Dr. Cing Pum Nem kiang pan Hopihna

Dr. Cing Pum Nem kiang pan Hopihna

Dear Netters, Abeisa November-December 2014 sung a damlohna tawh Thailand gam Bangkok khuapi ah zato lum a pai Dr. Cing Pum Nem @ Cingkok in Pasian huhna tawh damna a ngah kikna le a mipihte panpihna tuamtuam tungah lungdamkohna lai kei mimal tungtawn in Tangkona neih sak ding lai hong khakna pen kei manlahna tuamtuam hangin, tun hong khaahkhia thei pan ka hi hi. Siamah Cingkok zong cidam in a teenna Tedim khuapih ah sepna mabante zom thei ta cih kiza hi. A nuai a bangin ama lungdamkok laikhak hong khahkhiat sak ing. Lungdam. (By: Sia Khampeek )

Zomi Laizomte khempeuh tungah lungdam kohna (By: Dr. Cing Pum Nem)

Ka damloh na zia:

2011 pan kipan in gilzang sungah cancer natna hong kimu khia ahih manin Academy, zato, Yangon ah kibawl ka na kipan hi. Cancer zatui kithuh ding ciangin Bangkok ah kilah ding ngaihsutna hong ki pia tek ahih man in Bangkok ah maban zom dingin ka tunu Niang Sian Hoih tawh ka pai hi. Pasian hehpihna tawh Bangkok ah hoihtak ka kilak thei ka hih manin kha 4 khit teh inn lam ka na zuan thei uh hi. Kha 6 hal in Bangkpk ah zato ka ki laka, tu kum ciangin kum khat hal a kilak ding, December kha a Bangkok pai ding ka hi hi.

Tutunga ka dam loh vatna:

August kha kipat in ka khe taklam pen hong hik milmel zel hi. Ka lungnuam lo ahih manin Yangon ah ka nau ka gen leh a lungnuam lo in Yangon ah hong sam suk hi. Ka lutang na thei zel a, kasiip mahmah ka thuak lah pha diak hi. Tua bang tengtawh 17 ni in khuaphawk lo in om vat mawk ka hih manin Asia Royal Hospital ah Ambulance tawh hong ki puak hi. Ka om zia teng siavuan ten hong et ciangin Khuak sungah cancer natna lut hi ding cih ummawh pah lian hi. Ka lutang sung teng CT scan hong zaih pah uh a upmawh na bang takpi hi.

Kibawl zia :

Siavuante in Khuak sunga natna pen na lipkhap uh ahih manin ngaihsut piak zia ding zong na tam sak lo in a hun asau len a tom ding tawh kisai in teh na ci uh hi. Bangbang ahi zong radiation (datkeen) leng phatuam ding hi, cih ngaihsut piakna hong om ciangin zatopi ah 5 vei ka na ken thei uh hi. Pasian in kisam asak ciangin amite zangin lampi hong honsak toto hi.

Datkeen zawh ciangin Topan thathak hong guan in ka upa tanu (Siamah Huai Deih Cing) tawh Bangkok lam ka na zuan uh hi. Ka natna pen upmawh sangin na nasia zaw ahih manin lungzing in cih na ding theilo in ka om uh hi.

Damna ahih leh Pasian kiangpan:

2011 kum in ka kilah na sa zato a tung kik ka hih manin siavuan siamah te tawh ka ki ho pah thei hi. Ka nat zia pen nidang a tawh ki bang lo ahih manin siavuan te in hong patauh pih uh hi. Zato pen kumpi sung pan in a vakah hi le hang zekai lua ding ahih man in apua lam pan kah in, nitak mi bei lam ciang siavuan te tawh ka kimu zel uh hi.

Vial tampi mah siavuante tawh kimuh zawh nikhat, nitak nai 6 pawl, siavuannu in, na natna a om zia pen kua tawh kikup pih ding na hiam, kuan hong aamahkhan ding hiam, hong cih teh ka tunu bek tawh ka hi a, akisam khempeuh kei tungah hong gen lel in kei man akisam bangin ka geel ding hi, ka ci hi. Ka maitang hoihtak hong en a, tua khitteh ka natna omzia teng hong gen hi.

Cancer natna anasiatna aki gen ciangin a stage 1,2,3,4 cih bangin a kigen ahi hi. Tutung ka natna zong a sen sang pen stage 4 mah na hi a, lauhuai mahmahnta, cihna ahi hi. Bek tham lo in, Khuak sung cih pen amundang sangin alauhuai zawkzia ah, luguh pen innpi tawh aki bang hi a, a sungah van ki behlap leh luguh kikeek thei lo ahih manin akisia ding hi, ci-in gentehna tawh hong siang gen hi. Ka Khuak sunga meima bawk pen 2.6 x 3.8 x 3.1 cm gol hi, tua ahih manin hun tam sot ding hoih lo ding hi, hong ci hi.

Ka natna anasiatna zia ka theih ciangin ka lungsim tawng panin Topa tungah ka kiko a, Topa ka damlohna pen deihna nei ding na hi, a sisa a tho kik sak, adam lo te adam sak, a nungta Pasian na hi hi, ci-in ka lungsimtawng panin Topa tungah ka kiko hi.

Hih hun laitak in kei thuakhop in kasiip na a, kei tha in zong kalsuan ding hamsa ka sa hi. Ahih hangin Topan ka thungetna hong dawng a a lamdang takin Topa hong lawnna ka thei hi. Ka siip na in, asa vetvet pen hong vot denden a, kei bek wheel Chair tutna a tu pen lamdang sa in ka kim ka paam ka en hi. Topa’n hong lawng hi lo maw, kei ka siip na nawn lo pi, nuam sing Topa, ci-in lungdam ka ko hi. Natna lungno ka Khuak sungah a om lai ahih hangin anatna ka thuak kha nawn kei hi. Damna cin pen natna lungno a om loh man hi lo a, anat lam i thuak loh zong Pasian hong piak damna hi mawk lo ahiam, ka ci hi. Hih hun aki pan Topa hong lawm khak man in ka pumpi a tha zawnkhal hangin ka Kha tha a hat hi.

Ka ki-at zia:

November 18 ni zingsang nai 8 in operation khan ah ka lut hi. Nai 5 sung sawt ding ci ahih manin nai nga hong sat khitteh khua ka phawk pak kei hi. Lungsim patauh na sa hangin ka U te leh hong ompih khempeuh na patau lua khin ta hi. Akuama peuh in thu hong nget sak ngiat ahih manin nai khat val deuh teh khua ka phawk aa na sak valval zong om lo in special ICU khan ah ka om hi. Ka lu a ki tuam velval ding ka sak leh na tua ci lo bilbel ahih man in ka lung dam mahmah hi. Ka ki-at zawh ni 10 sung zato ah a om ding ka hih hang, akuama peuh thunget sakna leh Pasian hehpihna hangin ni 3 khitteh zato ka tuak zo pah hi.

Lungdam kohna:

Topa in kisam asak ciangin abawlsa amite mah zangin a vangliatna te ki lang sak hi. Zato kah ding ka pai in lamsap ding leh nektawm ding bek tawh ka ki pan uh hi. Ahih hangin Topan na khempeuh hong sik ding ahih lam ka thei hi. “Khut sungah sum a om man in sum aki nei hi lo a, sum tang neih loh man in zong aki zawng hi peuhmah lo hi” cih pen ka nuntak pih thu khat ahi hi. Khat veivei khut sungah sum a om loh manin ki patau thei hi. Ki ngaihsun khial thei kasa hii. Topa in kisam asak ciangin azat nop amite hong zang in hong sik hi. Tua ahih manin tutunga ka ki bawl na ding hamsatna hong om ciangin kei bangin phawk kha lo in lawmte hong kisa in akisam ding sum hong na pulak sak uh hi. Pasian in mite lungsim na lawng ahih manin ka ki-at na ding akisam sum bek hilo in leitung mun tuamtuam pan in thungetna, thapiakna leh upna hanga lawm le gual tampi ka nei thuah lai hi. Topa bel lamdang ei. Azat amite zong lamdang ei, ki theihpih ngei zong hi gai lo kha mai thei, ahih hangin itna hangin thute ki ngetsak in khat le khat maa kipanpih in, iki khual diamdiam nate ka muh teh Pasian hoihna lamdang ka sa hi.

Hong panpih, hong vaihawm pih leh hong dinpih mimal te amin in kong pulak vek zo kei ding hi. Zanhak in, antanga thu hong nget sak tampi om hi. Nasem kawmkawm in a tawlngak kikala phone tawh thu hong nget sak zong tawm lo hi. Inn sung tawng pan in lungsim takpi tawh thu hong ngetsaka khitui luang zong tampi om hi. Pasian minthan na dinga a sumtang mahmah hong khak tampi banah, nek ding dawn ding, ka duh mahmah vaimin, gatam, bal, kawlkai, leh zo-an tuamtuam hong pia te zong pulak zawh ding hi lo hi.

Hih bang thupha ka san na dingin, David Kumpipa in, “Topa PASIAN aw, tu ciang dong hih bangin kei nong kep na dingin kei kua hi a, ka innkuan bang ahi hiam? (2 Sam. 7:18) acih mah bangin ken zong ka ki ci hi. Hih te khempeuh pen ka ngaihsut teh thu dang hang hi peuhmah lo in Jesuh sisan hanga damna ka ngah na leh, a lamdang Pasian hong itna hang na hi zen hi.

Hih itna anei mite te sungah IT NA mah hong nungta in mawk om lo ahih manin hong luangkhia a, tuni in mit in a kimu khia thei damna thupha te ahi hi.

Hih thupha khempeuh in Pasian minthanna hi hen la, mihingte ki piak bat theih lo iki sapna hong thei Pasian in mimal tungah ahi zong kipawlna tuamtuam te leh Pawlpi te tungah iki sap bangin thupha tawh hong phungvuh sak ding i ki thunget sak na ahi hi. Lungdamna Lianpi tawh, Cing Pum Neam (S/n Cingkok)