Covid-19 tawh kisai mipi te tungah theihsakna

Covid-19 tawh kisai mipi te tungah theihsakna

Tuhun tulaitakin leitung gambupin a buaipih mahmah thu in Sen gam, Wuhan khuapi panin a hong kipankhia CORONA virus natna ahihi. Tua natna hangin mi tampi in sih lawhkhin hi. Tua natna i gam zong hongtung ta cih thu ki za ahihmanin a kua mapeuh i kidop ciat nadingin i ki za sak hi.

Leitung zatui lam mipilte in a damsak nading leh a dal nading zatui hahkat takin azonzon uh hangin tuni ciangdong muzo nailo uh hi. Covid 19 natna pen a zawdiakin natna laigil nei in a thahat lo mite leh kum u ham pumpi thuakzawhna a hat nawnlo mite in thuak haksa sadiak uh hi ki ci hi.

Tua ahihmanin pumpi thuakzawhna a hat theih nadingin tha a om, a limci mehtehmehgah tuamtuamte hoihtakin nek ding ki sampha mahmah hi. Hih natna i ngahloh nadingin zato lamte leh kumpi lam thuneite thupiak leh thukhunte hoihtak leh mantakin i zuih ding i ki hanthawn nuam hi.

Zato lam leh kumpi lam thuneite ii thupiak leh thukhunte pen Lift Fund te huhna tawh CORAD zumin kong tangko khia uhhi.

1. Corona virus natna pan kidal theih nangin ki kepzia dingtawh kisai mipite theih huai thute;

Mi khat leh khat kinailua loin omna in Covid 19 natna a ki lawhloh nadingin a hoihpen kidal kholhna ahihi. Covid19 natna a kilawhloh nadingin ahithei zahin mipi omkhopna pel ding hi.

A hithei zahin ih innsung ciatah om ding hi. Mipi omkhopna pawite bawllo phot ding hi. Mi- inn ah hawh suk/to selo ding hi. Khat le khat Pi (3) peuhmah kihalin om ding hi. Innsung bek ah om ding hi. Mi tam tawh ki sukha loin ei inn sungah omleng kilawh lo pen hi.

A kisam vanlenate lei ding cihbang ahizongin , pel mawh in paikhiat akul leh khat kia pai in lei ding hi. Ih pumpi aki gamlat hangin lungsim kinai natawh covid-19 natna dal khawm ciat ni.

2. Khut hoihtakin sil pahpah ding.

Covid natna i ngahloh nadingin a hoihpen thute lakpan in namkhat in satpiang leh tui tawh I khut hoihtakin sil siang pahpah ding hi.

Natna a ngahsa te ii hahcheai na, bukkhuhna pan hong lengkhia lungnote, i huihdikna lampi zui in a lutna hang ahizongin, natna lungno abaang nate lawn khakna khut tawh mit, nak, kam cihte i lawnna pan in COVID 19 natna kilawh thei hi. Ih khut pen satpiang leh tui tawh setkan (20) sungbang sawp hamtang ding hi.

Mipi zat vanlena te i lawnkhit ciangin khut sil siang hamtang ding hi. Na khatpeuhpeuh nek ma leh awngbuk paikhit ciangin satpiang leh tui tawh khut silsiang hamtang ding hi. Khut silsiang lo pi in kuama mit, nak, kam te lawnsaklo ding hi.

Sikhum/zunkhum, lungtang natna, kal natna, sikhang natna, cancer natna a nei khanghamte covid-19 natna aki lawhloh nadingin vakna panin inn ah i tun simin khut sawpsiang hamtang ding hi.

Tuabang a khut silna in piteek puteek khanghamte nuntakna kepna khat hipah hi.

Khut sil dan ding pen- ih khut peek a sung a pua, khutme kawmkal, khutpi, khut me taang, khutkuak sung khuat in kui ding, ih khut ngawng ciang silsiang sitset ding hi.

3. Hatcheai, bukkhuh te zuih ding

Hatcheai , bukkhuh ciangin tissue (or) i kiu kawi tawh ih nak leh kam hu in khuh ding hi. Mai nul leh puan te zanglo ding hi. I zatsa tissue te ninbung sung ah hoihtakin paai pahpah ding hi.

Bukkhuh i vei leh mi tawh i kiho ciangin muktuam leh naktuam thuah hamtang ding hi. Mi tamna ah pailo ding hi. Mihon tawh mawtaw tuangkhawmlo ding hi.

Muk leh nak tuamh i zatna hangin ei ma pumpi, ih inn kuanpih te leh ih khua ih tui pen hih natna pan in a dal i hipah hi.

Muktuam naktuam i thuah leh lak khiat ciangin muk tuamna mun ih khut tawh lawngkhavet loin a khau panin lakhia ding hi. I zatsa muktuam leh naktuamte ninbung sungah paii pah ding hi. Tuakhit ciangin ih khut sil siang kikpah ding hi.

4. Covid-19 natna kidal nadingin khuasung vengsung aa vanzuak sai tein zuih ding thute.

Hahchei, bukkhuh, cisa cihbang mite in van zuaklo ding, sai honglo ding hi. Pumpi siangthona thupi sak ding hi.

Vanzuakte leh van leite a tawm pen Pi (3) peuhmah kihal ding hi. Sum piak khit leh sum san khit ciangin khut sil siang kikpah ding hi. Sai neite leh van leite zat dingin satpiang leh tui sai mai ah koih hamtang ding hi.

5. Covid-19 natna kidal nadingin, innkuan sung ah zuih ding thute

Inn nupi te in innkuan sungah damlohna a om leh inn ah omsak hamtang ding hi. Pumpi siangthona hanciampih ding hi. Nek leh dawn te bawl main khut hoihtak in silsiang ding hi. Sa, ngasa, a sialte limtak sawp siangkhit ciangin mintak in huan ding hi. Antang sathau cihte aki sap leh van zuakte a inn uh ah kipuak sak ding hi.

6. Kumpi te thu zaksaknate bek um ding/zui ding

Tulai takin hih natna tawh kisai mipite theihnop/ kan nopna a khan mah bangin, amanlo kamdawn tampi tak om hi. Gtn : facebook pan leh upmawh thu kigen mawk mawk te kiang pan.

Upmawh thu, a manlo thute hangin mipite linglawng gawpin amanlo kidalna leh ki bawlna zatui, akul lo sinkhamna leh siatna te kibehlap saklel hi.

Hih natna tawhkisai in က်န္းမာေရးႏွင့္ အားကစား ၀န္ႀကီးဌါန၊ ျပန္ႀကားေရး၀န္ႀကီးဌါန te ii website leh facebook laimai te pan in a hun zui in zaksakna nei den uh hi. Tua zaksaknate bek mah um in, i zui ding hi.

7. Gamdang panin ong ciah te zuih ding thute

Gamdang pan in hong ciahte in khuasung hausa te leh kumpi cidamna lam nasemte tungah thu zasak hamtang ding hi.

I khualzinna mun teng ipsim neilo in gensiang ding hi. Kepcinna (Quarantine) a kisapleh lungkim takin mangpah ding hi. Natna lungno nei leh nei lo aki theihmasiah thunei te thukhun bangin kiciantak in zui ding hi. Midangte tawh kinai lua in omkhawmlo ding hi.

Gamdang pan hong ciahzawh ni (14) sungin cisa, hatcheai, naptui, bukkhuh cihte a vei leh khuasung hausa upa te leh kumpi siavuan/ mah te kiang ah ki lakin ki vel sakpah ding hi.

Hih thukhun te zuihna hangin ih innkuan pihte leh khuapih tui pihte natna ki lawhna panin kidal zo ding hi.

Ih khuasung vengsungah gamdang pan a hong ciahte in khuasung hausate leh kumpi cidamna lam nasemte kiangah thu a zaksakloh lam uh i thei leh a hun lapin mip te in zaksakna tawh natna dal ding hi hang.

Gamdang pan in hong ciahte pen lipkhaplo, deidanlo in ahitheizahin panpih ciat ni. CORAD- Tedim/ Siamsin Library