Gamdang tung Zomite – 7 ~ Dr. Ngul Khan Pau

Gamdang tung Zomite – 7 ~ Rev. Dr. J.M. Ngul Khan Pau

Gamdang tung Zomite tawh kisai awlmawhna leh thapiakna zop tohtoh ding ka cih hangin tawlpi khat sung kong khawl hi. Tutungin gamdang mimal leh Pawlpi khat genna hi loin a huampi-in i kisap keima muhna tamlo kong hawmsawn nuam hi. Pasian huhna tawh a beisa kum sawmnih sung i tangthu kikhelna lamdang kasa hi. Sia Lang Do Khup gen na kawm leng, “Nidangin Kawlpi pan Tedim mawtaw tawh i pai ciangin mawtaw nungzui tangvalno a nung khawnga kiluai lenglengte tuni in US ah mawtaw hoihpipi tawh hong muakin hong kha ka muh ciangin i khang kilamdang cih ka phawk hi.”

America tungte bek kilamdang hi loin Malaysia, Australia, Singapore, Europe, Japan leh South Korea omte zong kilamdanna tampi om hi. Malaysia a siate khat in, “Inn lamah aksa nek ding haksa kisa mahmah a, hih lai ah bel haksa kisa nawn lo bek hi loin kikham lam hizaw hi,” ci hi. Mite khantohna manlang lua ahih manin eite zong tua huzap in hong nawkin eima dinmun tawh kituakin kikhangto hi. Tutung in awlmawh thu namli khawng gen khawm ni.

1. PHATNA LEH BIAKNA:

Phatna leh biakpiakna in Zomite biakna nuamsak mahmah ta hi cih i mu ciat uh hi. Biakpiakna sungah na lamdang zong piang a, damlo damna ngah ahi zongin, khamtheih guihtheih sung pan kikhelna zong om cih ka mu hi. Tua bang sung mahah kipuahphat nading ngaihsuthuai kasak om a, tamlo kong gelh hi. Tulai i biakpiakna sungah Pasian pahtawina sangin tua biakpiakna makaite peuh kipahtawina tamzaw hiam ka ci thei zel hi. Tua ciang, eima nopsakna “feeling” kizongin Pasian deihna kizong lo hiam cih zong ka ngaihsun hi. I biakpiakna hong makaih pawlte’n amau vai a zawh uh ciangin amau vai mankhin ta cih bangin amau phone khawng tawh buaipah zong ka mu thei hi. Pasian kammal kipulakna thudon lualo uh hi leh kilawm ka sa hi.

Biakpiakna pen “show-business” “siamna kilahna” bangin kizang kha thei hi. Assam gamah ah Rev. Dr. Gibson Marakte thugenna ah “Phatna leh Biakna” sunga kihel numei khat thugenna zawh ciangin ki-ap ding sapna a kibawl ciang, amah gulpi bangin bawkvak a, “kei dawi nupi ka hi, bang hangin kei hong buaisak ding hong pai na hi uh hiam?” ci-in thugenpa’ kiangah lamzuan hi. Amau thungetna tawh tua nu sung panin dawi hawlkhiatna nei uh hi. Lasa leh tumging tumte zong piangthak lo ki-om thei hi cih ka mu hi. Mite’ kahna panin ei zong khasia in kikap thei a, ahi zongin sunglam kilamdanna nei lopi hih ding lauhhuai lua hi.

Biak kikhop tawp ciangin tep leh muam zong zat ngei bangin zang, ahih hangin phatna leh biakna khawngah zong kilim hel mahmahte dinmun ngaihsuthuai kasa hi. Tua ciang Pawlpi khat leh khat phatna leh biakna khawng kidem hileng kilawm kasa hi. Biakpiakna thangah mahmah laitak makaite’n tumging leh otna tawh “salan late” hong sakpih thei uh hi. Salan late i sak theih manin khami hihna hi masa tuanlo hi. Khami hihna pen midangte mawhna maisak zo, midangte itna tak tawh khualna leh nuntakna siangtho zatna khawng ahi hi. Pawlpi dangte’n Topa’ vehna a ngah uh leh lungdampih thei-in, Jesu lungsim bang neite in khami hihna hi a, ei Pawlpi bek hat ding midangte thanem leh zong phamawhsak lohna khamitna hi loin hazatna hi.

2. PAWLPI KITAM DEUHDEUH:

Pawlpi phungcing mahmah pawlkhat lamet lohpi-in hong kikhen ciangin lamdang kasa hi. I tam pen zangsiam loin i tawm ciangin kituak thei pan hileng kilawm hi. Tukum Indianapolis ah i sanggam Falam leh Khalkha lamte biakinn Richard Lian in hong phakpih a, tutna 3000 bang kigual zihziah biakinn thum ka muh ciangin hampha kasa hi. Tua bang Pawlpite kem ding hileng keptak bek hi loin Mission, Lai Siangtho Sanginn vai leh cimawh huhna khawngah zeekcing mahmah ding ahih manin a nawkna khat peuhpeuh uh cihtak ding hi.

Pawlpi pawl khat pen upate ginat loh manin kisia om a, amau neihsa bangin Pawlpi hong kep uh ciangin, amau thu bekbek a pai dingin deihbawl uh hi. Tua pen Pawlpi hoih nading sangin upa khat leh nih thuneih nopman khawng hi nuam hi. Tua mah bangin sia kici kha thu vei vetlo, Lai Siangtho sangkahna bel na zo bilbel neih khawng zong thubaih lo hi. Leitung vai tawh Pawlpi kikep ding hi lo a, Kha Siangtho huhna bek tawh kikep ding hi. Siate pawlkhat in sum leh pai i sai luat ciangin sum thu tawh buai ki-om thei a, sum peuh mah ahih theih leh sumkem a tuam mah hipah leh deihhuai hi. Pawlpi sum pen lohkik ning cih tawh kizang kha thei a, lohkik sangin zat behlap tohtoh baih mahmah hi. A tawpna ah tua bang sum thelthangte hangin Pawlpi sung kisiatna om hi. Sum tawh kisai i buai ciangin kha thu-ah zong kithanem mahmah hi. Bang hang hiam cih leh Topa’n “to nih na nasem thei kei ding uh hi,” a cih thuman hi (Matt. 6:24).

Lai Siangtho sinna zo peuhpeuh zong Pastor ding hi khin tuan lo hi. Lai Siangtho sanginn khawngah laihilh dingin hoih mahmah ki-om a, sawltak nasepah muibun mahmah a ki-om bangin pastor ding zong ki-om hi. Kha letsong ngahna tawh kisai mahmah hi. Pawlpi cidam lai ei khuapih Lai Siangtho sinzo khat nasepna ngah ding deihsak manin Pawlpi kitap ding vaihawm loh hoih mahmah ding hi. Pawlpi pen Khris pumpi i cih leh tua pumpi kibalkham ding vaihawm pen adahhuai mahmah vaihawmna hi. Pasian nasemte pen “Pasian sapna” ngahte ahih ding hi. Union Biblical Seminary, India ah Bachelor of Divinity (BD) ka sim lai-un sangnaupang khat nitak a simtham a vakkhia den khat om hi. Student Union President ka sepsung (1984-85) ahih manin tuapa ka hopih hi. Amah Mikang innkuan khat in sum tawh huh ahih manin sum na buai het lo, zu khawng na dawn thei zel cih ka zak ciangin, “Pasian in hong sam takpi hiam, ahih kei leh hong sam lopi nang telkhial na hiam,” ka cih ka phawk kik hi. Sum in a sap, thuneih nopna in a sap, minthan nopna in a sap kitam lua in ka mu hi.

3. SUM VAI TAWH BUAI:

Tuhun lawhcing leh lawhsam kitehna khat ahih leh neih leh lam mite sangin neihzawk ding ahi hi. Bangladesh a thusinna pia dingin Dimnu tawh ka pai lai-un, “No kiangah makai lawhcing kicite hong gen un,” ka cih uh leh, “Makai lawhcing pen America tawh kizom, office lian pipi nei-in, laptop leh phone mantam penpente tawi, mawtaw hoih penpen nei, a office mai-ah amah kimuhpih nuam mi om tawntung ding… tuate hi,” hong ci uh hi. Ko zong, “Sawltak Paul no kiangah makai in hong om ding hileh a lawhcingte lakah pang kha lo ding aive maw,” ka ci uh hi. Lawhcing i tehna a maan loh manin tuhun ciangin sum leh pai hau mai ding cih thupi kisa a, zong a neite kizahtak hi.

Pasian nasemte sumbat tawh minsia kitam lua khin zo a, pawlkhat bang amau Pawlpi ah hunbit sem kawmkawmin gamdang panin khasum zong a ngah ki-om cih kaza ngei hi. Tuate pen gamdang kizoppihte’ kiangah amau missionary bangin hong ciah kik uh hi a, ei kiangah Pawlpi sia hong sem kawmkawmin gamdangte’ hunbit nasem zong ki-om kha hih tuak hi. Tua bek hi loin Pawlpi min tawh bank ah sum loan la-in Pawlpi neihsa leitang khawng bank ah khapna (mortgage) zong ki-om cih kaza hi. Pawlpi mahmah in zong sum nambat khatna ah i koih manin khamangthang mat sangin summuh ding i lungsim ah lianzaw khin zo hiam ka ci hi. Pasian thu sangin leitung thu in i lungsim hong zo khin zo a, manpha i sakte i nutsiat ding vive ahih ding lauhhuai hi.

Sum vai tawh buai i gen ciangin tulai Pasian thugente zong mite’n thugen dingin hong sap ciang, “kei nong sap ding uh leh sum hizah na kiging unla, nek leh tak, tunna giahna zong hih bangin nong zindo ding uh,” kici giapgiapta hiam ka ci hi. Kei zong evangelist in na zinzin khin ngei ka hih manin tunna giahna haksa pen ka tel mahmah hi. Ahi zongin Topa’ sawlna leh khamangthang lainatna hangin a kipai hizaw a, sumngah sumthalawh dingin kipai lo hi. Sum leh pai hong pia zo Pawlpi leh khua a om hangin hong pia zo lo ding zong na tam mahmah ding hi. Tua hi a, Pasian nasemte’n kei nong cial ding uh leh tuazah ka rate hi cih limlim i neih leh kilawm hetlo dingin ka mu hi. Leitung thu a pilna tawh mite’n a cial ngiatte uh ahih leh sum tuazah cih bikhiah nei leh zong phamawh lo hi. Gospel pen a khawnkhong a hong kipia ahih manin sumbawlna in i zat het loh ding deihhuai hi.

4. INN LEH MAWTAW:

Pasian thupha sangin inn leh mawtaw hoih nono i nei uh a, tua bang la thei dingin hamphatna i ngah lungdamhuai mahmah hi. Kisam kasak loh pawl khat ahih leh eima khasum tawh kituak hetlo mawtaw leh inn mantam mahmah i lak pen vangik kiguan i hih ciangin i kilunghihmawhpih hi. Zomite’n inn mah thupi bawl i hih manin i neih tawh kituak het lo inn-gawlpipi neih ding i hanciam uh hi. I lungsim ah nop ni dah ni a zat cing ding mah paulap in kinei hi. A taktakin nop ni dah ni zong a om thithe hi khollo ahih manin i sum leh pai tate’ laipilna zonna ding lam bang hanciampih in, inn leh lo sangin tua lam thupisak leng i mailam khuavakzaw ding hi. America a tun zawh uh kum 10 valkhin zo, ahih hang innsap sungah teng lai innkuan khat tawh ka kiho kha uh hi. Amau a tate uh sanginn hoih ah kahsak ahih manin inn la zo nai lo uh hi. Tate’ laisiamin President Award zong a ngah om uh hi. Tuate innsung ka et uh ciangin mailam inn hoih mahmah ah om ding cih ka mu thei hi.

Siate pawlkhat in Pawlpi mite foodstamps khawng siau dingin i paipih ciang, i mite mawtaw zat pen Foodstamps office a nasemte’ mawtaw sangin hoihzaw pek ahih manin nuam mello hi, ci thei uh hi. Tua mah bangin bawngsa semna semte khat in ama mawtaw zat pen a Mikang manager-pa mawtaw sangin a zahnih bangin mantamzaw in nuam mello hi, a cih kaza ngei hi. Mawtaw hoih a i kidem sangin tate sanginn hoih a kahsak kidem leng i mailam khantohna kineizaw ding hi. US a siate’ khat in, “Pawlpi upate khat summet tulsawm hong la a, mawtaw lei ding hong dong hi. Second hand mawtaw tulsawm mante hoih mahmah, ken zong tuate mah zang in,’ ka ci hi. Ama’n bang ngaihsun a hi diam, tulsawmguk man khat va la mawk,” ci hi. Leitung bup a lampi hoih penpen ah dollar tulsawmguk man mawtaw hawl dingte pen Company a CEO khawng hileh kilawm ding hi. Zumpi sung khawng a nasem nai lote adingin i mawtaw zatte sanglua mahmah hi.

Pawlkhat in mawtaw leh inn khawng kei thu hi, leizo lua ka hih manin nong genpih uh kisam kei, hong ci nuam zong om kha ding hi. Khantohna pen damdamin khangto leng to zaw a, thakhat a khantoh pen kipua zo lo thei hi. Lamka sumbuk bawl khat in, “Siapa no zong lai na sim uh ciangin, BA, MA na tun nadingun KG class, class I, II, III cih bangin na kahtoh mah bangun ko sumbawlte zong damdam a khangtote’n sumzek dan telzaw, Class I laivuanna zo pante’n BA sim sawm tawh kibang tam kasa hi,” ci hi. Hauhna zong thakhat thu a hauh pen kipua siam lo hi. Lamdawt tawn a hauh pen kisiatpih tamzaw hi. Tua hangin mihau masate’ tate zatui/zatang tawh buai tam a, a sih kei uh leh zong khamtheih zongsangte kepna phual ah om tam mahmah uh hi.

Inn leh mawtaw i gen lai-in genbeh dingin lungsim a hong om ahih leh, tuni a i inn lakte pen kum 30 sunga piak ding hi. Nu leh pa tua inn late tuzawh kum sawm khawngin hong pension leh khasim inn bill piak ding i tate’n hong piaksak nuam kei leh kum sawmthum ma-in tua inn bank in hong laksak ding lauhhuai kasa hi. I inn leite a teng masa pawlkhat inn hoihzaw a teng a om hangin pawlkhat inn bill pia zo nawn lo a, pusuak om kha dingin ka um hi. Tuni a ei min tawh i kep innte khang kizomin i neisuak takpi tam maw cih ngaihsuthuai hi. Pasian mah in hong vaihawmpih in, tate bek hi loin tute khawng tawh khang kizomin i tenna dingin zangkhawm thei leng lunggulhuai kasa hi.

THUKHUPNA: Tutung awlmawhna tawh kong gen thute mimal khat hiam, Pawlpi khat hiam cihnopna hilo in, ka lungsim ah a om zawh sawt, ka ki-ipip zawh sawtzo lua khin ahih manin hong gelhkhia ka hizaw hi. Paunak 9:8-9 sungah, “Mihaite thuhilh kei in; hong mudah ding uh hi. Mipilte thuhilh in; hong it ding uh hi. Mipilte thuhilh lecin, pil semsemna in nei ding a, thuman mite thuhilh lecin a thutheihna uh khang semsem ding hi,” ci hi. Ei tawh kituak a omleh kipuahphatna in zang ni; a kituah keileh thu theihna in zang ni. Topa in a sim u leh naute thupha hong pia hen. Rev. Dr. J.M. Ngul Khan Pau