CRPH thusuah tawh kisai etkikna (2)

CRPH thusuah tawh kisai etkikna (2)

Federal galkap maban, federal gampi phuh ciang President sem thei dingte, budget hawm dan ding, cihte CRPH thusuah ah koi danin kigen hiam…

Federal Democracy Thusuah (Federal Democracy Charter) ci-in CRPH in thusuah a bawlna khenpi khatna leh khenpi nihna cih bangin kikhen hi. Amau tawh kipawl ding teng zawn kawikawi-in a kikul dan zui-in suaikaitek ding, ci uh hi. Tua thu tawh kisai-in ukcip galkapte nawhkhiat nadingin a kicing ding hiam, cih thukhun leh gamvai tawlet panin etkikna anuai abangin Legal Aid Network pan kong bawl uh hi.

6. Thusuah Khen 2, nambatpi 3 na ah ki-uknazia ding koidan hiam, cih kician ngiat lo hi. Khen 1 na a a kigen, “Hih thusuah – pareihnyeing thukimna pen suaikai pawlte” ci-in kigelh hi. Tua in bang a genna taktak hiam kithei lo hi. Federal system, mualgam State te thuneihna bulpi (Provincial Sovereignty) leh mualmite panmun ding koimah a genna om lo ahih manin mualmite maban pen a mangthang suak hi. Thukimna suaikaite cih ciangin NLD/CRPH tawh kizawl theite cihna maw, ahih kei leh CRPH cih bangbang kipumpiak a a mangte cihna maw, kua hiam khat a cihnopna bel hi ngelngel kha ding hi.

Tua bangzia in kuahiam, cih telgenna a om lo, kuate cih a kitheilo mipawlte in President leh Vice President teel ding uh hi, ci hi. Mipi teel ding hi loin a kiseh ding dan suak ahih manin CRPH thu a mang dingte bek in President leh Vice President sem ding, cihna suak hi. Tutung a CRPH thusuah khempeuh ah CRPH bek mah a lubawk pen dingin kigelh hi. A thunei pen hi den ding, cihna hi. Thuneihna khempeuh lencip hi. Thuneihna hawm dimdiam ding, cih ngimna peuhmah om lo ahih manin CRPH pen Galkap kumpi bangin hong ukcip den a sawm kipawlna khat suak ding cihna hi.

7. Thusuah Khen 2, nambatpi 2, nambat neu 3 na ah Kalkak ki-ukna, cih nambat neu 6 na dan hi leh kumpi kilamna ah ‘mualmi thautawite lam pan hong sawl mite’ ci ahih manin mualmite deihna zong kihel ding hiam cih lametna a om tawh kibang hi. Ahi zongin mualmi thautawi kipawlnate cihna thu limtak kigelh lo hi. Tua ahih manin mualmi thautawite dinmun leh pianzia ding telmun mel om lo a, gam zong nei lo ding, ki-ukna vaipuaklaknate ah zong vaipuak guan thei lo ding suak hi.

Ukcip Kawlgalkapte dona ah tangthu zong nei ngei het lo napi CRPH tawh kiho thei peuh leh Mualmi thautawi minpua in Union Gambuppi kilamna ah a kihel kha ding hon khat hong om ding hi. Takna mel nei loin bulkip a neilo kumpi khat hong piang thei ding ahi hi. Hakai pahtak lung heng kumpi minthang khat kinei thei ding cihna hi.

Thautawi Galkap ginatak a nei, gam zong a nei, ki-ukna zong nei-in bulkip gamvai lungtup leh ngimna kician a neisa mualmi thautawite adingin zong hih bang hi leh na mahmah thei ding hi. Amaute dinmun panin Innpi vaihawmna leh kumpikilamna ah bangzah ciang kihel thei ding, cih limtak kigen lo hi. Tua bek tham loin naupang khemna danin a thupi lua lo gambup ukna department pawlkhat khawng ah a minin panmun kipia thei ding dan ahi hi. Mualmite lungtup taktak nget in ne ding suak hi.

8. Thusuah khen 2, nambatpi 6 na ah kallak thukhen zum vai khen khatna ah “Kallak minamte pankhopna kumpi leh minamte pankhopna thudot pawlte kipawlin kallak thukhen zum vai khempeuh sem ding uh hi,” ci ahih manin suakta tak leh guptuam nei loin thukhen zum pan thu kikhen thei lo ding, cihna ahi hi.

9. Federal gampi phuhkhiatna ah a kisam bulpi pen khat in sum leh pai vai ahi hi. Gambup ah khen 3 kisuahin (Gambup, State leh State tawh kibang amau leh amau a ki-uk minamte) sungah amaute leh gambup kikal ah kuamah thunei tuam leh palai mapang tuam om kul loin sum leh paite kizang kizeek thei ding hi. Tua bang ahih theih nadingin federal kumpi leh State kumpi palaite kigawm khawmin gambup sum leh pai vai panmun neite kikumin hong hawm diamdiam ding uh hi.

Hih munah gambup phiangsiah leh State phiangsiah lakzia a tuamtuak hi ding hi, ci hi mah ta leh zing ciang a hong om pah ding kallak kumpi hun sung thukhun bawlnate ah kigen nawn lo leuleu hi. CRPH gen dan hi leh tuni a kipanin gambuppi adingin sumlut khempeuh CRPH bek in humcip thei, zeek thei cihna ahih lam kilang hi.

10. Federal Galkap hong pian ding pen mualmi thautawite lametna leh mipite lunggulhna lian pen khat ahi hi. Ahi zongin CRPH thusuah sungah Federal Galkap, cih peuhmah kidawk lo hi. Galkap koici bangin kinei ding, cih thu zong om lo hi. CRPH makaihna nuai ah Galkap phuan thak ding maw, ahih kei leh amau leh amau federal army kicing teng khawng federal Galkap hi, ci-in kipsak ziau ding khat zawzaw hi kha ding hi. Tua bang hi leh kum sawm tampitak Galkap kumpi lehdo in ma ana pangsa mualmi galkapte tawh kitalphut loh phamawh ding hong suak leuleu hi.

Galkap a thak sinsenin phuan thak ding hi leh zong a om sa mualmi galkapte tawh koi bangin kizomin kipawl khawm thei ding, cih sep khopzia ding peuhmah kigen kha lo hi. Federal Galkap a kiphutkhia zo hi leh zong tua federal galkapte adingin sum leh pai kisamte pen CRPH ukcipna tawn loin Innpi palai vaihawmna pan koici kikhenkhiat theih ding, cih thu zong bangmah kigen lo hi.(Zop lai ding…).

(Kawllai tawh CRPH thusuah etkikna a sim nuamte adingin a patpan a tawp dong hih link ah kicing takin om hi. Zolai version tawh sim theih dingin Tedim Post tanute in khen 3 suahin hg kisuaksak hi).

Photo: Zomite kihelin Union of Burma kici gampi hong piancil lai a kizang Dialkhai masa pen hi. Zomite zong Union of Burma gampi phuhkhiatna ah a innteekte ihihna leh innteekte satan ngah ding a kiawmte ngaih theih nadingin a kitomtom ihihna phawk nadingin i suahsak ahi hi. The Tedim Post