Florida pan Thupuak (21 Sep 2015)

Florida pan Thupuak (21 Sep 2015)

1. MYANMAR CHRISTIAN CHURCHES FELLOWSHIP OF AMERICA CONFERENCE(MCCFA) KIZO

America gam Tulsa khuapi ah Myanmar Christian Church(MCC) Pawlpite innteek sepna tawh Myanmar Christian Churches Fellowship of America(MCCFA) kimuhkhoppina(Conference) September 16-17, 2015 sung thupitak leh picingtakin ki nei hi.

Hih kimuhkhoppina ah muntuamtuam leh state tuamtuam pan azahtaak huai Pasiannasem siapite leh Pawlpi makaipi te kihel theibek thamloin Florida State aom Myanmar Mission Church pawlpikem Sia Rev. Kham Do Thang(Sia Thangno) zong va ki hel thei hi-cih thu ki za hi.

Conference sungah tuhun aa pawlpi tampi ii phulkhak (Current Issues) tuamtuam-kumpi thu, khangnote thu, Upna thu leh Refugee te haksatna thu akipan adang thumanpha tampi kikumkhawm thei uh ahih manin akihel zin leh leengte thathak leh muhthakna tampi piang sak hi.

Topa Pasian in hih MCCFA kipawlna hong cidam sak, hong haksat semsem henla, ama minthan’na dingin hong zatsak ta hen ci-in, thu i nget sak hi.

2. REV. PAU KHAN KHUAL SOUTH FLORIDA AH

Tulaitak in kawlgam pan hong zin Sia Khual in South Florida lam aom pawlpite kiangah Pasian kammal tawh thupitak leh thalawptakin thapiakna hong nei hi.

September 13, 2015 (Sunday) nitak in Zomi Community Church(Fort Lauderdale) ah thapiakna nei thei in, tunitak September 20, 2015 nitak teh zong Myanmar Mission Church(Hollywood)pawlpi ah thapiakna nei leuleu ding hi-cih thumanpha ki za hi.

3. DAHPIHNA THU PULAAK

Myanmar Mission Church(MMC)pawlpimite ahi, Pa Tuang leh Nu Cia Maante ii maakpa- Pa Lang Cin Khai(Kum-30) in September 19, 2015 (Sunday) zingsang nai 7:30 pawl in kawlpi Zatopi ah sunglam damlohna tawh hong nusia hi cih thu ki za hi.

Pa Khaipu pen Muizawl khua Pa Kham Khan Hau leh a Nu Nuam Khawm Vungte ii tapa hi-in, Nu Ciin Ngaih Vung tawh tapasal thum nei hi. A luanghawm ki vui ding tawh kisai-in bangmah thu za kikna omnailo hi.

A nusiat ait mahmah azi, ata te teng, a nu, asanggam teng leh tanau meltheih akua maciat te tawh kong lungleng khuangaihpihna uh floridathupuak pan kong pulaak uh hi. Topa kiang pan hehnepna lianpi hong tung ta hen. Amen.

Thupuak,

Thupuak Tanute
Florida Thupuak
[email protected]
FLORIDA