Gam bangzahna ah na om hiam?

Gam bangzahna ah na om hiam?

Lam honglak Pasian (Late 37:23)

Topa in mi a lam pai nading lak a, am lungkim bangin a gamta pa a mah in a kip hi….

Tu hun ih teenna gam te pen gam nihna gam thumna cih bangin min ih vawh a, gam tuamtuam ah ih ki theh thaang hi. Hih tawh kisai in ki kupkhop dingin thuthum kong tel hi.

1. Pasian gelna hi
Egypt pan pai khia in, kamciamna leitang lam a zuan Israel te in, mihing lampanin Moses in amau te makaih uh cih theih ding ahih hangin, amau te pen Pasian in sun in meiipi, zan in meikhuampi tawh lam na lak hi.

Ih nuntakna ah mihing lam pan tupna le gelna cih om mah ding hi. Ahih hangin tuni hi ciang mun ah ih om na in, Pasian gelna ahi hi. Israel te in a hamsatna uh ahi saltan na panin suak ta nuam in, suahtaak ding ciang bekin ngaihsun kha ding uh hi. Ahih hang in Pasian in amaute’ suahtaak nading ciangbek gelna neilo in, koilam nga a’ koi lam pai ding cih a zuat nading mun zong gel sak hi. Tua in kam ciamna gam Canaan ahi hi.Moses gelna tawh ki makaih uh hi leh bangtan hiam khat bek hong hi kha dinga, ahih hangin Pasian gelna tawh ahih manin kamciam na gam lam hong manawh hi uh hi. Tua mah bangin eite zong, Pasian gelna tawh hibang din mun te ciang ah ih tung hi (Jer. 29:11).

2. Gamlui le gamthak ki lamdang (Deut.11:10)
Hih Pasian’ kamciamna leitang tawh kisai in Moses in Israel te nakpi takin thu na hilh hi. Tua in, a nusiat uh Egypt le a manawh uh Canaan pen kibanglo in aki lamdang ngiatna thu hi.

Amaute in, kamciamna gam lam zuan ih cih na ah eite in zong kamciamna gam bang mah in ngaihsun lehang, gam nihna gam thumna cihna gamte ah ih om ih tun laitakin ih gam ih lei, ih khua ih tui it-lo ngai-lo ih ki ci kei hi. Ahih hangin, hibang gam thak te ah ih tun ciangin ih nusiat gam lui pen bang hong hithei lo ding thu pawl khat hong om leh hong om thei ding ahih manin, ei mah mah pen gam thak nuntakna tawh kituak in ih hih theih pah ding ki sam hi.

Atom in gen leng, Egypt pen thatang suangin nasep na hi in, Canaan pen Pasian’ zia leh lamlahna bangin gamtat na hi. Ih cih nopna ah, Pasian ngiatin a makaih na gam cih hi.

3. Gamthak ah nuntak khuasat zia (Deut.11:11,12)

Ih ngaihsutna te pen tom lua cih bang hi tuan lo napi in, bangtan dinmun hiam khat ih tun ciangin adang khempeuh a senpi suak khin pah ding ki sa thei pah pah hi. Pasian’ kamciam na leitang pen, mual le guam te’ om na ci hi. Ih gen nopna in, mual sang te bangin nuntakna a sanhun om dinga, guamthuk bangin zong nuntak haksat hun om cih thu hi. Vai khempeuh hoih khin pah zuah zuah ding dan hih tuak lo hi. Ahih hangin, vangtung guahtui ngah na ci citciat hi. Pasian tung mah ki ngak theih ding thupi hi. Hih ciang lam hong lak khin ih Pasian in a tawp dongin hong kalsuan pih lai ding hi. Bang hang hiam cih leh tua leitang Canaan gam pen Pasian in akep leitang hi a, kum kipat pan kum bei dongin en tawn tung ci hi.

Conc: Tuhun ih kam zat te ah gam khatna, gam nihna, gam thumna(gampi) ci in ih lo a, ih leitung khuasat na, ih teen na gam sim na te ahi hi. Ih phawk tawngtung dingin kawlgam om te adingin, gam nihna a, om te ih hi a, hih malay bang (gampi ngakna)gam ciang tung te adingin gam thumna ih tung ahi hi. Gampi ci in gam thumna ih cih te adingin gam li na tung mite ih hi hi. Tua hi in, gam simna agual pai na enkik leng eite pen gam khatna ahi, ih Pa Pasian kiangpan in a khualzin a peemkhia te ih hi a, mihingte gam simna bangin ih gam ih lei ci in it mah mah in ih neih ih gam, zomite leitang tungah ih tung kik, ih ciah kik ding ci-in ih gen thei kei hi. Ahih hangin, gamli na dongin sim na ah gam khatna ahi ih Pasian kiang ah ih ciahkik ih tungkik thei pelmah ding hi. Jesu bek in Pa Pasian kiang leh a gam sung hong lut pih thei hi. Na paikhiatna ah ciah kik hamtang in.

PASIAN IN EITE LAM HONGLAK HI.

Sia Zam Suan Lang(Pastor)