Gautama Buddha in Saipi & Mittaw mi 6 te thu agenna

Gautama Buddha in Saipi & Mittaw mi 6 te thu agenna

U leh Naute, Gautama Buddha in, nui hieuhiau kawmsa in mittaw (blind men) mi 6te thu (Pawl khat in mittaw mi 5 hi ci) a genna Buddhist te Lai Siangtho Tipitaka sungah nihvei ki gelh hi. Canki Sutta leh Udana Buddhist Lai Siangtho (68-69) ah Buddha in mittaw mi 6 te kam kinialna leh kitotna thu thugentehna (parable) in na zang hi.

A thu in anuai a bang ahi hi: Mittaw mi 6te’n Saipi (elephant) lawng /khoih ciat uh hi. Tua khit ciangin, tua saipi amuh bang/ a theihbang ciatuh gen in, khat leh khat kam kinialin, amau lawnkhak, theihkhak pen bekmah, aman pen, a dikpen dan khatin, pau kangkang ciat uh hi. Kuamah ki thu simloin, amau muhdan ciat genin hong pau zelzul uh hi. Kitawng kisel uh ahihman un, a tawpna ah kumpipa kiangah, thu khen dingin, mittaw mi 6 te pai uh hi. Kumpi pa’n hih mite amuh ciangin:

“Hoih hi, saipi mu ngei na hi uh hiam? Saipi bang tawh kibang hiam cih hong gen un” ci hi. Mittawte khat khit khat in, saipi atheihzia ciat uh, kumpi pa kiangah lawptakin genciat uha, amau theihdanciat aman pen ding keek bangin kingaihsun ciatuh ahih manun, lungmuang takin kumpipa mai ah pauin, ciak lualua geuh uh hi. Tun ahih leh, ka thuma’nna, kumpipa’n hong telding hita ci in, nuamkawm, lawpkawmsa in, thu genciat uh hi.

1. Mittaw khatna pa‘ Saipi muhzia/ telzia

Hih pa‘n saipi lutang (head) saipi bil (ear) na lawngkha ahih man in, kumpipa kiangah,“Saipi ih cih pen beel (pot) a hih kei leh lawhkhai (basket) tawh ki bang hi” ci hi.

2. Mittaw nihna pa’ Saipi muhzia/telzia

Hih pa’n saipi ii “hapaak” (tusk) a lawnsakpa a hihmanin, “Saipi ih cih in siam gatna ciampeek tawh kibang hi” ci hi.

3. Mittaw thumna pa’ Saipi muhzia/telzia

Hih pa’n saipi pumpi (body) a lawnsakpa ahihmanin,“Saipi ih cih in ankholna zeempi/ buh beempi tawh kibang hi” ci hi.

4. Mittaw lina pa’ Saipi muhzia/telzia

Hih pa, saipi khe (foot) a lawnsakpa ahihman in,“Saipi ih cih in amuan huai mahmaha, akiphut, khuampi (pillar) tawh kibang hi” ci hi.

5. Mittaw ngana pa’ Saipi muhzia/telzia

Hih pa’n saipi nung (back) teng na lawnsak ahih manin, “Saipi ih cih in lawhkhukpi tawh kibang hi” ci hi.

6. Mittaw gukna pa’ Saipi muhzia/telzia

Hih pa’n saipi mei (tail) leh saipi meidawn (tip of the tail) a lawnsakpa ahih mah bangin, kisungsialo, kisuanglo takin, “Lawmte aw, no theikei ve uh teh, na gente uh man vet kei, Saipi ih cih tua bang hi zenzen lo ee” ci khaukhau kawmsa in, “Hong gen ning ei, thuma’n na theihnop taktak uh leh” ci in, “Saipi ih cih in an huanna “buhtei” a hih kei leh, sianthosakna a kizang “brush” tawh kibang hi” ci in, kumpipa tungah gen khia hi.

Hih mittaw mi 6 te’n amau theih leh amau muhzia pen, adik pen, aman pen ding kisa in a omlaitak un, kumpipa’n, amaute kiangah “Na gen khempeuh uh a man/ a dik vive ahi hi. Khat beek a kipelh a om kei hi” ci hi. Tua khit ciangin Gautama Buddha in athugen zomlai a, “hih mittaw mi 6 te’n amau muhna bek a dik/ aman sa uh ahih manun, kitotna, kam kinialna (quarreling) apiang ahi hi. A taktak in cileng, tua banga amuhnaciat uh, a gente uh pen, Saipi ih hihna vive a gengen uh ahi hi” ci-in a thu gen khup hi.

Network sunga, Pasian thu ki kupna te ih ngaihsut ciangin, Jesuh bek aci tawh, Pa, Tapa, Kha Siangtho a ci tawh, Sabbath thu a gentawh, Lai Siangtho bulphuhlo in agen khat zong omlo uh ahihna ih thei hi. A kigen thute, Lai Siangtho sunga, aomlo khat beek aom kei hi. Gautama Buddha in gentehna a, a zat mittaw mi 6 te bangin, Kumpipa kiang ah thu khensak ding in, atung hi leng, Kumpi pa’n, “na genteng uh a vekpi in, a diklo/ amanlo omlo hi. Na gen khempeuh uh Lai Siangtho sungah om hi a, Pasian hihna (Saipi hihna mittaw 6 ten a genbang un) vive a gen na hi uh hi” hong cih pelmawh dingin ka ngaihsun hi. C. S. Khai (Universität Hamburg, Hamburg, Germany) December 18, 2014

We all come into the world but once; If there is anything I can do for my fellow creatures, let me do it now; Let me not defer nor delay, for I shall not come this way again.