COVID-19 Update XII: White House pan theihhuai pawlkhat

COVID-19 Update XII: White House Press Briefing pan atheih huai thu pawlkhat – (April 21, 2020)

– President Trump in “US Coronavirus peak” pen kheng ta aa, asawt loin hih virus hong bei bei ta dingin ka lamen hi ci hi. US economic zong asawt loin hon kik ding kilamen aa, State governor ciat in amau state ciat ah hon kik leh hon kik loh ding khensat dinguh hi ci hi. State pawlkhat in May 1 ni in hong kik thei ding uh aa, state pawl khat belh zekai thei ding hi ci hi. State 29 bangin mai kha sung economic hong kik thei ding aa, New York leh New Jersey cih dan state ten hun a piak kul lai ding uh hi ci hi.

– White House corovirus response team in US econnomic hon kik theih nadingin mipi zuih ding Federal Guidelines Phase 1-3 (Dol 1-3) taangko khia uh hi. Tu lai tak Phase 1 akipan pan ta hi hang cih taangko khia hi. Phase khatna ah mite zuih ding, 1) Akua ma ciat inn ah om tek in “shelter in place” bawl tek ding 2) Social or physical distancing (6 feet) bawl tek ding, 3) Mi 10 sang atam zaw kikhopna, kimuhkhopna bawl lo ding, 4) Akisap kei leh khualzin lo ding cih te ahi h.

– President Trump in Coronavirus relief fund pan akipia “the paycheck protection program” aading $350 billion dek tak kihawmkhia zota aa, 1.6 million small businesses te kiang hawmkhia thei hi ci hi. Tua fund pen bei ding hi ta aa, Congress tung $250 billion a ki nget beh pen Democrats te thu kim nai lo leh khak tan (block) uh ahih manin tungdong ciang kibehlap thei nai lo hi ci hi.

– President Trump in tu ciang ciang COVID-19 test pen 4.18 million bang kibawl khia zo ta ci hi. Leitungbup tuamtuam a test kigawm sang tam zaw ta ci hi. Coronavirus natna dam sak theih nang treatment leh therapies zong kipan pan ta aa, amanlang thei pen in vaihawm zawh nang kihanciam ciam ta hi ci in President Trump in taangko khia hi.

– US company minthang khat ahi Honeywell in maituam (N95 face masks) bawl kipan ta aa, kha 9 asep dinguh pen nipi 5 in nasep man ding geel zo uh hi ci in Presidnet Trump in taangko khia hi. Honeywell tua asem dingin mi 1000 nasep sam uh aa, kha khat 20 million face masks ta bawl dinguh hi ci hi.

– Vice President Mike Pence in mi tampi tenna metro areas tengah COVID-19 peak (adawn) kheng ta aa, dai (stable) ta cih kimu mu ta cih taangko khia hi. US ah COVID-19 nakna nei atam pen na te pen New York leh New Jersey metro areas, Detriot metro area cih te ahi hi. President Trump in belh COVID-19 natna atam mahmah na mun (hot spot) te ah cina 50% bang kiam ta ci hi. Vice President in State atam zaw Federal guideline Phase one (dol khatna) ah tung ta uh ci hi.

– Tulai tak US leh leitung gam ah Namngimtui a kiam mahmah laitak hi aa, US in 75 million barrels namngimtui zat theih ding (reserves) in koih hi cih President in pulaakkhia hi.

– New York Governor Coumo in amau New York ah zani April 20 ni in COVID-19 hangin asi tawm pen hi cih pulaak khia hi. New York ah COVID-19 hangin misi April 17 ni in mi 606, Apl 18 ni in 507, April 19 ni in 478 leh April 20 ni in asi mi 481 pha ci hi. Zato lum zong record ah atawm pen ci aa, New York zong “COVID-19 peak” kheng ta in akiam lam ma nawhnawh dingin kilam en hi ci hi. New York Governor in Federal kumpi leh President Trump te hong huhna uh pen picing mahmah aa lungdam mahmah hi cih pulaak khia in Governor khempeuh lak pan amasa pen Federal kumpi aphat khia kei ka hi ding hi ci hi.

– Huhna sum direct check payment pen bank deposit pan alut tam zaw ta aa, check tawh akikhak pawlkhat ten tu nipi sung ngah ding uh ci hi. Huhna sum ngahlo leh alut lo peuh mah in IRS website pai in form phih (fill-up) ding ahi hi. Naupang kum 17 apha khinsa te kipia nawnlo dingaa, nasep kum khat sum $12200 pan anuai siah angah ten zong ngah dinguh aa, ahi zongin IRS ah form phih kul ding ah hi. Hih huhna sum pen Kumpi te in i ci mawh lai tak hong piak giat uh hi aa, lot kik kul lo in hih huhna sum hangin Taxes khan ding cih te zong patauh kul lo hi. 2019 kum taxes sum liau ten zong ngah ve ve ding uh aa, form aphih uh kul ding uh hi. Hih huhna sum pen kumpi in mi khempeuh ngah dingaa hong vaihawm sak ahih manin i ngah tek ding leh lungmuang takaa, i zat ciat ding ahi hi.

– COVID-19 hangin nasep hong kikhawl sak ahih kei leh quarantaine/isolation bawl in nasem thei lo aa Unemployment benefit asiau peuh mah in Coronavirus relief fund pan hong kipia “Federal Pandemic Unemployment Compensation (FPUC) ($600 – weekly)” zong siau khawm tei tei leng nipi khat $600 Federal kumpi pan hong kipiak beh ding aa, inn sap lo sap patuah kul nawnlo ding ahi hi. Eima omna state ciat ii department of labor wesite ah kisiau thei hi.

More: US ah abeisa naikal 24 sungin COVID-19 hangin mi 4591 sihbeh

– Johns Hopkins University & Medicine pan akhahkhiatna tung tawn in Leitung ah Covid-19 natna ngah mi 2,501,156 (2.5 million) pha in asi mi 171,810 pha ta hi. US gam ah natna ngah mi 788,920 leh asi mi 42,458 pha ta hi. Kawlgam ah natna ngah mi 121 pha ta in asi mi 5 om ta hi. US om ei Zomi te sungah zong Covid-19 anei pawlkhat kiom om ta ahih manin akuamapeuh in I kidawp ciat ding leh I innkuanpih te hoih tak I kepcing ciat nang thupi mahmah ding hi. Thomas On Sian Mung (Thomas Mung Guite) Washington D.C
April 21, 2020.