Gammite a it mahmah kumpipa

Gammite a it mahmah kumpipa

Gam khat om in, tua gam ah ni khat guah hongzu hi. Tua guah pen kumpipa in a gammite kiang ah “Hih guah, kuamah in dawnkha kei un! Na dawn uh leh hai ding hi uh teh” ci in hoihtak in a gensa a hihi. Tua guah pen guah mawkmawk hilo in dawnleng a kihai ding a hihi.

A gammite in kumpipa thugenna manglo in tua guah hong dawnsim teitei uhi. A gammite khat khit khat in tua guahtui hong dawn uh a, a vek un hong hai mang uhi. Kumpipa bek in tua guahtui a dawnlo hong hihi. Gammite pen guahtui dawnin hai mang uh ahihman in, guahtui a dawnlo kumpipa a muh uh ciang, a omdan, a paudante haisa mahmah uhi. Banghang hiam cih leh gammi khempeuh a hai vive a hihman un kumpipa gantat zia tawh kibang thei ngiatlo hi.

Kumpipa in a gammite it mahmah a thu hilh in, a makaih nop hang, a gammite in a kumpipa uh hai sa lua in hong kogawp uhi. A kumpipa uh a hihlam zong theilo uhi. Mihai khat a mawk paupau bang in ngaihsun lel uh in, a thugente zong hong mangnuam nawn ngiatlo uhi. Kumpipa pen a gammite tawh thukikum theilo in, zong hong kikhawl khawm thei nawnlo hi.

Tua leh kumpipa zong alung hongkham mahmah in acih nading zong thei nawn ngiatlo in hong om hi.

Kumpipa in a gammite om dante a muh ciang a lung gimlua a hihman in, aman zong tua Guahtui hong dawn vet hi.

Kumpipa in tua guahtui hong dawn leh a mah zong a gammite mah bangin hong hai pah hi. Tua ciangin a gammite in a kumpipa thugente hong mangnuam pah uh in, a kumpipa uh ahihlam zong a thei pan uhi. A kumpipa in hong sangthei pah uhhi. Tg Candle