COVID-19 le Gamzawngte (COVID-19 & The Developing World) ~ Mung Sian Kim

COVID-19 le Gamzawngte (COVID-19 & The Developing World) ~ Mung Sian Kim

COVID-19 puulnatna a phukha ding in kuamah ki lamen lo-a, kuamah ki gingkhol khalo hi. Gam khangto America nangawn upmawh sang na ki gingkhol lo tawh kibang hi. A hizong in, natna ngah mi hong tam in, sumbawlna (economics) hong sukkhak tak teh, Trump makaih’ White House in Innpi (congress) thukimna la-in, U.S. $ 2 trillion bang hong zekkhia ziau hi.

Ei gamzawngte zong ih kumpi te in, kumpi sumbung (state budget) hongziau in honghuh ziahziahnuam khamah dinghi. A hizong, tuabang in zeek zuahzuah ding sumlom omlo hi. Kum tampi gamhau te’ huhsa tawh a ki naamtaak gamte in bang lawh nawnding ih hiam? Natna gilo hong tunma pekin ngahna sang zatna a tamzaw (budget deficit), gampua ah vanzuakna sang gampua pan vanleina a tamzaw (trade deficit), kum tampi leiba thaang ah a awk (debt trap) gamzawng te in banglawh nawnding ih hiam? “Phadawm ei Topa! America, China, Japan, EU le World Bank te in hong huh bilbel. Eh! Nakhawl dih o! Amau bang tanvei hong huh zo mawkding? Hih natna sang a siahuaizaw natna hong tung henla tua gamte zong a gammi te ciat donin hong buaicip le uh, bang ihlawhnawn ta diai!”

Gamdang huhna ihcih ciang lohkik kullo huhna (humanitarian assistance, grants) le lohkik akul huhna (loans) ci in nampi nih kikhen thei hi. Tua huhna te atamzaw pen sialkhau khihsa (string attached) in hongpai thei hi. Cihnopna ah, huhna ngah gamzawng te in huhna pia gamhaute’ deihna pawlkhat mangloh phamawh hi (domestic adjustment cost). Genteh na, fiscal policy, monetary policy, trade policy leh atawpna ah political system naleng kheel loh a phamawh ding in hongkalthei mawk uh hi.

A hoihna tampi a omsam hang a hoihloh na pawlkhatzong om veve hi. A hoihna ah kumpi thuneite in vaipuak hongla zaw (responsibility and accountability), golhguk neekna hong tawmzaw, gam hong khangto zaw hi. A hoihlohna ah gamzawng te’ thuneih na (state soverighty) pen kimawlna in hongzangh (interfere) thei uh hi. Gamzawngte’ sungah hanciam ding sang, huhna bekbek lametna (aid dependency) hong piangsak thei in, kizawng tawntung thei hi.

April 21, 2020 ni-in World Food Program executive director pa David Beasley in Leitungbup Innpi Bitna tawh Kisai Kimuhkhopna (UN Security Council meeting) ah thu asunin gamzawng te ah Laisiangtho’ genbang (of biblical proportions) kialpi hongtung ding a, nikhat in mi 300,000 gilkialna hang in siding hi ci hi. Global Report on Food Crises (GRFC 2020) in a genna ah, 2020 kumbei ciang mihing 265 million bang neek le dawn kitasam khathei ding hi ci in genkhia uh hi. Zawnna a ki sihlawh himawk hi. Hihbang ihgen ciangin aki lauthawngsak ih hikei-a, khantohnopna lungsim ihneihding deihna hizaw hi.

COVID-19 hunsung in nasep a neilo le nasep a khikhawlsak mimal America bekbek ah April 16, 2020 niciang million 20 bang pha a, Gaalpi Nihna le the Great Recession khitzawh a tampen honsuak hi. America ih genteh pahpah na a hang in, data le information kician a omhang ahi hi. Ih Kawlgam ahzong April 17, 2020 ni ciang nasem mi 700,000 ii sepna le gamdang sumlut (export revenue) $4.6 billion hong luangkhiatna puankhui setzung (garment sector) in COVID-19 bawlin haksatna pawlkhat tuak uh hi. Vanham/vansial (raw materials) 90% bang hong paikhiat na Sengam inzong January le March kikaal sungteng Kawlgam ah tua vante puak hongkhawl ahih manin gamdang sumlut (export revenue) hong khawl hi.

Sente in tua vante hong puak mah leh zong ih zuaksawn nading Europe gamte in a company te uh tawhkalhcip a hih man in kipuakthei tuanlo hi. Kawlgam ah nasemmi tampi in nasep hong taanlawh pah hi. Tua hi a, gamkhat ih khantohnop takpi leh gamdang tawh sumzuak sumbawlna (foreign direct investment) ih thapiak mah bang in gamsung mite’ nasep siamna (domestic productivity) zong khantoh sak mahmah ding kisam hi. Thauka (double-barreled shotgun) bang-in lawngnih pan tangnih ih lotkhawm theihding kisam hi. Tuabang ahihhuaina ahang anuai ah tawm kikum suk ni.

Natna huhau in campany te zong tampi suplawh uh ahih manin mailam ah mihing a kisamlo theithei dingin a pilna le a sumte (R&D) uh hong zangh ding uh a, set tawh nasepna (automatic industry) hongkhang semsem ding hi. Mihing’ tha pen set in hong luah/laih ding ahih manin pilna neilo nasemte’ (unskilled labors) sepding hong tawm tektek ding hi. Mihing’ septheih nasep te hong mangziau ding hi. A hunlap in, technology lam ah khangto in ihpil ihsiam mengmeng keileh “a papai ding” ih hita hi.

Hihbang teng hangin, leitung sumzuak sumleina (world economy) pen mihau tawmkhatte’ (capitalists) khutsung ah hong kikhol tektek ding hi. Tuni mahmah inzong leitung ah mihau 26 ii neihzah pen leitungbup mimal phazah alang vekpi kigawm tawh kikim mawk hi. Hih natna hangin ni 23 sung in mihaute hauhna $238 billion khang hi. January 1, 2020 akipan Amazon neipa Jeff Bezo, SpaceX le Tesla CEO Elon Musk akihel billionaire mi 8 te’ sumlut pen $1 billion val khangto ci hi (Institute for Policy Studies). COVID-19 hangin computer tawh nasepna (Artificial Intelligence) hong khang semsem dinga, tua in mihing tampi’ kizattheihna hong kiamsak ding hi. Computer pilna azanghsiam company te (tech giants) honghau semsem diak ding hi. Ih phawktheih pakding in (COVID-19 mapek in) company khat ahi Apple company ii hauhna pen Mexico, Indonesia, The Netherlands, Saudi Arabia, le Switzerland gamte’ hauhna GDP sang in lianzaw hi (Investopedia).

Atomin gen pak leng Laisiangtho’ genmah bang in “A neisate tungah kipia thuahin hau semsem ding a, a nei lote tung panin a neihsa sunsun nangawn kilaksak ding hi.” (Matthew 13:12). A zawngte le a haute’ sumlut hong kilamdang luat ciang (income inequality) in lungkimlohna hongkhang dinga hunkhatlai in “Industrial Revolution” ihneih ngei mah bang in hunkhat ciangin “AI Revolution” ki neilai khathei ding hi. Tuahun ciangin leitung makai (world leaders) te hong pilvang in suahtakna lampidang khat (alternative solution) hong vaihawm theihkei vua leh tua buaina in leitungbup sumbawlna (world economy) ziin honliingsak dinga, atawpna ah Karl Marx ii Socialism in mun hongngah kik khathei ding hi.

Lai at pa’ mimal muhna ah mitawmkhat bek huauhna (capitalism) lah hoihkhinlo a, ahaulua omlo in mikhem peuh kibat kimna (socialism) zong hoihkhin lo ahih manin mikhempeuh hauhkimna (socio-capitalism ciphial ding ihhiam) deihhuai pen hi. (Hih mun ah “mixed economy” kammal ih zatloh na hang pen socialism le capitalism in economy a kikheelsak zia bek a gennuam hilo in, nisim nuntak khuasakna le kiukna te ah a kizatziate gennuamzaw ih hih hang hi.) A telloh uh hang in America a Democrats le Republicans te zong sumlut zeekna (Income Redistribution) tawh kisai a kinialnial uhpen mikim hauhkimna (socio-capitalism) mah a gengen uh hikhathei ding hi.

Hihbang natna gilo hongtun ciang in ei gamzawngte’ ading na ngaungau diak hi. COVID-19 ihdo kawm in zawnna pan ih suahtak mengmeng theih nading kisat khia dih ni! Tualgaal te khawlbawl mengmeng ni. Ei le ei kidona pan ihgaal pih (common enemy) COVID-19 le zawnna te dokhawm ni. Gamsung kilemding mualmong et abat lai phial leh zong, kilem ding hanciamna te tatsatsak loin, gaal le sa kawmkaal ah khantoh nading lampi dang khat (alternative solution) zong veve ni. Mipite in pilna, hauhna, le khantohna angah ding uh kilawm hi. Sawtvei pi tuaklua khinta uh hi. Hih COVID-19 in hongpiak lesson khat in “Gam khantohding le hauhding pen lunggulh niingniang tawh kingah nawnlo-in, sihna le hinna zah in thupi ta hi.”

Khaileh_ mailam bangbang hongpiang zongin tuni nungta nuamlai kahihteh kakhut vasil photning. Nang e, “Nakhut nasil hia?” Mung Sian Kim

References: Global Report on Food Crises (FRFC 2020), Institute for Policy Studies, Investopedia, Oxfam, The Diplomat, The Holy Bible, United Nations, World Economic Forum