Dahpihna thupuak ~ Pa Zam Go Mang (Naulak)

Date: February 6, 2016
USA gamsung Indiana gamke (State), Indianapolis khuapi a teng Pa Zam Go Mang (Kum 37)- Naulak beh in lam-et lohpi in leitungah a it mahmah a zi Nu Cing Sian Ngai nusia in a tawntung mun dingah hong ciahsanta cih i zak manin i dahmahmah hi. Pa Zam Go Mang pen Kawlgam sung Sezang khua a teng Pu Zam Kho Thang le Pi Kim San Niangte sungpan a piang unau pasal (3) leh numei (1) lak-ah pan tapa muanhuai khat a hihi. A mah pen dam lohna tuamtuam hangin nasem zo nawnlo a, a it mahmah a zi nasep kuankal in inn pan pusuak a, nitak inntung nawnlo in a zi mel zong a mukha nawnlo a hong sihsan suak a hihi.

Pa Zam Go Mang in hong nutsiatna hangin a pianna nu leh pa, a innkuan pihte leh laigui zom sanggam u leh nau, innsung dongta khempeuh tawh a kibangin dahna Zomi Innkuan USA in kong pulak uhhi. Pasian kamciam om bangin a MA bawlsa mihingte pen ni khat ni ciangin i kipatna leitang mah ah a ciah kik tek ding i hihi.

Tua a hih manin i pu le pa te’n “A si masa puan tuam tang” a cih bangun, a pai masate pen leitung gen theih haksatna nusia masa suak a hih manin a hampha hi, i cih theih ding pen Pasian thu um mite nuntak zia ding hi zaw hi ci’n kong hehnem uhhi.

Pa Zam Go Mang pen a tenna USA gam Indiana gamke sung Indianapolis khuapi a om, a ma upna EBC pawlpi in hun makaih in February 6, 2016 (Tuesday) nikai lam nai 02:00PM in hanmual ah kivui ding hi.

A ma luanghawm tawh kisai a thu le la van ding, sep leh bawl ding khempeuh Zomi Innkuan Indianapolis leh a ma biakna pawlpite mapang khawm in vaihawm khawm a hih manin dahna kawmkal sung pan haksatna tampi kizo suak hi.

Pa Zam Go Mang in leitung haksatna te nusia in a tangtawn gam ding ah hong ciahsan na hang a, dahna khitui nul a sanggam u le nau, nu le pa leh innsung dongta khempeuh tungah hehnem siampa Khasiangtho in hehnepna hong piak ta sak ta hen!

Executive Committee
Zomi Innkuan USA,Inc
U.S.A