Dimno’ Nu laikhak – 13
Khuakhal hun hong bei in tuuk hong tung sim in cinat lunat tam den ahih manin hoih tak in nek leh dawn, om dan khawl dan na siam un maw, Dim! Thangpi te unau zong nisa lak khawng ah a ki mawlmawl uh, a vakvak uh zong na kidawm le hilo dia! Kumsim in tuuk hong tung leh na den lawmlawm liang ih ciangin tukum peuhmah kidawm in nat tawh kipelh sawm peuhmah dih ni!
Khuahun i gen leh kong gennop thu bang mangngih dektak phial ing ei!
Khatvei Papi khat in naupang kimawlna tuamtuam aom na phualpi khat ah a tano nih tawh va pai uh hi. Kongcingpa kiang’ dongh in,
“ Lutman bangzah ahia?”
“ Mikhat ciangin Dollar 3 hi. Ahi zongin kum 6 leh kum 6 nuai siah pen lutman ngen loin a mawk na in ki lut sak.”
“ Aw hi maw, tua ahi leh…. hiah…. Dollor 6!”
“ Kua teng a ding in maw?
“Kei adingin Dollor 3, hua lamnawl a Siahuan pa kum 7 hita ahih manin ama adingin Dollor 3. Hua kaneu pen uh Sitni pa bel kum 3 bek hi pan!”
“ Kamawk! Awngbali pauk na hia leh”
“ Ehe….Bang hang in maw?”
“ A u zaw pa pen kum 6 pha ci ziau le cin Dollor 3 a nuam tuam ding hi ven! Akua in hong thei ding lah hilo a”
“ Na cih dan bel hi mah na ven, ahi zongin tua dan ci leng ka tano te in ka zuau lam hong thei ding. Ka naupangte zuau tawh pattah ding, zuau gen tawh khangkhia sak ding cih deih kengh!” ci hi.
“ Ka gen bangin gamta un la, ka gamtat bangin gam ta kei un” ci-in i naupang te kiang thu na gen ngei tam maw, Dim! Tu hun ciangin tua
dan kammal zat ding pen kidawm leng a hoih ta tam ci ingh. Ih naupang te in ei a nu leh a pa hong etteh ding ahih manin gamtat kampau, nek leh dawn, tep leh muam ah ki dawm mahmah in kideek mahmah le’ng cih lunggulh na lianpi nei ing.
Nu leh Pa pawl khat te-in a mau innliim ah TV, Video en uh in, innsung ah a naupang te uh aana in lai sim sak mawk uh hi. Naupang te in bang ci bangin a laisim uh a lung lut thei peuhmah ding! Nitak pawi en khawngin pai in, inn ah naupang te guak nusia sia lai uh hi.
Naupang te laisim hun sung beek in ei zong tawm cik bek kideek zaw deuh leng, kideek zaw deuh leng……
Ih Pa in an nek kawm in, ‘ ko na nu leh na pa te-un a hoih lo ka theih uh zateep tuibuuk te ka kikhalkhal uh hang un ki khal zo nawn lo hi ungh. No zateep lo, kunza khai lo, tuibuuk muam lo te in hong sin keita peuh un’ hong cihcih te phawk kik dihdih ingh ei!
Ei mahmah i ta te’n hong etteh theih dingin hanciam ni!
Hong it tawntung,
Dimno’ Pa
9 July 2012
Comment piaknop aomleh...