Gal zawhna dingin pello a kisam thute ~ Khup Lian Thang

Gal zawhna dingin pello a kisam thute ~ Khup Lian Thang

Sun Tzu a kici, BC 6 pawl aa Sente mipil galkap mangpa in ,“Na galte kuate hi a, nang kua na hiam cih theisa in gal na do leh gal na zo pelmawh ding hi ci hi” ci hi. Galsim dingin na kipat ma in, na galte’ tha nemna tha khuahna, a siamna a siamlohna, galte om na leitang leh a khuahun cihte hoihtak in kankhol in na theihkholh a, tua tungtawn in galsim dingin na kigin nak leh na gualzo ding hi aci ahi h

Sun Tzu mah in, tua bangin galte or ei le ei ih ki theihna dingin, hoihtak in gelkholhna (Strategic Plan, Master Plan) ih neih theih na dingin makaite leh galkapmangte in thu bulpi 5 tawh hoihtak in etkak den dingin na gen hi.

• (1) The Moral Law – Makaite, mipite’ neih ahoih leh lampi man lungsim puakzia
• (2) Heaven- Pasian gelsa leitung khuahun zia te
• (3) Earth- Pasian bawlsa leitang kiphah zia te
• (4) The Commander- A pil a ciim, lungsim a tang, a hangsan leh a kician makai
• (5) Method and Discipline – Sepzia siamna leh hoihtak in kikhal zawhna,

cih bangin hih thu 5 hoihtak in khinkhai in tua tungtawn in gal a do te in gualzawhna ngah ding hi na ci hi.

A man lungsim puakzia ki guan (Moral law)

Galpi nihna lai in Germany te pen hong thahat mahmah in Europe gam khempeuh phial amau khut sungah a koih zo ding dinmun hong tung hi. A galvan neihna, a galkap mimal thahatna, a neih galvan te’ hoihna leh a thahatna cih te hangin leitung gamte khempeuh sangin galvai ah athahat pen gam khat suak uh hi. British gam bup mipi khempeuh leh a gam makai khempeuh zong pen Nazi Germany te hangin lauthawng mahmah uh hi. Tua hun laitak in a Prime Miniter pa ahi Neville Chamberlain pen a nunnem in, Germany tawh kilemna bawl ding alunggulh khat ahi hi.

Ahih hangin British te MP te, a gambup mipi te in Germany te kalsuanzia hangin lunghimawh uh a, amau tawh kilemna ih bawl hangin hunkhat teh hong sim veve ding ci-in lunghimawh in mipi te lungkia mahmah uh hi. Neville Chamberlain in a mipite lungmuanna leh lungkimna dingin nasem zo kisalo ahih manin amah khawl in, 10th May-1940 kum ciangin ama mun ah Winston Churchill in laih hi.

Churchill in makai hong sep ciangin Parliamnet ah thugen a “Ken ka hih leh ka gam leh ki minam aa dingin paik theih a dang neilo hing. Ka sisan, na sep hanciamna, ki khitui leh ka khua-ul bek kong pia zo ding hi” ci in, gam leh minam itna bulphuh in, Germany te khutnuai ah lut sangin luangkham ih sih dongin dong hi hang, ci ngiat in hangsan takin hong makaih hi. Tua bangin hong makaih ciangin a mipite, agam makaite, a galkap te sunga om a kuangmit sa hangsanna, lawpna, veina itna te hong guang kik zo in hong nosuak sak kik zo hi. Tua bang lawpna, hanciamna leh amakaipa’ makiahna ah citak tak in zui uh ahih manin, kua mah in zawh zawh dingin aki um zolo, Germany na zo uh hi.

Leitang kiphah zia leh khuahun ngeina (Heaven and Earth)

Hih galpi nihna kipat lam in Germany te in ama gam veng teng do ding, tua a zawh masiah pen nisuahna lam aa om Soviet Union tawh gal maitang hong nuamlo ahih manin, amau gam nih gal kido lohna dingin thukimna bawlpih hi. Germany te in a upmawh zah sangin a gam vengte khempeuh phial hun tomno sungin na zo dektak ta uh ahih manin, kuama upmawh loh laitak in nisuahna lam ah galmai thak hong kipan uh hi. 1941kum June kha pawl hi in, lam et hetloh laitak ahih man in Soviet Union te in kiging hun ding ngah manlo ahih manin, hun tomno sungin a gam tampi na la man uh hi. Soviet Union te khuapi ahi Mosco pan in 50 mile khawng bek a gamlatna tungta uh hi.

Ahih hangin phalbi hong tung ta in, khua hong votlua ahih manin Germany te’ galvanzat te, a motor sathau te khal mangin ki zang theilo hi. A thaupi te, a sikte votlua ahih manin ki zang theilo hi. A galkap te mahmah aa dingin a silh ding puan kicinglo, a zat ding khedap kicing lo, cih bang teng hangin cina luna in, lungkia gawp uh hi. Tua bang hangin Germany te in amai uh nawt zolo in, a hi limliam aa aom laitak in, leitang pianzia athei zaw Soviet Union galkap te in, kilom khat kik in manlang takin na leh nawt kik zo uh hi. Germany makaite in Soviet Union te phalpi khuahun lut hun, khau vot zia te a kisam zah in na awlmawh khalo uh ahih manin, tua hun aa kipan in damdam in Germany te gal lelh a kipanpan ta uh ahi hi.

A makaipa, galkap mang te makaih zia (The Commander)

Germany te in Soviet Union te khuapi Mosco pan phalpi hangin gal lel in a nungkin hangun, a dang galmaitang ahi, Soviet Union leitaw lam ah galzo veve lai uh hi. Germany te’ makaipi Hitler ngimna ah hih leitaw lam la zo dingin, tua mun ah sathau tam mahmah ahih manin galdo na dingin a kisam sathau khempeuh phial asik zo ding sathau khuk teng lak masak ding cih hi masa hi. Hitler in Mosco pan in a galkap te anung kinna hangin lungkim zolo ahih manin Soviet Union leitaw lam aa a khuapi khat ahi Stalingrad khuapi lak dingin a galkap mangte thupia hi. A taktak in tua khuapi pen Germany te’ kisap ahi sathau zong om lo a, tua khuapi a lakna hangin Germany te aa dingin tua hun lian laitak in kimanna bangmah a om lo hi ci-in ama galkap mangte in gen hi.

Ahih hangin Hitler in a galkap mangte’ngaihsut piakna sang lo-in ama ii thangpaihna bulphuh zaw hi. Stalingrad khuapi ala khin dektak himah taleh a langlam te in amau khua a mau leitang ahihna hangin gal maitang nawk zia na siamzaw uh ahih manin tua khuapi zong na la zo tuanlo uh hi. Hih bangin gallel in a nungkik ban vuah, a kisap mahmah ahi a sathau khuk zong lazo lo uh ahih manin sumh mahmah uh hi. Hitler in galvai ah a siam takpi ahi a galkap mangte’ genna ngai nuamlo, a ngaihsut piakna te asangthei lo bek thamlo in, lehtat zaw sawp ahih manin a guallel gawp uh ahi hi. Tua bangin makai hoihlo khat neikha uh ahih manin zumhuai takin galpi nihna ah Germany te in gualel uh hi. Ngimna hoih ngimna gina anei, a gam aa dingin itna deihsakna anei, ngaihsut piakna a sang thei makai hoih aki sam na hi zen hi.

Sepzia siamna leh kician tak-a ki khalna zawhna (Method and Discipline)

Germany galkap te pen sepzia galdo zia siam mahmah, kician mahmah, a etteh tak leh kikhal zawhna anei te in kiciam teh bilbel hi. Galkap sungah a ki-uk zia, aki pattah zia, cihte pen kician mahmah hi. Bek thamlo in gal asim zia, a gel a vaihawmzia te uh zong kician mahmah in kiciam teh hi. Tua hang mah in hun tomno sungin Europe gam teng phial a la khinzo dektak ahi hi. A mimal mahmah in zong citak ngiat uh a, a kipia vaipuak pen hanciam in manawt uh hi. Tua hang mah in zong Soviet Union tawh a ki dona ah Germany galkap te 1 million kim si in, a langah Soviet Union te 5 million bang a si in kiciam teh hi. Sepzia bawlsia siam in, mimal kim kician takin a kikhalna a neih zawh uh hangin atawpna ah pen Hitler dan makai khat aneih hang uh na hi zaw hi.

Hih a tunga Sun Tzu ii gen thu 5 teng hoihtak in gelkholhsep theihna dingiGal maitang ah galzawh na dingin akisam penpen ahi hoihtak in gelkholhna (Strategic Plannin, Master Planning) a bawlte bawlna in hunsaupi aa dingin gualzawhna guallelhna na kinga zaw veve hi.

Hoihtak khat vei ngaihsun kik ni

A diak in tulai Zomite in gamvai, minam vai, biakna pawlpi, kipawlna tuamtuam, sumbawl paaibawlna tuamtuam aa makaite’ aa dingin, hih a tunga thu 5 tungtawn in tampi ngaihsut ding thu hong musak hi.

1) A thupi penpen ah vaikhat thu le la khat peuhpeuh kalsuanna dingin ngimna hoih ngimna man leh gelkholhna (Strategic Planning, Master Planning) neih masak den ding kisam masa penpen hi.

2) Tua ngimna leh gelna atangtun theih na dingin ih mipihte tawh kizopna, ih nasem te tawh kizopna ahoih ding thupi mahmah hi. Mipi leh nasemte in lawptak leh lungkim tak in amau maban ciat ah kician takin vaipuak la in na a sep theihna dingin makaite in thapiak siam zolsiam ding thupi mahmah hi.

3) Ih ngimna ih deihna a tangtun nangin leitung khuahun luan zia, ih kim ih pamte’ kalsuanzia te tawh hoihtak in khinkhai kawm aa kalsuan theih ding pen pello in a kisam thu ahi hi.

4) Sepna kalsuanna ah sepzia bawlzia siamna zong pello in kisam hi. Tua sepzia bawlzia siamna pen citak takin kikhal zawhna in hong nungthuap loh phamawh hi.

5) Hih bangin a tunga paizia kalsuanzia ding nampi 4 teng pen galzawh na dingin pello a kisam thute ahi hi. Zomite in a tunga thu 4 lakpan thu 1 khawng om peuhleh a lem ding a gualzo ding or a gualzo khin kisa kha thei zel hi hang.

A tung a thu 4 teng khuituah kawmsa in deihsakna leh itna anei, tungsiah nuaisiah deidanna a neilo, a neu alian ii piak’ ngiahsutnate athupi bawl, a hangsan leh a kician Makai, Galhang makai khat in a makaih ahih nak leh, tua gamvai nasepna, minam vai nasepna, pawlpi kipawlna tuamtuam, innkuan sung ki makaihna cih te ah gualzawhna in pello in hong nungzuih ding hi. Lungdam, Khup Lian Thang Ref: The Art of War, Sun Tzu