Democracy maw? Freedom of Press and Freedom of Expression maw?

Democracy maw? Freedom of Press and Freedom of Expression maw?

Democracy maw? Demon-Cracy? Freedom of Press and Freedom of Expression maw, Chains of Press and Chained of Expression? Nang koi pen teel zaw ding?

Tu lai Zomi news group tuamtuam ah thu hoih khat peuhpeuh leh midangte ngaihsutna tawh kibang lo deuh khat gen kha leh gen khia ngam khat peuh a om ciang kiaukiau ciangin gam langpang, makaite langpang, minam langpang, huih thau hi ci-a i ngaihsut pahpah ma-in a gen thute uh bang hi a, khantohna ding maw kiatniamna ding? Kipumkhat theihna ding maw kikhen theihna ding cih lim takin nih vei thum vei i sit phat ding kisam masa hi. Mi khat i huat/el manin ama’ ngaihsutna hoih nonote langpan bawl pah kha kei ni. (I mudah nuam teitei leh amah mudah lel zaw in, a ngaihsutna hoih khempeuh muhdahsak pah kei zaw ni).

A thulu ah i gen bangin: Gam bup mi a tamzaw deihna banga ki-ukna maw dawite banga dawimangpa’ ukna koi deih zaw? Suakta tak-a thu leh la genkhiat theihna maw ahih kei leh thu leh la kol bulh ding cih koi i deih zaw a? cih ngaihsut hun ta hi. Zomi sungah kihawmthawhna thu ki-at khempeuh leh a hoih ding ngaihsutna thu mu thei a hong at khiate pen makaite demna, elna, kona, huih thau, Zomi Internet Army i cih den sung khantohna taktak leh kibawlphatna taktak, kipuahphatna, ki-et kik theihna lungsim taktak kinei ngei lo ding cihna hi. (Mi khat peuh i huat ciangin kihawmthawh thei lo hi).

Min lo in ahih kei leh party khat gensiat cih pen democracy ngeina hi a, i san theih kei leh democracy cih a sang thei nai lo hi zaw hi hang cih i tel ding kisam ta hi. (Thokang in hong pet cianin a kibeng mah hi lel hi) Leitung bup-a Democracy khangham pen US leh democracy lianpen India gam bang en pak leng President leh Prime Minister-te khawng min loin lim kilawm lo pipi khawng nangawn tawh thu ki-at ziahziah ta lel a, mi khempeuh in freedom of expression leh freedom of press suakta takin zang uh hi. Tua hi napi thuman lohna om veve lai hi. A gen ngam om kei leh bangzah ta-in a nasia zen tam ???

Democracy gam leh democratic party khat peuhpeuh pen a cidamna dingin makai leh partyte’ citlahna, thuman lohna teng a pulak ngam ding/theih ding leh a keel luphum hoih lote uh a pholak ngam ding (opposition) a om kul den a, ei Zomite lakah zong a om hun ta hi. Tua bang a om theih kei a, freedom of expression (suakta tak-a lungsim bang gen khiat theihna) a kihencip den leh pen mi khat deihna bek-a ki-ukna (dictatorship) leh party khat deihna bek-a ki-ukna (totalitarianism) makaihna leh gam sunga om lai hi cihna hi lel hi.

Ki-elna, i hih lohna pi kigenna pen bel tawta vai mah a, i paih hun ta hi. Tu lai i leitung pen thau taktak sangin huih thau i cihcih (internet, social media) te kihtak huai zaw ta a, a phawk hun zong hi zaw ta hi. Leitung gam khat leh khat pen thau leh bomb tawh kido nawn lo a, huih thau tawh a kido hun hi ta hi. Huih thau in mun gamla deng zo zaw a, vanglian zaw hi.

Huih thau a hat penpen gualzo lel hi. Mi pil leh thumu thei khempeuh leh nautang khempeuh pen makai zaa len ding leh hun bit (full time) in politics ah hong kibual ding hi cih om thei ngei lo ding ahih manin mi khatin a thu muhna hoihte hong gente pen kibawlphatna, ki-etphatna (self introspection) dingin zang thei leng khantohna om zaw ding hi.

Democracy gam leh democratic party khat peuhpeuh pen a picin semsem leh citlahna, hoih lohna, thuman zawh lohna, hawmthawna kammal hong tam semsem zaw ding a, kiza mun semsem zaw lai ding hi. Democracy hat semsemna dingin a cidam huai kiselna leh kinialna leh a cidam hiai kigensiatna (healthy debate and healthy criticism) a om loh phamawh hi cih i tel ding kisam zaw ta a, tua bang gen thei leh gen ngamte huih thau cih sansan hun hi nawn lo a, pahtak ding hi zaw hi.

Huih thau a om nawn loh a, tua banga ngaihsutna suakta taka gen ngam a om nawn loh ciangin mi khat deihna bek-a ki-ukna (dictatorship/authoritarianism) sungah a ciah kik kisuak ding a, a dah huai lamah a mainawk (a papai i cihte) kihi zaw ding hi cih tel khial kei ni. Ki-elna, phuahtawm thu tawh a man lo a kigenna bel cing peuhmah kei ni, a ci i tuh ding lauhuai lua hi. Minam kikhenna ding leh kideidanna ding thu tangkopihte zong khua leh tui in khalna (social boycott) i bawl khum ngam ding zong kisam ding hi.

[Mi khat in ama’ deihna leh a ngaihsutna a gen khiat ngam ciangin en i deih loh manin amau i ngaihsutna suakta takin a gen theihna ding (freedom of speech) ah kigolh/bengdai thei hi teh ci-in mi tampi kihilh ta i hih manin a dah huai mahmah ahi hi” – Dr. Ben Foster] Thang Khan Lian