English ~ Dr. Hau Za Cin

English ~ Dr. Hau Za Cin

Tan 10 ka zawh ciang DM College, Imphal zom dingin ka u Lian (Dr. S. Neng Ngaih Lian) in Lamka ah hong sam phei a, sang lut kik mateng Lamka ah ka tualbual hi. World Environment Day zatna ah sangnaupang Quiz kidemna om a, sanginn tuamtuam pan mi thum kitel in Synod Hall ah kidem uh hi. U Lian sepna Bethany Christian College pan hong pai sangnaupangte tawh ka tonkhawm uh a, Quiz kidemna a siim, a en, a uap ka hi uh hi.

English vive tawh kidong ahih manin ka cimul hong tho pian zangzang hi. Kei sangkahna Mizogam ah English subject simloh a vekpi in lusei pau vive in hong kihilh a, English subject nangawn a khiatna i theihnopte lusei pau tawh kidong tawm ciauciau hi! Laibu a tamzaw English a kigelh ahih hang siate in lusei pau mah toh hong sinsak, hong hilh uh ahih manin a khiatna i theih hang English kipau siam vetlo hi. Tua pen Lamka ka tun ciang ka cimul thosak liang dingin hong nopmawh phial hi.

Sanglut ngaka om ka hih manin ka hun awng a manpha thei pen a ka zat a thupi mahmah hi. Tua ahih manin meltheihte huan ah Hai gah lo, Kawltu teep cih khawnga hunzat a nuam mahmah kimlai Lamka khuasung pawlpi kim pan Environment Week zatna ah Bangci Gamsung Kembit Ding cih thusinna om a, tua ah kihel dingin Chin Baptist Association pawlpi pan kei zong hong teel uh hi. A zingciang kuanpah in India gama Forest lama laisiamna thuk neite leh kumpi uliante kiang pan thusinna nei in ka tu dimdiam uh hi. Tua ah zong a tamzaw English vive hikik ahih manin Lamka khua pen hong International vial mahmah hi.

Tua hun sung teng mahin USA in Iraq a do na uh English newspaper te ah a maan (war photo) tampi tuang den ahih manin tuate lei ding leh extra photo clips te en dingin ka u Neng Khan Mang tawh New Bazar ah ka hawh zel uh hi. Ka pa Khup Za Go (Rev.) in zong Calcutta pan kihawm The Telegraph pen vaikhak den ahih manin English news sim ding a inn vuah om den a, bawhlung thu leh a milim khawng peuh en in Editorial column bang ka sim ngei vet kei zaw hi. A thupina kitheilo hiam, a thupiangte kilunglutzaw mawk hi. Thu thei nuam, mipil leh laisiamte in newspaper a sim uh ciang Editorial simlo in nusialo uh hi cih pen ka nung theih hizaw hi.

Imphal ah college kah dinga Sakuh in Sekpi gah kia ding a ngak banga ka ngak khikhe laitakin Shillong pan Students Chaplain a sem Siapa Rev. J.M. Ngul Khan Pau “Missionary Khoppi” ah thugen dingin hong zin phophot a, ka pano Siapi Khai Za Dal tawh sangkah khawm ngei ahih manin Lamka ah ka omna thu a kihona uh pan Imphal sangin Shillong ah kahzaw leng a hoihzawk ding thu a kikumkha uh hi. Tua zawh a sawtlo in Shillong tungsuk in St. Anthony’s College ah Science sim dingin admission ka bawl hi.

Lamka pan Shillong zin suk ciangin zong lampi ah English vive kizangzaw, ahih kei leh Hindi kizang ahih manin lungsim khat ah sangkahna ‘enga’ pau pen a zatna na zai kei si e cih lungsim ah hong lian mahmah hi. Mizogam ah kihaksuak hileh leh bel leitunga khuapi gol pen bang hong kici leh zong ‘Aizawl’ kici mai ding hi! Kei adingin Babel inn kicim bangin Lamka leh Shillong kikal bekbek ah zong pau nam tampi a om lam ka tel hi. Tua ahih manin English siamna ding ka hanciam a, word meaning theih bek tawh pianglo ding ahih ciang ciin a zat siam mahmah ding ka hanciam sawmta hi.

Sanginn ah English tawh kihopih theih ding lawm ka zong a, ka siam mahmahsa pau pawlkhat gamgi kheng leng a kizang thei nawnlote damdam in ka tawmzat sawm hi. Lamdang takin Pasian in hong makaih a, English bekbek tawh kihona Hostel ah om theihna ding deihsakna ka ngah hi. Tua hangin ‘by heart’ bekbek tawh lai kisim pen themkhat hong tawldam zaw deuh a, ahih hangin lawmte sangin hahkat zawk kul den veve hi. Gual kiphalah hilo napi lawmte sangin hahkat zawk kisam se hi. Cidamna hong pia Pasian hoih ahih manin a tawptan a tung tawmcikte lak ah Pasian in hong koih veve a, a bul lam a gimhuai hang a tawp lam lungdamna tawh kidim hi.

Tua ahih manin, English ka siam nop manin college ka kah sung khempeuh English tawh kihopih theih ding mite tawh ka kitamkholh sawm hamtang hi.

Kum 20 sunga ‘from Third World to First World’ ci-a ki-angtang sak mahmah Singapore gam khantohna a ki et ciangin a dang tampi lak ah gambup pautaang (common langguage) dingin English a teelna uh na hi gige hi. English pen leitung khempeuh tawh kizopna kampau hong suak ahih manin gam khantohna ding, pilna sinna ding, sumbawlna ding, laibu simna dingin a tangzang pen, a ol pen, a manlang pen ahi hi.

Tua manin Singapore gam in kum 20 sung in leitungbup tawh kizopna bawl man a, sumbawlna ah pau leh ham kitello cih bang hi nemnumlo in suakta takin kiho thei, kikhawl thei uh a, sangkahna khempeuh ah English thei peuh leh leitung sanginn hoihte ah kampau haksa hetlo in lut thei den uh hi. Tua manin kizopna, kikholhna, kihona manlang mahmah a, vai khatzong pelem vetlo in pai ziahziah thei ahih manin khangto uh hi.

Tu in zong gamsung khanna a manlang zawk semna dingin ‘Raise English Standard’ cih vaithak khat nei uh a, tua in English pen a siam bek hilo dingin a siam mahmah hi ding cih deihna hi. Thugil pen zong sut thei ding, scientific journals ah, literature ah, banking language, bussiness language, legal terms, etc cihte mikim in a tam theithei a theih ding lunggulhna tawh ‘A sangzaw sem ah English siamna khangsak tek ding’ cih vaipi khat nei mawk uh hi. British English sangin American English in damdam in leitung zel deuhdeuh ahih manin tu laitak a zat uh British English bek hilo in mailam ah American English zong lim siam mahmah dingin kihanthawn keei uh hi.

English pen leitung pumpi ah suakta taka i gamtat theih nang kampau ahih hang i hihna i mangngilhloh na dingin i pianpih pau, i nu hong hopihna kam, mother tongue, pen second language hi a, sin tek ding, siam tek ding cih hanciam khawm uh hi. Eima innkuan pau, innsung pau mangngilhlo ding, ahih hang English pen i nuntakna ding, i khantohna ding, mi i phakna ding ahih manin i siam mahmah ding hi, aci uh ahi hi. China in English na thupi bawl kha hileh Super Power a hihna sawt khin zo ding hi ci uh hi.

Zomi te zong i innsung, innkuan pau Zokam mangngilhlo in English siam mahmah leng i khantohna hong manlang tuam mahmah ding hi cih ka um hi. Can we? Hau Za Cin (Phuitong Liim)