Covid 19 leh Gambuaina abei ciangin ~ Sia Do Khup

Covid 19 leh Gambuaina abei ciangin ~ Sia Do Khup

(Sunmang hi ei lawmte, hun na ngah ciang damin na sim lel ou maw)

CIALPI MABAN ZOM DING

Hun lem a om phetin cialpi bawl nading thukimna omsa khua tengah lungdamna thu tangko ding. Pasian in hih nasep na sem dingin pulnatna panin kei hong siit, hong hawi ahihna thu teci pang ding.

SANGINN LAMAH TU LEH TATE TAWH

Ka tate Lia Lulun leh Tg. Thangthang sang man nailo uh ahih manin “Na sang uh man mengmeng vou leh” ci ding thungetsak ding a kisapnate uh lungkim takin vaihawmsak ding.

UZAW NAUZAW TAN KIKIM MANG DING

Ka tute; Papal, Zazam, Haupi, Tawtawi-te a neu a lian tanlang pan kipan khawm ding, uzaw nauzaw laitan kikim ding hita, sanginn ah kha ding dawn ding, tute tawh kithuah mah a nuam pen hiven.

BETHEL LAMAH PAI KIK HAMTANG DING

Ka pianthakna mun Singgial khua leh ka khua Kansau ah pai hamtang ding. Singlamteh phungah “Topa aw hih hunnuam kei nong pia kik hi” ci-in lungdam ko ding.

GUALLELHNA LAMPI AH GUALZAWHNA TAWH

Kansau panin Singgial tai 7 hi a, Tanlang kah ding khe tawh ka pai keukeu hi. Tan khat ka sim ciangin bawda ah om ka hih manin ka antang ding puak kul ta hi. Ka Pa’ hong bawlsak hakkol neu tawh antang pua lel lua, kap mai, lawm ten hong dawn zel uh, Tai 7 ahih hangin gamla ka sak dan kigen theilo.

Leitung mun tuamtuam zong ka zin ngei a, ahih hangin khualzin nuam ka sak penpen Singgial leh Kansau kikal, Topa hong piak mawtaw tawh ka tai veuveu mahmah nuam ka sa pen hi. A mun a mual singkung lopa nangawnin thei kim ka hih manin ka neu lai a, a kitung thei mahmah lo munte tawmvei sungin kheng zeuzeu mai, pai kik hamtang ding.

TAAK KHAWLMUN AH KHAWL PHOT DING

Neu lai in antang kipua ahih manin gim lua a, khawl loh a phamawhna mun, Taak khawlmun ah khawl ding, Dr. Do Kham pianna Saipimual gal-et phei ding, huih siangtho diik hiat-hiat ding.

Taak kungpite huih in mut a ging heeuheeu ngai ding, pengpelep, vahui, valah, vakawlkap, kakhuut, simbu, vasik, baibek, daiva, vanungak hamte ngai dide ding. A beisa thu lungngai ding khitui taaksak keuhkeuh zel ding, nui zel ding.

SIAN LIAN LEH TEAMTE ZAWN DING

Khual ka zin nak leh Tedim Lawibual a ka zinte loin kizinkhia zolo hi. Teamte leh Sian Liante innkuan zawn ding, Ka khuataw a luang Kaphi lui ah tuivok nga lim mahmah beng kik ding, gamlak ah huan ding lobual lakah tu kawm a ne ding.

Singpi tunga khuaidawk, khuaivom, khuaisan, khuaivahte to ding, “Khuailu” kici a lim penpenna mun tawm ne hamtang ding.

A KISATHEI PIAN KA LAWMTE ZAWN DING

Khuahun hoih ciangin Kawlpi ah zing niangtui dawn dingin ka neu lawmte leh Pasian naseppihte ka zawn zel a, hong zui nuam mengmeng loin kisathei se vial uh hi. A kisaktheih uh hangin ngai ka hih manin zawn teitei ding, thucin thutang gen ding.

CIDAMNA A HOIH LEH KAH HUN KHAT LA DING

Covid 19 in ka ute leh tanau tampi a kipan Pasian naseppih tampi hong laksak a, ahi zongin ngaihsun ngam lo kap ngam lo hing. Kei zong covid tawh kilai khin phet ka hih manin hat nailo hing.

More: Anuam mahmah sivuina ~ Sia Do Khup

Tua hun ciangin cidamna hoih ta ding a, kah hangin kisi nawnlo ding ahih manin ngaih teng sialin kap au-au lel ding, gim pian ciang “Tu a zah ci laizang ning ee, a za nawn ding uh lah hi kei, kah man a hong tho kik ding uh lah hi kei” ci dingin tawp ziau ding, ciamnuih khawng gen pah lel ding. Tha i ngah leh zom lai ni maw. Sia Do Khup