Ebola virus ihcih in bang hiam? ~ Peter Suumpi

Ebola virus ihcih in bang hiam? ~ Peter Suumpi

Nzara, Sudan le Yam buku, Democractic Republic of Congo munte ah 1972 kum in ebolavirus nihvei lang ngei hi. Hih virus pen Ebola akici gun gei aa khuano khat pan hong kizel khia masa pen ahihman in Ebola virus akici ahi hi.

Ataktak in Ebolavirus pen khenpi thumna sung aa kihel ahi Filoviridae family (Filovirus) nam khat hi in ama ii ci (gene) pen Marburgvirus le Cuevavirus nam ahi hi. Ebola cih min tawh nam nga in kikhen hi.

Tau te in –

• 1. Bundibugyo ebolavirus (BDBV),
• 2. Zaire ebolavirus (EBOV).
• 3. Reston ebolarvirus (RESTV),
• 4. Sudan ebolavirus (SUDV),
• 5. Tai Forest ebolavirus (TAFV) te ahi hi.

Ebolavirus tawh kisai in thei huai thu 6 om aa

1. Ebolavirus natna pen Ebola Siluang Cisa Natna (Ebola haemorrhagic fever) kici in natna avei te ahileh si zah dong in thuak uh hi.

2. Khatvei hong piankhiat (outbreak) nak leh sihna (fatality rate) pen 90% ciang tung thei hi.

3. Adiakdiak in apianna pen Africa gam laizang, nitumna lam le guahtamna gam mangtulak le khualumna munlam ah piang masa hi.

4. Gamlak ganhing te pan mihing te tung ah kilawh in mihing te tung pan mihing le mihing kilawh hi. (human to human transmission)

5. Fruit bats akici baak (Pteropodidae family) te pen Ebola virus te omna mun (natural host) hi dingin ki um mawh hi.

6. Cina aa azawm te pen thukin bawl ding kisam hi. Bang hang hiam cihleh mihing te hita leh ganhing te hita leh akidal theihna zatui (vaccine) om nailo hi.

Koi cibang in kilawh thei hiam? (Mode of transmission)

Ebola natna avei ganhing te pumpi tungpan hong luang khia sisan, tui le asung kua te tungpan kilawh thei hi. Africa ah ahileh gam sung aa om ebolavirus natna avei zawngte, baakte tawh akisawh mite aci uh na in asizong om hi cih thu kiza hi. Tua pan kipan ebolavirus pen mihing te tung ah mihing pan mihing tung ah hong kilawh hi. Ebolavirus avei cina te ii pumpi tung pan aluangkhia tui tawh kisuk khakna pan kilawh thei hi. Tua tuite tawh akisawh kha vante tungpan zong indirect in kilawh thei hi.

Gentehna;

Hih natna pan hong cidam kik pasal te ahileh amau ii cii(sperm) sungpan acidam zawh ni 7 sung nangawng in midang te lawh thei lai hi. Ebola virus natna vei aa aki um mawh mi le aki kipsak khin (comfirm) cina te akhoi siavuan siamah te in natna lawhna thuak phadeuh uh hi. Adiakdiak in infection control precaution akici natna kidalna lam athanem cidamna lam nasem te tung ah kilawh pen hi.

Natna veite koi ci kitheih ding (Signs and symptoms)

Eboalvirus natna pen akhaupai cisa natna (acute viral illness) nam hi in thakhat thuin acisa kah in thazawm ding, aci asa golh ding, alutang na in agawl na ding hi. Tua pan lua ding aa asung zong hong pai ding hi. Aci tung ah asa siehseih suak ding hi. Akaal le asin in na hoihtak semthei nawnlo in pawlkhat te ahileh apumpi pualam le asunglam ah siluang thei hi. Laboratory pan theihna ah sikaang (white blood) te kiam ding aa platelet account kiam ding hi. Liver enzyme te hong khang ding hi. Mihing te tung ahileh asisan sung le mihing sung pan apai khiat tui sung ah virus aom laisiah kilawh thei hi. Acinat nipan akila khia cii (sperm) sung pan ni 61 asawt khit ciang Ebolavirus te paikhia pan hi. Lungno khawi hun (incubation period) pen ni 2 pan ni 21 sawt hi.

Hih natna avei te ki koici thei ding hiam? (Diagnosis)

Adang natna ahi vasa natna (malaria), gilsan, le adang gilsung lam natna, khuak bawk natna (encephalitis), sin natna (hepatitis) le viral haemorrhagic fever te himaw hilo cih kipsakna neih masak kul hi.

Anuai aa natna zonkhiatna (investigation) te tungtawn in ebolavirus natna himaw hilo cih natna minpiakna (diagnosed) kibawl thie hi.

• 1. Antibody –capture enzyme-linked immunosorbent assay (ELISA)
• 2. Antigen detection test
• 3. Serum neutralization test
• 4. Reverse transcriptase polymerase chain reaction (RT – PCR) assay
• 5. Electron microscopy
• 6. Virus isolation by cell culture

Cina te tung pan akila khia tui, sisan, khaksawh te le laboratory vante pan kilawh baih mahmah ahihman in kician tak le kidawm takin natna zonna bawl ding kisam hi.

Bang ci kibawl ding? (Treatment)

Kibawl nading zatui (vaccine) phalna ngah omnai lo hi. Adang vaccine tawh akisin sam hang hih natna lian tawh kisin nailo hi. Hih natna avei cina khat azawn luat aa leh hoihtak thukin in khoi ding thupi pen hi. Cina te pen apumpi tung ah tui dat bei pahpah ding hi. Tua ahihman in datsa tui dawn ding akisap mahbangin athagui sungpan zong electrolyetes te thun ding kisam hi. Adang kibawl danding om nailo hi. Zatui thak akizong tawm pan ahi hi.

Bangci kidal ding hiam? (Prevention)

Ganhingte aading zatui (vaccine) omlo hi. Vokte, zawngte omna munte siangtho sak in le lungno thahza ahi (sodium hypochloried or other detergents) te zong virus te agamtat (activate) theih lohna dingin dalna in kizang thei hi. Azenzen in natna kizeel (outbreak) khin in aki upmawh nak leh amasa pe cina (mihing ahk ganhing) peuhpeuh tuam koih (isolation) ding kisam hi. Natna avei ganhing te that in limtak lei ah phum ahk haltum ding kisam hi. Adiakdiak in ganhing pan mihing kilawhna khiap zawh ding kisam hi. Tua natna pianna kiimlepaam paitheihlohna mun (prohibited area) ci in ciapteh ding kisam hi.

Hih natna vei aa asi ganhing te inn ah ciahpih in asane cihte sep kilkel lohding hi. Tau ganhingte vun tawh akibawl savun puante zong silh loh ding kisam hi. Virus outbreak ci in lungno kizeel cih akitangko nak leh maituam (mask) te, kidalna puante (protective clothing) te le khuttuam (glove ) te bulhsa in cina te kidawm tak khoi ding kisam hi. Lailet – Peter Suumpi (Ref: http://who.int/mdiacentre/factsheests/fs103/en/)