Dam lai pahtawi

Dam lai pahtawi

Itna kamkhum zanuamlo kuamah ih om kei a, pahtawi utlo zong ih om tuan kei hi. Pil ta keileng piltak ciai ong kici leh ih lungdamin ih maitai a, hoih keiphial lengzong hoih tak ciai ci-in hong kiphat leh kinuam mahmah hi.

Ei Zomi sungah ih kisap mahmah khatin kipahtawi siam ding ahi hi. Ih pahtawi nop a tuam, ih ko nop a tuam cih bang a ih neih/khen loh ding thupi hi. Pawl khatte pen a pahtak khat pahtawi nuamlua kisa, midangte zakdah khawpin a pahtawi ki om thei hi. Midangte zakdah dinga na pahtak khat na pahtawi pen pahtawi na man hilo hi cih phawk ding kisam zel hi. Tu laitak ih Zomi sungah ih ngaihsut dingin minam lungsim/beh lungsim, pawlpi lungsim cih bangte ih neih loh ding a thupite lak ah kalmasa ahi hi. Nang pahtawi nop pen na behte,na pawlpite bek hi’n a dang beh/pawlpi khat pahtawi dingin hong om ciang lah pahtawi nuamlo zel cih dan lungsim ih neih leh kipum khat ding haksa mahmah ding hi.

Tua hilo in pahtawi nuamin ih kisik ciang ih pahtawi nop pa/nu ih lungdam koh nop pa/nu a nuntakna Pasian in a lak ciang ih pahtawi hang a mawk napi hilel ding a, tuisung kampau ih bang lel ding hi.

Pasian in Zomite a ki mudah dingin hong tuambawl deuh cih hi tuanlo hi. Sih khit ciang kiphawk pan ding leh ki-it pan dingin hong deih tuanlo hi. Khialhna, mawhna neilo kua mah ih om kei a tua ih khialh/mawhna te ih maisak ding a thupi ahi hi. Ei leh ei khawng khial ngei keng ih cih leh Van a om Pasian in hong thei veve ding hi. Kuamah mawhna neilo ih om kei a, ih nute sungpan in a mawhsa a piang vive ih hi hi. Ih nisim nuntakna ki ngaihsun pha kikkik leng ih gamtat luhek, ih mukpau kampau nate pan khialhna tampi/mawhna tampi ih bawllam kithei mahmah hi.

Nang/kei tung a hong mawh khat ih maisak zawh ciang Pasian in zong eite mawhna hong maisak ding hipan hi. Ih pahtawinop/it khat pen kong pahtawina hi ci-in ama thanemna teng gengen mawk leng a pahtawi ih suak thei diam? Tua ahih manin pahtawi nuam peuh leng haksa lolua hi. Pahtawi nuam peuh leng huatna,elna,hazatna lungsim khempeuh beilel hi. Ki pahtawi siam dingin han ciam sawm ni hun leh niten mual hong khupsansan ta, it leh ngaih tampi’n mual hong liamsan in eite zong ih hun leh nite bei diaidiai ta hi. Ih nuntak laimahin ki-it ding leh ki pahtawi ding Zomi a kuama peuhin han ciam ta ni. “Dam lai pahtawi” ih dam lai mahin kipah tawi ni. Ka Zomi pihte ka lungsim khempeuh tawh kong it hi cih hong phawk sak un.

Zomi ka hi hi.
Suano
Malay