Dongtuak huh na tawh ki sai ~ Bible Society

Dongtuak huh na tawh ki sai ~ Bible Society

A kuama peuh, Ei khap tan ciat, a lem theithei dingin le a manlang dingin dongtuakte i panpih lungdam huai sa mahmah ing. Gampua pan sanggamte nong hanciam mah bangun gamsung pan zong khutzep tuan loin sep theihzah sem ciat hihang. Veina lian hi, thuakpihna lian hi.

Yangon khua sung mun citeng ah “Tui dong tuakte ading huhna hong ngen ung” ci in a diakdiak khangnote kiko ziahziah uh a, zani bangin Mangkangte nupa khat zong Sule lampi ah huhna ngenin, sun thapai khangnote tawh ding khawm uh hi. Dongtuahna sung pan i hamphatna in “kithutuahna le kilainatna” khang hi.

Bible Society in thupiang ka zak phet un, kumbul a kikoihsa relief ading tulza (teng) 70 budget pen koi ci zat ding cih ka kikum pah uh a, Hakha Rescue Committee ah tulza 25 le Kawlpi kiimteng ah tulza 50 ka khensat phot uh hi.

Kawlpi ah August 5-8 kikal ka va zin a, camp 7 ah nitak an khatvei ciat vaak, khua tuamtuam ah antang ip 63, Kawlpi le Pyidawtha kikal kuai lei (zattawm pak ding gua lei) dawhsak cih bang sem samsam-in ka nusia phot uh hi.

Zani in MEIK khua pan pawlpi khat in Tuiciin dongtuakte huhna dingin Bible Society ah sum 51,30,000/- leh puan ippi 8 dim hong khak a, Thayawaddi, Pantanaw le Pathein (munthum) ah hawm khiat dingin khensat in, ka staff-te kuan khengkhang ta uh hi.

Dongtuak sanggamte’ LAI SIANGTHO bu tui sungah ciim ahih manin a maute a hehnem ding le lametna thak a pia dingin Pasian’ kammal LAI SIANGTHO hawm khia ni. Nang nong kihel ding hiam? Falam, Hakha le Tedim LAI SIANGTHO bu khat 3500/- kyat Kawl Lai Siangtho 5000/- kyats le New Testament 1000/- kyats kihawm thei hi.

Zani in U Tuan Ceu in Falam Lai Siangtho bu 189 le Tedim Lai Siantho bu 18, U Lian Cung Nung un Falam Lai Siangtho bu 141 hawm khiat dingin sum hong pia uh hi.

1 Kor 15:58 Tua ahih ciangin ka hong it sanggamte aw, Topa’ hangin na nasepnate uh a mawkna hi ngei het lo hi, ci-in na theih uh mah bangin Topa adingin a tawntungin na sem unla, ling het loin lungsim kiptakin na om ta un.

Muanna tawh
Khoi Lam