Gengen sasa gelhgelh piakpiaklai dingmah hizaw – 2

Gengen sasa gelhgelh piakpiaklai dingmah hizaw – 2

Nunga ka gelhsa maban ong zomkik laidih ning. Tulai thu kisuah tuamtuamte leh Pawi ki bawl tuamtaumte I sim I zak ciangin Zogam leh Zomite khantoh nading, I gengen I saksak, I gelhgelh I piakpiak mah kullai cih hong phawksak semsem hi.

La tawh kisai: Ka theih khialh kei leh Zogam le Zomi itna La mipih theih dinga hong hawmkhia, hong sakhia masa Lengtong Pauno leh a lawmte hiding uh hi. Tua ma aom leh hong hilh dih un theinuam hang. Zogam, Zomi mah ci-in la tawh hong phuak hongsa in a khui tawh hong hawmkhiat uhteh I minam Zomi I hihlam hong theisak a, khangnote lungsim sungah kuamah theipih luat kholloh dingin minam itna khaici hong tuhtuh uh na hi gige hi.

Lengtong Pauno, TS.Khai, Zogam Lalpu, Esther Cingsan, V. Siampu, Lian Lun Cing, Cing Thian Ngai, Thawn Kham, Zam Dal, Sangpi, JK Kam leh lasiam tuamtuam te’ Zogam Zomi itna la aphuah uh, asak uh ka zakteh Zomi ka hihlam ka kitel semsem a, Zogam ah kapian khak, Zogam ah ka khankhiat, Zogam a ithuai dan leh Zomi ka hih kanuam semsem hi.

Topa Zeisu hong piankhiat ma kum 700 kim lai-in aki gen kholhkholh bangin Zogam leitang ngah kik nading leh Zomite pumkhat suak kik a, a khantoh ding, hong theisak kholkhol, lam hong hilh kholkhol in ka ngaihsun hi. Tulai khangthak Hip-hop lasiam te’n zong Zogam leh Zomi itna a awtawh kizui in hong sak uhteh thupi kasa peuhmah hi.

Laigelh tawh kisai: Zogam Zomi itna laigelh tawh kisai mi dangte theih dingin agelh masa kikan leh Rev. ST. Hau Go, Dr. Vumson, Rev. Khup Za Go, Rev. Dr. JM Paupu, Rev. Dr. GK Nang, Pu. Chin Sian Thang, Prof. C. Thang Za Tuan, Dr. Dal Lian te ki helkha pel mawh dingin ka lamen hi. Tualo zong mi pawlkhat omthamlai ding hi. Dr. Hau Za Cin in zong a laibu bawl Ka Laikung Panin cih laibu sungah Zogam leh Zomi itna thu hoih nono gelh in simnuam mahmah a, khanei leng maw, Zogam ah lengnuamsing aci honkhat bang ki omliang leh ki lawm hi.

Zogam leh Zomi te thu I kanteh hihte lai gelhte in tampi hong huhdinga, manpha kasa semsem hi. A gelh lai tak un sum met bawl nading bangin ngaihsun le uh gelhtak, bawltak sa hetlo ding uh hi. A lai bawlte uh leh a nasepna te uh ah min dang zang’ le uh sum tam ngahthei zawkhamai dinguh hi. Ahi zongin sum le pai tawh minam khek sawmlo, zuaksawmlo uh ahih manin etteh tak kasa hi. Leitung mun tuamtuam aom Zomite khat le khat thu kizak nading, hong vaihawmkhia masa U.Gin Mang (ZONET PU) leh a lawmte a kipan Zomi min tawh Zomite khantoh nadinga Media lam nasemte maban zong ettehhuai cinhuai kasa hi.

Piakkhiatna tawh kisai: Ka theihpih het loh gam le minam a dingin a piakhia mi ka theih sangin tamzaw khading hi. Tua bang kawmkal ah tunai diak in thupi kasak gige LZI, GZA, ZYA,ZNC/ZCD leh ki pawkna tuamtuamte vaihawm siamna tawh tukum I minambup a dingin Census vai ah na hong sepkhop uhteh a semte thupi kasak na leh a piakhiate thupi kasakna ki bang hi. Sum le pai tha le ngal a piakhia tuak uh himawk a, piakkhiatna lam-ah a thupi pen pawl hiding in ka um mawh hi.

Nungkum in WZC te makaihna tawh Zogam leitang sunga aman pha mahmah Zomi te vokpi vak-a, a kumza banga hong vakzo dinga aki ummawh Gullu Mual vai a, lungkim lohna lak-in sum le pai tha le ngaltawh aki piakhiate zong thupi kasa mahmah hi. Tuaban ah Zogam leitang sun le zan cilo a, thosi thovai nuai ah acing, akem ZRO/A sunga nasemte ki piakkhiat dan zong piakkhiatna lam-ah a thupi pen pawl, alian mahmah pawl hiding hi. Hici bang thute ka ngaihsutteh Zogam le Zomite khantoh nading in gen akul, sak akul, gelh akul, ki piakkhiat akul ahih lam ka phawk semsem hi.

I gam leh I minam phat tuamna dingin a gengen a sasa, a gelhgelh, a piapia aki talawilo dingin Topa’ Zomite thupha hong piaden leh ka ut mahmah hi. Tua dingin Zomite kiging den dihni. Zogam le Zomi in nang hong kisam den hi. Khaibawi