Dawivai tawh kidim lungdamna thudang

Dawivai tawh kidim lungdamna thudang

Lungdamna thudang a kicite lakah khat pen mihingte’ mawhna hanga Pasian’ hehna thu, tua hehna Jesuh in a sisan tawh a thoihdamna thu, upna thu le kisikna thu hilh ding cih thute a kisapna sangin gamcing gamkem dawi hawlkhiatna cih khat tawh Lungdamna thu laihna ahi hi. Thusuak thei ten suak sak. Kha khentel theihna nei ing a cite in kha-nin a dawldawl in om sakin, hih gam tua dawi in kem, hua gam tua kau in kem cih bangin hilh uh hi.

Hih dawi pen Jesuh min lawhna tawh hawl khia ding, hua pen antanna tawh hawlkhia cihbang daanin a dawi vai teng tawh lungdamna thu laih in, Lai Siangtho’ gen mawhnei mi khat ama’ mawhna panin upna le kisikna tawh Jesuh kiangah a hawl ding tua Lungdamna thu taktak pen gen taktak nawn lo zawin, a dawl a dawlin a dawi a dawi om sak uh hi.

Ih lungdamna thu pen ahi lo pi thudang khat tawh hong kilaih sawm mawk hi. Zogam a dawiteng hawlkhiat nasep tawh Zomite in gupna a kingah ding hong sa sak hi. Kawlpi kemcing dawite hawlkhiat zawh ding bek hanciam uh a, a mihingte tungah a mawhna uh panin upna le kisikna a piangsak Lungdamna thu mah hilh tangtang ding kihanciam nawn lo mawk hi.

Dawite bekbek ngawhin siansuah damdam uh hi. Kawlpi dawiteng kihawlkhia zo leh Kawlpi mite in gupna a ngah ding a sa om uh hi. Hih banga dawi thu bekbek tawh thugenna pen mite mawhna panin hotkhiatna lampi maan taktak tawh thu ih kihilh ding ih kisapna panin hong pialpih nuam thu kihilhna ahi hi.

Leitung plannet pi pen Satan’ khut sung pan hotkhiat zawh nading ci-in hawlkhiat nasep tawh lungdamna thudang khat hong hilh hilh uh a, Satan khawng gual lel in taisak veva bek mawk uh hi. Thuciam thak hong hilhna a om bangin mimal pianthakna le tua mimal gup ngahna tawh Pasian’ gam luah ding cih sangin, tua leitang (planet earth) tunga om gam kuamte a kuam a kuam a Satan’ khut sung pan lak kik zawhna tawh a leitung le a sunga om khempeuh luah mang ding cih bangdan thu kihilhna tawh leitung lok gawpte (planet shakers) kisam sak uh hi.

A taktak in cilehang leitung (planet) khempeuh na lok gawp hangin mi khat a mawhna kiphawkin kisikna tawh Jesuh’ kiang a maan takin na zuat sak theih kei leh a mawhna kimaisak thei nai lo hi. Leitung na lokgawp zo phial ahi zongin Lai Siangtho lo tawh mi khat ii mawhna na lokkhia zo kei ding hi. Leitunga dawi khempeuh hawlkhiatna tawh mihing’ mawhna mai lo hi. Leitung mi khempeuh zing le nitak buhsih le aksa a vak zo dingin hauin, vanglianin, pilin, na minthan mahmah hangin tuate in mawhnei mi khat vantung Pa’ kiang tun zo lo ding hi. Na mawhna pen nangmah tawh kisai ta hi.

Hong mawh sak midang khat peuh ahi a, dawimangpa’ ahi phial zongin a mawh pen nang hi khin hiteh. A mawh a khial pen nang le kei hi khin hi hang. Leitung pan dawi khempeuh a kihawl khia zongin Jesuh’ sisan lo tawh ih mawhna cian lai veve hi. Ih mawhna thaman sihna ih thuak hangin Pasian’ hehna cian lai veve hi.

Mawhna thaman ih thuak hangin Pasian’ hehna bei nai suai lo hi. Pasian’ hehna a damsak ding Pasian’ tapa Jesuh Khrih ih kisam ngiat hi. Tua ahih manin tua Pasian’ hehna a damsak Jesuh Khrih le a singlamteh kikhailupna thu sungah upna lo tawh kuamah in kha damna ngah ngei lo ding hi. (a zom om lai…) Evan. Suangh Dal