Easter Sunday Thu ~ Pau Do Lian

Easter Sunday Thu ~ Pau Do Lian

Thumasa – Hih article tomno sungah ihgen nop in’ Laisiangtho sunga omlo Easter banghang a kimuak hiam? Muaktak dingmah aa bang thupitna neihiam cihte tamlo ihgen nuam hi.

Easter cih kammal

Thawh kikni Easter cih kammal pen Laisiangtho sungah omlo kammal khat ahih mahbangin thupi asalo Christian zong omhi. Akammal thuktak telzawhna dingin olpak hetloding hi. Zeisu asihleh athawh kik kumpen AD30 pawlhi-a, kum2000 bang ahihman in Laisiangtho sunga omlo thukhat pen Laisiangtho a umkhempeuhin ih thukimciat dingzong baihlo dinghi. Tuma asawtlo kum 100 kiim aa ih behthu, khualeh tuithu, gamthute nangawn zong muhna tuamtuam in kiletsawn thei ahihmanin tuma kum2000 laithupen laimai khatleh nihtawh gelhziau in kicinglo dinghi. Tua ahihman in kammal bulpi pawlkhat etkul dinghi.

Ishtar-Eostre to Easter

Trinity (tothum gawm khat) cihzong Laisiangtho sunga omlo napi-in trinity a umte ihi hi. Mission cih kammal zong Laisiangtho sungah omlo in ahizongin saptuam pawlpi khempeuh leh thu-um mi mimalte in mission nasep athupipen in kikoih hi. Ih ciapteh ding athupi mahmah khat om-a Christian te pawi thupi gentehna: Christmas, Easter leh Sunday cihte leh dawibiakna te ii nithupi te akituak kha (coincident) tampitak om hi. Gentehna in Zeisu suahma sawtpi pek in Egypt te’ tangthu ah Horus kici pen December 25 ni-in suak a, Inna (dawi numei, Ishtar) akici singtung ah apumguak in kikhai a, amau upna-ah asisa atho kik in um lailai uhhi, (Siddhartha Gautama zong tamveipi si-in mi asuak kika ki um ahihi.)

Horus mi asuah kikciangin Mithras in kithei a Christmas nilian mah in suakhi (eite zong Christmas ni a suak ih omngel ve maw). Topa Zeisu athawh kiknipi leh Ashtar (Spring goddess) kici dawite’ pawitawh kituakin aktui kikhek exchange ngeina nei uhhi. dawi biakna tau tampi tak anungta Pasian biakna tausuak tampi tak omhi. Gregory leh Augustine te nuntakna ih etciangin Gregory bang Armenia ah mission asem masa pen hi-a, akumpi pa vua kipan dawibiakna (paganism) khempeuh Christian suak sak a dawi biakna tau (pagan shrine) te susia lo in Pasian biakna tau-in zangsak ziau hi.

Kammal kibang

Zomi te’n Christian upna hongtun ma-in Pasian cih kammal kinei khinta hi. Tuabang mahin Kawl (Burmese) te’n zong Judson hongpai mapek, Phillipi De brito (13th century) akipan in Pasian (Hpaya thakhin) cih nanei khin uhhi. Joseph Herbert Cope hongpai ma-in Pasian cih kammal dawibiakna akipan Pu Pau Cin Hau te in nazang khin ahihman in Christian Pasian atuam in kiphuak nawnlo in kizangto ahihi. Hihpen kammal dangkhat in contextualization cihding ahihi.

Christian tezat kammal leh dawibiakna kammal zat tampi omlai mahleh tuate enkhin zolo ding hi hang. Tua ahihman in Christmas leh Easter te dawi (pagan) biakna-te zat ngeina hi- ci-in pawlkhat in olno takin thu-um mite alungkia sakthei ding omkha thei hi. Tua ahihman in dawi pasian khat Christmas ni-a suak aihteh zatloh ding hi cihding hipah samlo hi. Tuasangin ZEISU SIHNA THAWH KIKNA ATHUPIT NA etding hizaw hi.

Ahang thupi penpen

Zeisu sihna ahang pen Christian lo mipawlkhat te in Herod, Pilate leh Rom galkapte thah hici ziau theihi. Judas in lehheek ahihman in- ci-a Judas amawhsak zong ki-omhi. Hihtawh kisai in a tom in gen nicileng PASIAN in Leitung pianma pekpan A GEELSA atangtun nading a migilo te azatpak hilel hi. Easter zong Ashtar pawipan akila hilo zaw in Leitung vantung ah mihing kici a omma pekin Pasian in Zeisu Calvary ah sidinga NITHUM khitciang hanpan thokik dingcih geelsa (eternal planning) aneihsa ahihi.

Mikhat peuh in historical fact tawh hong genleh Laisiangtho sungah zong lah omlo ahihteh ci-in nalung ahimawh kha hiam? Tua sangin athupi zaw khat kong gen nuam a, tua in April 11, 2020 ni EASTER ahi keizongin nidang khat teitei hive ve ding hi. Banghang hiam cih leh ZEISU thozo hi. Atho nailo thu akigen hilo a, hankhuk pan athawh zawh kum 2000 cingta hi. Tuni Zeisu thawh ni-in nangleh kei-a dingin ih lamet ngamloh khempeuh hong hin’kik ni, hong thawh kikni ahihlam thei-in hileng amainawt te ihi dinghi. Pau D.Lian