Ganhing na ngawn in a pianna amun agam ngai ~ Khaineu Hatlangh

Ganhing na ngawn in a pianna amun agam ngai ~ Khaineu Hatlangh

Geese ii cih “Kanglai” te pen leitung munkhat pan munkhat ah a lal kawikawi vasa lamdang namkhat hi.Ahatna (speed) uh pen 50km/hr bang in pi 3,000-10,000 bang a sanna mun ah lengzo uhhi.

Hih vasa nam te pen khuadam na gam ahi Canada, Siberia cih te ah tampha deuh hi. Tuuk hun an tam hun in amau gam ahi khuadam na gam ah nuamtak in teeng uh khuasa uh hi. Ahi zongin phalbi (winter) hun ciangin mun nuam zaw an tam na mun zongin leng kawikawi uh aa Canada Geese te pen South America lam zuan in lal (migrate) uh aa, Siberia Geese te pen Asia lam zuan in lal aa, a diakdiak in India ah tam hong lal thei pha deuh uh hi.

Hih Kaanglai (geese) te hi bang aa tai (mile) tampi bang ci bangin leng zo uh aa, sun leh zan cilo in khawllo in lengzo uh hiam cih lam dang mahmah hi. Kaanglai a lal (migrate) te a len uh ciang in “V” “U” lim in leeng uh aa amai ah khat leng masa in a lang tuak ah “V” lim in leng den zaw hamtang uhhi. Tembaw (ship) leh Vanleng te huih khauh leh tui lak a nawk zawh na ding un amai uh “V” shape aa ki bawl mah bangin hih vasa te zong “V” shape in leng uhhi.

Nai khat in tai 50 (50 miles per hour) aa leng ahih manun huih khauh a nawk dingin amai ah khat ki pia khia ngiat (commitment) aa, tua amai aa agim ciangin anung pen aa tawh ki laih in amai aa pen anung pai kik in huih dam zui anung aa pen huihkhauh nawk dingin amai ah hong pai in amun uh ki laih kik uhhi.

Tua bangin khat le khat ki telsiam in ki panpih diamdiam uhhi. Tua ahih manin gamla pipi tai tul gamla lengzo uh aa antam na mun leh nunnop na gam zongin ki hei diamdiam uh aa lal kawikawi (migrate) zel uhhi. Ahi zongin a lal na mun te ah an tam in nuam mah ta se leh khua hun ki khelna tawh ki zui in a pianna gam uh mun leh mual te iit in ngai uhhi.

Tua ahih manin tai tul tampi ki gamla tuipi gal ah om mah ta se le uh a haksa lampi te nawk kik iin a gam a lei a pianna mah uh ciah kik tantan uhhi. Ei Zomi te zong, hih vasa te bangin mun nuam, gam nuam leh an leh tui baihna zongin leitung langkha tuipi gal ah ki zin in nuntakna zongin ki lal kawikawi hi.

Kipumkhat in ii len khop liailiai kei leh asang na mun ii tun laitak in huih in hong nawk khia kha ding aa amai aa ahaksa phu te anung a te in huh in khat leh khat ki it siam ding thupi hi. Hih vasa te mah bangin ii mun leh mual ii pianna gam leh tui mah iit in ii zuun tek ding zong thupi mahmah ka sa hi. “A keu thilthial pianna Zogam in nang leh kei hong ngak den hi” Khaineu Hatlangh