Tukumsung thokang natna “Dengue Fever” hangin Myanmar gambup ah misi 170 phakhin

Tukumsung thokang natna “Dengue Fever” hangin Myanmar gambup ah misi 170 phakhin

Thokang panin akingah natna namkhat ahi “Dengue Fever” pen tukumsung Myanmar gambup ah akigawm in 27,000 cases bang ki mukhia in, tualak ah mi 170 bangin sihlawh hi ci’n Naypyidaw Public Health Department te khutnuai aom DHF and Elephantiasis Control Project te’n pulakkhia uhhi.

2017 kumsung January 01 panin October 21 ni ciangciang Myanmar gambup ah Dengue Fever natna aki mukhiazah aki pulakna ah Yangon Region sungah 6,616 cases, Ayeyawady Region sungah 2,984 cases, Rakhine State sungah 2,489 cases, Kachin State sungah 2,273 cases, Mandalay Region sungah 2,102 cases, Mon State sungah 1,826 cases, Kayin State sungah 1,769 cases, Bago Region sungah 1,615 cases, Shan State sungah 1,323 cases, Sagaing Region sungah 1,102 cases, Kayah State sungah 1,036 cases, Magway Region sungah 880 cases, Taninthayi Region sungah 817 cases, Naypyidaw sungah 581 cihbang in kimukhia cih Coconuts Yangon News tungtawn in kiza hi.

Tuabang in Dengue Fever aki muhkhiat kawikawina tungtawn in Yangon ah mi 46 in sihlawh hi. Tuaban ah Ayeyawady ah mi 33, Rakhine ah mi 26, Bago ah mi 18, Magway ah mi 16, Kchin ah mi 15, Sagaing ah mi 5, Naypyidaw ah mi 4, Kayah ah mi 2, Kayin ah mi 1, Taninthayi ah mi 1, Mon ah mi 1 cihbang in misi omkawikawi hi.

Tukum kipatlam amasa kha 4 “First Quarter” hunsung in Myanmar gambup ah Dengue Fever pen mi 2000 khawngbek omhi ci’n Public Health Department te’n pulak uhhi. Tualak ahzong atamzaw pen Yangon Region sungah hi a, Dengue Fever 2000 cases bang aki muhkhiatna ah mi 9 in sihlawh cihi.

Public Health Department te’n hih Dengue Fever pen Myanmar gambup ah ki zelgawptheih khading a, “epidemic levels” tungthei khading hi ci’n agenkholh mahbang in tuazawh asawtlo in Dengue Fever pen Myanmar gambup ah kibehlapgawp takpi hi.

2016 kum in Myanmar gambup ah Dengue Fever pen akigawm in 9149 cases ki mukhia a, tualak ah mi 55 in sihlawh uhhi. Tuatawh tehkakna in tukum 2017 kumpen beinailo a, ahi zongin Dengue Fever pen 27,000 cases bang kimukhia khinta in, mi 170 bangin sihlawhkhin uhhi.

Myanmar gamsung ah Dengue Fever akimuhkhiat masakpen 1965 kum kici hi. Tuazawh akipan kumnih kumthumhal cihbang in Dengue Epidemics omthei zelzel hi. Tunai Myanmar gamsung ah Dengue Fever ahuaisiadiak pen 2007, 2011, 2013, 2015 cihbang ahihi.

1994 kumin Myanmar gambup ah Dengue Fever nasiatak in kithehzak in, mi 444 takin sihlawh ahih manin, hih Dengue Fever hangin misi atampen “deadliest dengue outbreak” in ki ciamteh hi.

More: Singapore ah Zika Virus ngah mi 38 kibehlap, akigawm mi 189 hita

Dengue Fever ngahloh nadingin athupipen ahihleh thokang “Mosquito” ki pehkhaksak hetlohding thupi penpen hi. Thokang aomloh nadingin innkiim innpaam hahsiangding, tuikivung omsakloding, thoza Mosquito Repellent cihte zangding, thopuan hoihtak khungding cihbangin thokang natna Dengue Fever panin kidalthei hi. Sawltak #zomidaily