Cuba gam makai Fidel Castro’ tangthu tomkim

Cuba gam makai Fidel Castro’ tangthu tomkim

Nov. 27, 2016: Cuba gam-a kilaihgawpna piangsak makai (revolutionary leader) leh Cuba gam mi khat bek deihna tawh ki-ukna panin tangpi tangta kikim-a ki-ukna (commnist) gam a piangsak Fidel Castro si hi. A tangthu tom kim hih bang ahi hi.

*1962: Aug. 13 in Bairan, Cuba ah piang hi.

*1945: University of Havana ah Law sin in, 1950 in buaih ngah hi.

* 1952: Fulgencia Batista in USte huhna tawh zawh thawh thu tawh thuneihna (coup d’tat) la in, galkap tthuneihna tawh gam uk hi.

*1953: Kilaihgawpna a deih pawl khat tawh 1953 in galkapte phual sim sawm uh a, sim zo loin kiman in thongah kikhum hi.

*1955: Kumpi’ maisakna (amnesty) ngah in Mexico ah galtai a, tua munah Che Guevera tawh kimu hi.

*1955: November 25 in Granma kici teembaw tawh Che Guevera kihel in galkap tawm khat bek guerrilla a kici 82 tawh Cuba zuan dingin pai uh a, Dec. 2, 1955 in galkap 81 Cuba tung uh hi. Baptista’ galkap ten na suam uh a, mi 81 lak panin 61 in sihna tuak uh hi.

*1958: May 20 in Batista in Fidel thahna dingin “Operation FF – Fin de Fidel or End of Fidel” kici ni 76 sung galdona nei hi. La Plata kicihna munah Fidel in Command post bawl a, June 1958 in US ten Baptista a piak galdona vanleng zangin Fidel’ makaih kumpi lehdote (rebels) bomb kikhiat hi. Ahih hangin Baptista’ galkap ten La Plata mu zo lo uh hi.

*1959: January 1 in Fidel galkap ten Baptista’ galkapte zo gawp uh a, Baptista galtai hi. Fidel in kilaihgawpna a pian’sak ding a sunmang tangtung ta ahih manin liangko kikim-a ki-ukna (Communist) tawh vaihawmna len phuankhia a, Prime Minister zaa len hi.

1961: US in Fidel thah theihna ding leh Fidel’ ukna laih ding hanciamna tawh galkapsiam kiguaite (mercenaries) zang a, hih CIAte galkap guaih “paramilitary group Brigade 2506” kici ten 17 April 1961 in Bay of Pigs va sim uh a, guallel dipdep uh hi.

1962: US in Fidel laih ding leh a thah ding sawm tawpsan lo ahih manin Fidel in Russiate’ huhna ngen a, Soviet Union (tu in Russia) tungah huhna ngen hi. Hih hun pen Cold War nasiat mahmah hun hi a, Soviet Union ngimna dingin US in Italy leh Turkey ah Jupiter ballistic missiles kici a koih manin Soviet makai Nikita Khrushchev in Cuba ah nuclear missiles ni 13 sung (October 16–28) koih hi.

Hih thu hangin buaina lianpi Cuban Missile Crisis ahih kei leh October Crisis zong a kici hong piang a, USte spy vanleng U-2 khat leh vanleng khat Soviet ten a kapkhiatsak a, khatin sihna tuak hi. Buaina hong nasia semsem a, leitung in nuclear galvan zanga kidona na ciam kha dek mahmah hi.

Nuclear galvan kizang leh a gualzo leh guallel om lo ding cihna tawh Soviet President Nikita Khrushchev, Russia ulian Anastas Mikoyan, Rodion Malinovsky, Issa Pliyev, Georgy Abashvili leh Cuba makai Fidel Castro leh Che Guevera ten US President John F. Kennedy, Robert McNamara, US ulian Maxwell D. Taylor, Curtis LeMay, George Whelan Anderson Jr., Robert F. Kennedy, Amintore Fanfani (Italy) leh Cemal Gürsel (Turkey) ten kihona nei uh hi. US in Turkey leh Italy panin missile a koihte la khia a, Soviet in Cuba panin missile la khia a, Soviet leh US in Cuba sim lo ding ci-in kamciamna leh thukimna nei uh a, US leh Soviet in a kihona ding uh nuclear hotline bawl khia uh hi.

• *1990 in USte gimna leh sunmang hong tangtung khongkhong a, Soviet gam pen gam tampi in hong kikhen hi.
• *1976 in Fidel in President zaa hong len hi.
• 1998: Pope John Paul in Fidel kimuhpih hi.
• 2006: A dam lohna hangin a sanggampa Raul Castro’ tungah thuneihna ap khia hi.
• 2008 in Raul in President hong len hi.
• 2015 in US in Cuba maibiak in US leh Cuba in a ngeina bangin kizopna (relation) nei kik uh hi.
• 2016: Nov. 25 in leitung nusiatsan ta hi. Thang Khan Lian