Dr. Khen Za Sian leh 2010 kum ~ Pu Thangboi

Dr. Khen Za Sian leh 2010 kum ~ Pu Thangboi

2007 kum September kawlgam buaina pan in tualai tak kawlgam a-uk galkap kumpi in “2008 kum ciang gam thukhun kipsakna nei ding; 2010 kum ciang kitelna bawl ding” cih hong tangko khia uh hi

Galkap ukna adeihlo alangpan pawl in tua angimnate uh atangtun loh theihna ding in thaneih zah san in ki hanciam hi

Ahi zong in 2008 kum May kha in gam thukhun (constitution) hong kipsak zo veve uh hi. 2009 kum hong beikuan ciang in Chin state pan gam maban ding alung himawh deuh teng Pu No Than Kap’ inn ah thu ka kikum uh hi

ZNC pan in Pu Suan Mang (2020 kum kitelna ah NLD pan Tonzang ahmyothar hluttaw ah telcing pen), Pu Gin Kam Lian leh kei ka kihel thei uh hi

“Galkapte’ bawl kitelna ah Zomi min tawh kidemlo ding” cih thu leh “Chin min tawh zong lut tuanlo ding” cih thute ka kiplet mahmah uh hi

Tua ahih man in nakpi in ka kikup khit ciang un Democratic Alliance of Nationalities (DAN) min tawh kitelna ah dem ding in ka khentat uh hi. 2009 kum December kha sung ahi hi

Dr. Khen Kitomna

2010 kum hong tun takteh DAN kaphuat pih uh ih sanggam dang pawlkhat te’n “Chin” min hel hamtang ding hong gengen mawk uh hi

Zung Hlei Thang (Khai San Falam zato puakloh ding asihpan pa) sponsor in Traders Hotel (tu’n ShangriLa) mai a Hitachi innsang dawn a ansai ah sun an hong vak hi. Tua Lai ah Dr. Khen zong hong kihel thei hi

Lawm te’n DAN pen Chin min tawh laih ding mah hong gen uh a, vote khai ding hong cih mawk ciang un Dr. Khen hong kitom gawp in ko Chin tawh alut nuamlo pawl in ka ciahsan uh hi.

Ka nung vuah DAN pen Chin Progressive Party (CPP) tawh na laih uh hi. CPP min tawh 2010 kum kitelna ah lut uh a, telcing pawlkhat zong om uh hi. Dr. Khen’ kitom ni a hong kihel Pu No Than Kap, Zung Hlei Thang leh Sia Khuang Ling (Tonzang sangpi ah siapi semngei)te zong telcing uh hi

Zomi Party Thak Khat

2010 kum kitelna ah akidem ding in Zomi party khat phuat ding in Kalay Myo a ZYA zum ah thu kikupna om cih thu kician khat kaza hi

Tua vai thukin kikupna Bo Aung Kyaw leh Bandola kiu a tuahun Lai a sainuam mahmah khat ahi Power sai dawl tungnung ah kanei uh hi. Tua thukin kikupna ah anuai a teng kihel uh hi.

• 1. Pu Cin Sian Thang
• 2. Pu Gin Kam Lian
• 3. Dr. Khen Za Sian
• 4. Mung Laan Thang

Agenda: “Kawlpi a Zomi party phuatsawmte bangci khaktan ding?”

Khentatna: Pu Gin Kam Lian paito sak ding in vakho ding

Meeting man khit ciang in lam 40 a Pu Sawmno (Laaitui)’ kiang ah dangka teng khat Ks. 100,000/- ka leitawi pah a Pu Gin Kam Lian’ lamsap ding in kapia pah hi. Azing ciang in vapai pah vingveng hi

Amah atuntohma in mun tuamtuam pan zong na kikho ahih man in Zomi party phuatsawm pawl khawl kik uh hi. Lam-et loh laitak Dr. Khen in hong nusiat vat ciang in ka lung zuang mahmah a, ka phawk mahmahna khat hong suut kiau kahi hi.

More: Mangpha Dr. Khen Za Sian

Thukhupna

Tulaitak kawlgam Khuahun pen pawlkhat in 1947 kum dan atung kik in gen uh hi. Ken bel 2009 kum dan atungkik in kamu zaw hi. 1947 kum tungkik maw 2009 kum tungkik zaw maw cih pen 2023 kum ciang peello hong kitel sitset ding hi. Thu mah ngen tanghtangh lai ni. Shalom To Us All, Mung Laan Thang (Yangon)