Ei le ei hancian ni ~ T. Sawmlian

Ei le ei hancian ni ~ T. Sawmlian

Pasian tate khelhna pen mihing tung ciang bek a bei hi loin, Pasian tungah zong khial hi hang cih i phawk kisam.. Josef in Potifer zi a luppih pen Potifer tung bek a khelhna in tuat lo a, Pasian tunga khelhna in zong tuat hi. “… Tua ahih ciangin bangci-in hih gitlohna lianpi bawlin Pasian’ tungah khial ding ka hi hiam?” a ci hi (Pian. 39:9).

Kiim le paam ah, lunggulh, duh, deih leh a hoih tuak mahmah nate in hong kiimkotin, thusia-lasia, a hoih lo tuamtuam zak, muh leh zuih ding tampi a om hangin, tuate hanga kithanemsak, tuate kizosak lo dingin lungsim khensat ding hi hang. “Daniel in kumpi innsunga an le leenggahzu tawh a pumpi a thanghuaisaklohna dingin a lungsim a khensat hi…” (Dan. 1:8)

Ei le ei mahmah, Pasian lamah kihatsakin, kisiangthosakin, i hanciamna tungtawnin Pasian huhna tawh kalsuan thei hi hang. Hanciamna a nei thei lo, a nei zo lo leh a nei zo lo dingin kingaihsun kei ni. “Keimah TOPA note Pasian ka hi hi. Keimah siangtho ka hih manin no le no kisiansuahin siangtho un” (Siam. 11:44a). “Mi khatpeuh a hoih lo na khempeuh panin kikemin a siangtho takin a om nak leh na hoih nam khempeuh a sem dingin a Topa tungah ki-apin, a Topa tungah a manpha suak ahih manin a thupi diakte-ah amah kizang ding hi (2 Tim. 2:21)

Kampauna hoih lo, a guallel, a meidawi, thanem theihna kammalte zang kei ni. Haksatna, lauhuai, thusia-lasia tampi om kha inteh, Pasian hehpihna hang a tuate in a zawhloh, gualzopente, vanglianpen Topa’ tate, ama huhna tawh thahat leh na hoih sem thei hi hang, cih kiphawkin kampau ni. “Na kampauna zui-in diktansakna na ngah ding a, na kampauna mah siksanin mawhsakna na thuak ding hi” (Mat. 12:37). “… eite hong itpa hangin hihte khempeuh tungah a gualzopente i hi hi” (Rom 8:37).

I gal uh dawimangpa, a nawmvalh ding zongin humpinelkai bangin humhamin thamvak kawikawi hi… amah doin upna ah kip ni (1 Pet. 5:8-9). Ze-etna tuamtuam hong zangin, siat theihna ding leh puk theihna ding tampi tawh hong pusak a sawm hangin dawimangpa nial ni; Pasian naih lehang aman zong hong naih ding hi. “Tua ahih manin Pasian’ thu na mang un. Dawimangpa na nial un. Nial le-uhcin no kiang panin taikhia ding hi. Pasian kiang nai un. Amah in zong hong nai ding hi. Mawhneite in na khut uh silsiang unla, a kineihkhemte in na lungsim uh siangsak un” (James 4:7-8)

Eite biak Pasian pen pahtawi ding Pasian hi a, ama thu i man nop kei leh a thuak ding eimah mah kihi pah hi. Paulap bawlin Pasian i taisan a, i thudon kei leh, aman zong paulap bawlin hong taisanin hong thudon kei leh i lungdam diam, nuam i sa diam? “…Bang hang hiam cih leh kei hong pahtawite ka pahtawi ding a, kei hong simmawhte ka simmawh ding hi” (1 Sam 2:30)

TOPA hoih hi, ciam unla mu dih un. Amah a beel mi thupha ngah ahi hi. Amah a kihtate bangmah kisam lo ahih manin no ama misiangte aw, TOPA kihta un. Humpinelkaite thanemin gilkial thei uh hi; ahih hangin TOPA a zongte in na hoih bangmah a tasam kei uh hi (Late 34:8-10).

Biakinn kikhak, kimuhkhopna hi thei nawn lo phot. Eima mimal mahmah, innkuan mahmah in i hanciam kisam hi. Hanciam thei hi hang, hanciam zo hi hang, cih kiphawk kawmin hanciam mahmah ni… Topa hoihna mu-in ciam ni. Pasian in, “…Nang kong nusia kei ding a, nang kong taisan ngei kei ding hi…” (Heb. 13:5) ci hi. T. Sawm ~ daihna_cabin || 120621_6:30