Dahna Pulakna: Mangpha Rev. Lian Do Thang, Kum 66, (Tangpua beh)

USA gam, Oklahoma State, Tulsa khuapi a teng Rev. Lian Do Thang, Kum 66 (Tangpua beh) in abeisa December 28, 2016 ni in Tulsa khuapi sunga om St. Francis Zatopi panin Khuaksunglam damlohna hangtawh mual ong liamsanta cihthu izakmanin Zomi Innkuan Oklahoma kipawlna in nakpitakin kidahpih, ki lainatpih hi.

Rev. Lian Thang pen Zogam, Tonzang uksung, Tuimui khuapan hiin a it mahmah azi Pi Daw Khin Kyi (No Men) tawh Pasian thupha Ta pasal 3 leh Ta numei 3 neuh uha, USA gamsung Tulsa khuapi a teng a tapa Mangpi sapna tawh abeisa 2016 kum in a nupa un Tulsa khuapi ongtung uh ahihi. hamsatna vaitampi kantan a Tuipi galkhat ahi USA gamsung ongtun buangun a Sunmang, a lunggulh mahmah USA gamsungah a nungta Pasian ong itna taangko kawikawi ding cih te lungkimtaka semkhiaman nailo, it leh ngaih tengtawh zong khawlkhawm cim ommannailopi in hicibanga ong nusiatvat mawkpen nakpitakin ki khasiatpih, kilainatpih mahmah hi.

Rev. Lian Thang pen USA leitang tunga ong nusia Zomi laizom khat hihnatawh lainatpihna lahna in Zomi Innkuan Oklahoma kipawlna in Paakkual khattawh Mangpha khakna kinei ding hi.

I it mahmah Rev. Lian Thang tawh a nunungpen hunzatkhopding pen ongtungding January 05, 2017 (Thrusday) ni 2:00 PM hunin Tulsa khuapi sunga Zomite pawlpi lian mahmah khat ahi Far East Mission Church 9222, S Harvard Ave, Tulsa, OK 74137 ah FEMC Pawlpite ngeina zui-in Senior Pastor, Rev. Dr. Chin Khaw Kham makaihna tawh a nunungpen hehnep hunbawlna kineiding hi. tuakhitciangin Rolling Oaks Memorial Gardens Cemetery 4300 E 91st St, Tulsa OK 74137 ah daitansakna/Vuina kineidinghi.

I it mahmah Rev. Lian Thang ongnusiatna hanga adah akap, alunglengkhuangai pianpih sanggam laizomteng leh khuapihtuipih tanaumeltheih akuamapeuh adiakin a nusiat a itmahmah azi Pi No Men leh a tateteng tungah Meigong tagahte a nusia ngeilo, a maute pasal/Pa dinmun ah a pangden ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan Oklahoma kipawlna in thu kongngetpih uhhi.

Zaksakbehna : Sihvui nima nitak sim nai 7:00PM hunin a tunga FEMC Biakinn pi ah a nusiat a innkuanpihte hehnephunbawlna kineihpih, kitutpih ding hi. Tuatengah Zomipih a kuamapeuh paikimciat dingin ZIOK kipawlna mintawh kongzawn uhhi.

Dahpihna lianpitawh,

Board of Directors
Zomi Innkuan Oklahoma, Inc.
Teng taang’ in,

Pa Thang Suan Gin
Vice Chairman
January 03, 2017