Galkap ukna suhkhiat vai leh AA te paulo in aomna thu

Galkap ukna suhkhiat vai leh AA te paulo in aomna thu

Thuneihna a sutkhia galkapte hangin Myanmar gambup mipi so vengvung in a om laitak Rakhine gam AA te leh mipite dai khipkhep uh hi. Amaute muhna bel siang mahmah hi. A san hi ta leh a eng hi ta leh hong kisatna ciangduai pen kibang a, Rakhine mipite thuakna kilamdang lo hi, cih thu hi.

A beisa kum 5 sung tawntung thuneihna a ngah NLD kumpi ii lungkhauhna gu pen Rakhine mipite in na thuak khin uh hi. Gtn. Rakhine gam budget piak dan, Hluttaw ah thusunte kithal nial, Arakan National Party in zo ta leh 2008 thukhun paulamin Chief Minister pia nuam lo, cih bang thute hangin NLD leh Rakhine mipite kikal ah haksatna tampi om hi.

Hih haksatna tawh kisai-in NLD in cikmah hunin thuhoih zaw lampi zon ding sawm ngei lo hi. 2018 kum ciangin Arakan National Party Makaipi lui khat ahi Dr. Aye Maung pen gambup langpang, ci-in thulu tuamtuam bulhin gilbem kum tampi khumcip dingin man uh hi. NLD in paulap a zon hangin peng thei tuan lo hi.

NLD pen kumpi sem ahih manin ama mat hi lo, ci phial leh zong ama ngaihsutna a gen ding kilawm hi. A tawpna ah Galkapte mat hi, NLD thukimna hi lo hi, ci leh zong kingah hi napi kam khat beek pau lo hi. Hih thu hangin Rakhine minam makaite leh NLD kikal ah a kiphelkhia kik pak theilo thu kikai-awk kikhihbawk hong kipan hi.

Rakhine minam thautawite hong hat semsem uh ciangin gen ding hong tam semsem hi. AA sungah Galkap tul sawm thum val om ta uh hi. Infantry Division 8 val bangin kivaipua thei ta uh hi. Mipite muanna leh thapiakna zong adimletin, ngah cih ding hi. Kawlgalkapte in kha 3 sungin a zung pan long khia ding, ci-in tangko in a tha neih khempeuh tawh do cih tak do gawp a, ahi zongin kha 3 pan tu-in kum 2 hong cing ta hi napi AA te thahat semsem zawsop uh hi.

Hih kum 2 sungin kumpi a sem NLD in kalsuan khialhna lianpi nei hi, cih kitel hi. Galkapte gen khempeuh man maw man lo, cih a mutel thei lo Daw Aung San Suh Kyi in ama min ngiat tawh AA te a beisiang dong a zung pan long khia ding, ci-in thupia mawk hi. Human rights kipalsat tampi om ta leh kimuhmawh bawlin Kawlgalkapte tungah pahtawina khawng pia ziahziah lel hi.

Rakhine gam sungah inn tampi khua tampi mei tawh a kihaltum laitakin mipite hehpih huai mahmah hi, ci-in kam khat beek a pau ding kilawm napi pau lo hi. Tua bek tawh pha loin Rakhine minam thautawite pen mingongtatte (Terrorist) ci-in ciamteh in tangko sawnsawn hi. Gambup kilemna thu kigen ta leh zong AA te pampaih denin sam nuam ngei lo hi. 2019 sungin Kawl Galkapte leh AA kikal ah thuthak pawlkhat ging hiauhiau pian napi NLD in kumpi a sep laitak ahih manin kimuang gawp hi ding hi ven kizakmawh bawlin awlmawh se lo lel hi. (Rakhine State sungah hun sawtpi internet khapcipsak banah 2020 kiteelna bawl theih ding napi bawlsak loin mun tampi kinusiacip a, AA in kiteelna bawl dingin kun mah ta leh awlmawh tuan lo hi).

Tua bang teng tawh February 1, 2021 ni galkapte ukna suhkhiat ni gambup khuazingpi sung a tun ciangin Kawlmite sung pan gam makaite leh activist te in mualmi thautawi dangte sangin AA te mitsuanin gensiat kipan uh hi. AA bek hi loin Rakhine mipi limlim zong Galkap thuneihna suhkhiat vai so lua se loin dai khikhe pian ahih manin amau dinmun a tellote in lamdang a sak ding mah uh zong ahi hi.

Bang hangin Rakhine State ah Galkap deihlohna mipi in nasia takin lungpho lo uh ahi hiam? A dawnna ding pen kitel hi. Kum 60 val Kawl Galkap tawh kidona ah hun tomno sungin AA te zah a tangthu kilamdangsak zo thautawi kipawlna dang om lo hi. Lei lam, tui lam leh van lam cih bangin Kawl galkapte in a tha neih khempeuh tawh AA te do cih tak do uh hi. Ahi zongin AA galkapte giahphual a lak zawh uh ginatak om lo bek hi loin Kawl Galkap a bu a mang nangawn a sihna thu ki-imcip zo loin Kawl mipiten a zak uh ahi hi. Lamkhat panin Kawl galkapte pilna apia zo taktak pen AA te bek ahi hi.

Tu-in Kawl mipite a cihmawh uh ciangin a huh a panpih ding leh a koh a tai a belh theih ding uh pen Wah te leh KIA te sangin AA te hong lem zaw suak hi. A hang in biakna kibang ngeina leh tangthu mahmah zong kinai zaw uh hi. Wah te hi leh Sen minamte hi, cih theih hi a, KIA te hi leh Khristian ahih manin biakna vai-in belh ngam dingin tuat lo uh hi.

Galkap ukna suhkhiat vai ah AA te a om hithiat uh pen lamdang lo takpi hi. Ahi zongin mipite lungsim ah bel lamdang kisak tek ahi hi. Tuate sungah 88 lai a Makaipi khat ahi Ko Min Ko Naing cih bang makaipite kam nangawn pan AA mawhsakna hong gin ciangin bel ngaihsut ding hong om leuleu hi. Hoihna lam sangin siatna lam manawh zaw kha thei ding hi. Amaute ciangciang makai minthangte in hih bang thu a gen ding uh ciangin AA te dinmun leh siksan thute limphatak a kan masak ding uh kilawm hi.

AA te pau loin om khipkhep hi, cih mawhsakna ciang tawh thu a siang ding hi lo hi. “Kuakua kumpi kahin kuakua in nong pia vua nong pia kei uh zongin komau hinna ding leh komau thuneihna ding pen komau khut tawh ka sem khia ding uh hi,” cih thu pen AA te leh Rakhine mipi in kiptak len khin ta uh hi. NLD a kah zongin Galkap akah zongin kuakua akah zongin Rakhine mipite suahtakna ding leh ngimna tangtun nading pen AA in abanbanin semkhia toto lai ding ahi hi. Tua bangin a sem zo dingin zong thahatna nei ta uh hi.

Kammal dang khatin gen leng, “Kong piak uh leh bek ngah ding…” cih Kawlte ngaihsutna hunte bei khin ta ahi hi. Ahi zongin khuapi lam a om Kawlmite leh NLD mi pawlkhat in hih thu mutel nai lo uh hi. Ko gambup mipi vote a ngah hi ung, ko ukna leh vaihawmna nuai ah na om uh kul hi, cih bang muhnate a ngaihsut phat ding uh hun ta hi.

Galkap tha leh vanzat zong a kicing mahmah ta AA te in a tangkosa uh om bangin khua tampi mun tampi ah hausa leh khuatual upa makaite tawh thukimin na a sep zawh uh a kumin pai khin ta hi. Khuapi liante sung vaihawmnate cih loh mundang kivaihawmna pen AA te khutsung a tung khin ta ahi hi.

Rakhine te zingvai pen Rakhine te mah in a hawm ta uh ahi hi. Tunai tengin mawtaw lamlian dung teng khawngah AA te kimu kawikawi ta hi. Galkap ukna suhkhiat vai ah NLD in galkapte kiang pan thuneihna a lakkik zawhna dingin a kalsuanna mabante ah hih bang thute a ngaihsut theih ding kilawm mahmah hi. Moe Myint

(Midangte thuakna leh muhna zong theihpih ding deihna tawh Kawllai sim theilote adingin kong lehkhiat hi a, Kawllai sim theite adingin original kician zaw ding hi. Link pen comment ah).