Malaysia Genting Highlands pan aciahsuk Bus golpikhat tuahsia, mi 23 liam

Malaysia Genting Highlands pan aciahsuk Bus golpikhat tuahsia, mi 23 liam

Malaysia, Genting Highlands mualdawn panin aciahsuk Bus golpikhat tuni Friday nitaklam in tuahsia cih kiza hi. Tua Bus tuahsiatna hangin asi omsamlo a, ahi zongin mi 23 takin liamlawh uhhi.

Genting Highlands – Kuala Lumpur lamzikpi tungaom Km 17.3 ah nitaklam 7:15pm hunpawl in atuahsia ahihi. Tua Bus golpi in adang mawtawneu Honda Accord khat phukha masa in, tuapanin tuahsiatna akipan hiding in ki ummawh hi.

Atuahsia tepen Bus tungah atuang mi 18 leh Honda Accord tungah atuang mi 5 te ahihi. Bus tungah atuang aliamte lakah mi 16 tepen Chinese Tourists vive hi uh a, adang mi 2 aliamte pen Bus Driver leh Tour Guide ahihi.

Hih tuahsiatna hangin aliam khempeuh zatui Treatment kibawlding in Selayang Hospital ah kipuaksak uhhi.

Hihvai tawh kisai in Pahang Fire and Rescue Department deputy director Mohd Sani Harun in agenna ah nitaklam 7:24pm hunpawl in tuahsiatna om cih Distress Call hongki zasak cihi. Tuaciangin Genting Fire Station panin honkhatin ahuhding in gelhpah uhhi.

Tua atuahsia Bus pen Genting Highlands panin aciahsuklam ahihi. Genting Highlands aom Hotel khatpain Chinese Tourists vive puasuk in, Subang Jaya zuanin aciahsuk ahihi.

More: Malaysia Genting Highland paina Cable Car kialo hi

Bus in Honda Accord pen aphukha masa hiding kici a, anunglam aphutsak khiticiangin lamzikpi adalna Divider phukhiaphei hi. Lamzikpi akhanglam kendang ah kiasuk suaklo ahih manin, phadawmlai cihding ahihi. Sawltak #zomidaily