, 1966 kumin Yangon America Embassy ah nasep ngah, 1967 kumin Thailand gam Bangkok pai, Kum 1969 in Thailand nungak Lia Khomkhai tawh kiteng 1970 may kha in tanu Lia Niang Hau Cing nei, 1991 kum in a tanu in bangkok University ah B.A. zo hi. (Bangkok pan Germany a tun kum ong gen napi ciamteh kha kei mawk ing) 1988 kumin Germany gammi suahna ngah, Hamburg khuapi ah teng. “Pu Vum Son tawh Zomi thu kan khawm gelh khawm ung” ong ci hi.

Ka Pu Thang tawh kimu dingin Dr. Khai (Ciin Sian Khai) in hong makaih hi. Damlohna hangin a khe na zaw mawk ahih manin a lupna pan kongkhak ciang hong tun ding sawtveipi kingak kha hi. Amah tawh tomno sung ka holim thei uh a, kei suah main Zogam pan paikhia khin ahih manin ka kimuh cilna uh leh ka kimuh tawpna uh ahi hi.

ZOMI THU NA KIN MAHMAH
Zomite tangthu a kan teng leh Zolai malgawm zia, Zolai pan Manglai dictionary a bawlna thu hong gen hi. A computer bang a lui pha mahmahte na zang bilbel. Leng (wheelchair) tung panin lai tampi gelh hi. Tuate tun kuan a kem diam maw, ken lah copy kha lo sawnsawn.

LUNGLEN HUAI MAHMAH
Germany gam a pai ding ciangin Thaigam pan Pi Khomkhai leh Lia Niang Hau Cing in zui nuamlo uh ahih manin Germany nungak khat tawh kiteng kik a Germany pi in sihsan baih sese hi. A don a kem ding omlo ahih manin Germany kumpi huhna bel ngah hi. Gamdang ci a i ut mahmah hangin ka Pu Thang ka muh ciangin lunglen huai ka sa mahmah hi.

GAMDANG A OMTE ADINGIN
Topa thupha tawh gam 50 bangah i om ta hi. I omna mun peuhpeuh, Zomi kipawlna tuamtuamte i theihsak hamtang ding, Zomi tamna munte i zuat ding, inn lam tawh kithuza tangtang leng cih ka Pu Thang hun tawp lam nuntakna ka muhna tungtawnin ka phawk thu ahi hi.

A LAITAH LAITAKIN
26.8.2019 (Monday) ni a hun tawpna a laitah laitakin bangteng a sialsial mawk tam maw…. cih peuh ka lungngaih kawmin ka Pu Thang tawh ka maante uh tawm ong koih ing ei lawmte. Sia Do Khup