Eden Huan a nop ding mahhi ~ Hau Za Cin

Eden Huan a nop ding mahhi

Zolai zunna in thucin thutang mah gelhgelh dih ni.

Eden Huan a nop mah ding hi. Bang hangin maw? A kipat ciil in Pasian in Leitung leh Vantung a bawl hi…..

A ni 1 ni in —- Sun leh Zan bawl hi.
A ni 2 ni in —- Vantung
A ni 3 ni in —- Leitung
A ni 4 ni in —- Ni leh Kha leh Aksi te
A ni 5 ni in —- Tuipi sungah ngasa leh tungleng vasate
A ni 6 ni in —- Gamsa leh AMAH tawh a kibang MIHING “ADAM” bawl hi.
A ni 7 ni in —- tawlnga hi.

Pasian in a bawlsa khempeuh a uk ding, a khoi ding, a kem ding leh a puah dingin mihing bawl a, Zomin mah phuak pah in ADAM na ci hi. Dam kei leh a dang khat a bawl kik kisam ding hi. ADAM pen a omna dingin huan khat bawlsak a, EDEN HUAN kici hi.

ADAM a hamphat dannnnnn……. bang hang in maw?

Pasian in a nek ding theigah, singteh, sa, tui, naa namkim pia. Ann namkim pia, a omna ding huan bawlsak… ukpi a sepna dingin a uk ding leitung khempeuh pia lai….. a tawpna ah a kikholhpih ding zi pia lai… LENGTONG te Singapore hong zin lai in, “Mihing lak pan Adam mah hampha pen. Adam zingthawh mah eng huai pen… a gei ah a zi ding kikoihsa in khanglo…” Ganhing leh gamsate a kopkop in bawl mah leh mihing pen a kopsam in bawl a, a bawlsa naate a kem dingin koih hi. Tua pen hoihsa lo ahih manin a kop langkhat dingin numei bawl a, ADAM in a muh ciangin hoihsa lua ahih manin….. enve vua, enve vua…. cih sawm pah bangin…..EVE ciin a min phuaksak lian hi. Tua bek hi kei, Piancil 2:25 “Mipa leh a zi a guaktangin om uh a, maizumlo uh hi.”

Leitung mihing piang khempeuh pan a pil pen kumpi Solomon in, Na inn ding lam masa inla, na nek ding a kicin ciangin zi nei in ciin Paunak sungah hong hilh hi. Gamdang ah a om lawmte khat in, “Ka laisim ka zawh ciang nasep ka zong dinga, nasep ka neih ciangin zi ding ka zong ding hi. Nasep ka neih kei leh bel zi nei ngam kei ning,” ci hi. Midang khat leuleu in bel, “Officer ka hih zawh ciang nungak ka deihdeih ka hel ngam dinga, officer ka hih kei leh bel nungak zong kihel ngam kenteh,” ci hi. ADAM bel tua banga cih kulse lo in Pasian in a ihmut kal in a gei ah pia ziau a, a khanlawh ciangin zi nei hi pah lian hi. Bang hangin nuamlo ding hiam? A hoih penpen hi zaw mah lai!

LENGTONG Pauno in, “Zawng lua bangmah nei loin, nungak ten hong ngailo…” (Itna – sum leh pai) ciin la na phuak a, ahi zongin a hau khempeuh nungak ten zong na deih masa khin tuanlo zel hi. A pil khempeuh zong nungakte in na ngai tuanlo a, a ki tuak ding, lungsim kituak ding kisam hizaw leh kilawm hi. Mihau te in zong nungak melhoih khempeuh na deih masa tuanlo a, a kibukkim, a kitawikhai kim, balance hi veve hi.

Tua bang lungkhamna ah ADAM na buai sese lo a, EDEN HUAN a nop mah ding hi.

Parcel ah kikhak tawm kullo, ama gei ah a lumsa in mu lian hi. Namdang khatpeuh tawh na kiteng kha ding ADAM aw, ciin a kham ding lah omse lo. Ni nungzui bek na lak ding hi ciin a kun tangtang lah omse lo. A nungsang, a phungsung uh thusia lasia om ngei kha hiam kan masa in ciin zong hilh se lo. Aw, tua EDEN HUAN mahmah aw………. Laitan tua ciang tungta, PR, Citizen, Green Card, etc a ngahsa hi, nasep kiva mahmah hi cih te suut suut kullo….. Na sungh pa leh na sungh nu in hong deihsak kei lua inteh cih lungkham ding lah omlo….. Pasian thu um mi hi, kikhop thanuam, Pasian zahtak a gamta leh a pumpi zong a kem siangtho mi hi ci a sitteltel kul se lo…..

Van a tung solkhapi a taan laiteng hong ngilh ngei kei ning e… ci a kiciam masak kullo. Sikkang innsung ah teeng maw, Taih inn sungah khangkhia maw, moto nei uh maw neilo cih lah lungkham kulse lo. Kei sangin huapa deihzaw kha inteh, kei sang itzawk nei kha inteh ci a zan ihmu lah lianga lungkham lah kulse lo. EVE lungdamna dingin paknamtui Paris pan kibawlte bung khat bek pia ning cih lah kul se lo. Sen ann, Japan ann, McDonald, KFC, Starbucks Coffee, etc nekpih in a lungkimsak ning cih lah lunghihmawh kul se lo.

A ut leh singtung kah ding a, a ut leh sahang hon lak ah pai in a nungzang khawng zut in a mulneel khawng khoih ding a, a ut leh tuibual in, a ut leh singlim ah tawlnga ding hi. A ut leh EVE phei tungah a lum a, a lutang nga in a ihmu zongin kuamah in phawng in nawngkaisak lo dinga, khangma ta leh nasep ziakai, office tung manlo cih omlo ding hi. Aw, nuam si’n teh tua EDEN HUAN.

Hai kung leh Apple kungte, lengthei leh mangkawlsing te, tangmai leh theipi min kiu kiau te… a duh bangbang nek ding om ding a, huan sunga singlim ah paak kilawm taka pak ziziai na mun ah khut kilen in ADAM leh EVE te ei ngailo in lengkhawm ding uh a, kikawi in nun nuam laitual leng ding uh hi. Guaktang in om ta leh phamawh sa lo ding uh a, ki itna bekbek tawh sun leh zan hun zang ding uh hi. Mihing a piang ciat ciat dingin hampha diak uh hi.

Ngam Bawm leh Zawl Cing te tangthu a theih sese loh uh hangin itna taktak mah tawh ki it ding uh a, a melhoihna leh a neih leh lam iplah masa lo ding uh hi. Mel muh ciil pan sinlai ah thaam, hi den ding a, itna maan itna taktak tawh ki it ding uh hi. Nungak dang iplah kha inteh cih muangmawh lo dinga, tangval dang ngai kha inteh cih lungkham lo ding uh hi. “Na meh huan lim kei” ci a kitot omlo dinga, na innsung zuut siangkei cii a kitot omlo lua ding hi.

Paradise a cih uh tua bang ahi mai tam maw?

Mobile phone leh internet connection buaipih kullo ding a, Kasauti serial hanga innkuan kikhop hun kipelh cih omlo ding hi.

A kisap khempeuh uh Pasian in ni khat pan ni 6 sungin bawlsak a, a vekpi in a kim dimdiam khit ciangin amau geel piangsak in EDEN HUAN ah koih ahih mawk ciangin tua kaan kaan a nuam leitung mihing adingin om thei nawnlo ding hi. A mau nek baang teng, a mau sulnung ah a peeng teng i zuutzuut zong a zuut siamte in a kiphatsakpih ding khom uh mumu thei lai saam ci leeng, ADAM leh EVE adingin bel kiphasak nuam hi le uh naak kiphatsak zo si unteh awwww…… Zomi te in pi leh pu, beh leh phung minsial lianga i kiphatsak laaklaak sangin kiphatsak taakzaw leh kilawm sa ing.

EDEN HUAN a om ADAM leh EVE te nupa bel nop a sak mah ding uh hi. Sunghte hong zin ciang Aksa meh in, Teekte hong zin ciang Bal meh cih banga meh tuamtuam khek kawikawi lah kisam lo ding. I mo nu kiva kei lua, i mo nu kizen kei lua, nasep thanuam kei lua cih banga lupna room sungah phun susu a kikup sim lah omse lo ding. I makpa sum neihte tawh i inn ding lam ni, i makpa hauhna tawh nuamsa dih ni cih nopsak sawmna lah om se lo ding. I mo dingin hia nungak va hel dih sin vua (na ngah mateng un), ci a kitawsawnsawn lah kul se lo ding. I makpa dingin hia tangvalpa va naih bawl sin vua cih lah kullo lua mahmah ding…….. Guai, ollua zawzen, hampha lua uh…….

Guai, gelh khin pak zo kei mawk ni, mate? I gelhsa teng leh i gelh nailoh teng gawmkhawm leng EDEN HUAN nopna a lang ii lang ii lang zong i genkhin nai tam maw. Up hak sa kei niteh. Kei zong ka up mah hi. EDEN HUAN nopna gen khin zo ding hi leeng tuni a Singapore a guahzu tengteng (zingsang pan tun nitak lam tan zu ta, Zomi te in guahpi i cihte hi lai) Pen tui suak leh zong kigelh khin nai kenteh. Tua manin hih computer laikhetna pak tawh EDEN HUAN nopna gen khit sawm vet dah ni. Tawldam zaw inteh.

Sia Rev. Dr. JM Ngul Khan Pau in, “Hong haza te, hong bawlsia te thukkik sawm sese kei leng tawldam lel hi. Pasian in thei khin hi,” a cih bangin; EDEN HUAN nopna zong gen khit sawm sese kei leng tawldam lel hi.

EDEN HUAN a nop ding dan, a nop mahmah ding dan aw!! Ut lei ing….. Bill Gates in EDEN HUAN a nop dan cih research bawlna dingin a sum khempeuh hong pia zen leh UT ZEN SI’NG…..

Dr. Hau Za Cin
Phuitong Liim