Dimno’ Nu laikhak – 14

Dimno’ Nu laikhak – 14

Lai gual khat zong gelh ding haksa sa kawmkal ah laimai dim nih bang nong khak kik ciangin lam dang sa zawzen ingh. Nong kam vaikhak thu te zong hoih tak in nong na kan sak ning. Innkuan kim in om khawm in, a om bangbang lim in lim ta kei leh i nek khop kal ding ngak lah mawk ingh ei, Dim! Ahi zongin leitung i cih bel i utna mun ah ki om thei den lo-in om tuak na ding mun ah a kiom na hi zel mawk ei!

Khangtui te pau leh kaneu lai-in, ‘ Sang (tanglangh )kah leng nuam in teh ci-in sang kah kal ding ngak lah mahmah ingh. Tanglah kah ciangin Sangpi ( High School ) a kah te nop tuak sa in eng leuleu ing. Ahi zongin Sangpi ah ka kah ciangin nop ka sa tuan kei a, tansawm ong a, khuapi sung ah College/ University kah in sang kikhak ciangin khua ah hong ciah te nop tuak sa in ka eng mahmah hi. University ka kah ciangin a nop tuan na ding ka thei kei hi. Sang man a nasep nei te nop tuak ka sa mahmah leuleu hi. Sang manin nasep kaneih ciangin ka ngah sum pen kicing sa zolo in gamdang pai a, sum tampi pi a khak zo te hampha ka sa hi. Gamdang ka tun ciangin zong hamphat zawk na ding leh a nop zawk na ding ka mu zo tuan kei a, koi ah nopna leh lungmuan na aom diam’ ci-in ka lung ngai ngai lai hi.

‘Bangmah nei lo-in, hong ki huh ding ut mahmah napi hangin,
Ei’ sang aa agenthei zaw te huh ding ih ngaih sun kei hi.
Pil lo napi hangin mihai te peuh i nuih san kha thei zel hi.’

Hih thupen tukum kumthak ni zan in kangaih sun kha a, kumthak sung ah gamtatna hoih khat tawh kipan to ning ci-in khensat na khat ka nei hi.

‘‘Khuapi sung kapai ciangin lampi a katuah masak khutdawhngen khat pen a tawm atam cilo in huh ning’’ cih ahi hi. Khuasung kapai ciangin tampi kapia zo kei zongin khutdawhngen ka tuah masak penpen kaneih sunsun tawh tuni ciang dongh panpih ka hih man in hampha kisa ingh.

Tua danin ka gamtat na in kei, hong lungnuam sak mahmah mawk hi. Tampi kapiak zawh loh hangin kei leh kei na hoih khat asem in ka kingaih sun a, Pasian in zong hong lungdam pih ding hi ci-in upna nei ka hih manin ka lungnuam mahmah hi.Hih thu hong gen lo ding ka cih hina pi in ahi zongin, Dim aw nang’ zong na nasin le cin ut mahmah ka hih manin tutung kong laikhak ah hih thu hong gen hi ingh.

Ka zonzon lungnop na acih pen tun tawmtawm amu pan ka hih tam ci ingh.

Dim aw, huhna hong ngen khem peuh pia gai zo kei ni, eizong ahau hi kei hangh. Ahi zongin bang cidan in hong ngen te pia thei ding cih nang zong na gel le cin ut ingh. Thupha a bawlbawl lah i hi a, nasep hoih sep, a kisin toto zong i hi hi.

Tun kisin sin kei le’ng nidang ciangin mibelh, mi muan in om in kua mah i huh nop loh khak ding, kua mah i panpih nop loh khak ding ka lung hih mawh man zong hi.

Hong it tawntung,
Dimno’ Pa
18 July 2012